ދިވެހި ފިލްމް "ލޯބިވެވިއްޖެ" އޮލިމްޕަހުގައި ލޯންޗުކޮށްފިއެވެ.

ގިނަ ބަޔަކު އިންތިޒާރުކުރަމުން އައި މި ފިލްމް ލޯންޗްކޮށްފައިވަނީ ބުދަ ދުވަހުއެވެ. އެ ފިލްމް ލޯންޗްކުރުމުގެ ރަސްމިއްޔާތުގައި އާއްމުންނަށް ވަނީ ހަދިޔާއެއް ގެނެސްދީފައެވެ. އެއީ މި ފިލްމުން ފެނިގެންދާ ފަންނާނުންގެ ޚާއްސަ ލަވައެކެވެ. ސީޒަން އަލީ، އާމިނަތު ރިޝްފާ، މަރިޔަމް އައްޒަ އަދި އަހްމަދު އީސާ (އާނަންދު) ފަދަ ތަރިން ފެނިގެންދާ މި ފިލްމަކީ ސީޒަން އަލީގެ ޑައިރެކްޝަނެވެ.

އެސް ޕްރޮޑަކްޝަންސްއާއި ސެޓަރން ސްޓޫޑިއޯ ގުޅިގެން އުފައްދާފައިވާ މި ފިލްމުގެ ސްކްރީންޕްލޭ ލިޔުނީ ސްކްރީން ރައިޓަރ އަހުމަދު ޒަރީރުއެވެ. ފިލްމު ކެމެރާކޮށްފައިވަނީ އިބްރާހީމް މޫސާ (ދަބަ)އެވެ.

މި ފިލްމާމެދު މި ފިލްމުގެ ޑައިރެކްޓަރު އަދި ބަތަލު، ސީޒަން އަލީ ބުނީ އެ ފިލްމުގެ މަސައްކަތްތައް ކޮވިޑްގެ ސަބަބުން ހުއްޓުނު ކަމަށާއި، ކޮވިޑަށްފަހު އަލުން ފިލްމުގެ މަސައްކަތްތައްކޮށް، ފުރިހަމަ ފިލްމެއް އާންމުންނާ ހަމައަށް ގެނެސްދެވޭތީ ހިތްހަމަޖެހޭ ކަމަށެވެ. މި ފިލްމުގެ ފުރަތަމަ ޝޯވއަށް އާއްމުންގެ ބޮޑު ތަރުހީބެއް ވަނީ ލިބިފައެވެ.

ފިލްމްގެ ޑައިރެކްޓަރ ސީޒަން ވަނީ މި ފިލްމަކީ އުންމީދީ ފިލްމެއް ކަމަށް ބުނެފައެވެ. އަދި މި ފިލްމަކީ ސަސްޕެންޝަން ބޮޑު، އާއްމުންގެ ޝައުގުވެރިކަން ދަމައިގަންނާނެ ފަދަ ފިލްމަކަށް ވާނެކަމަށްވެސް އޭނާ ވަނީ ބުނެފައެވެ. ލޯބީގެ ފިލްމެއްގެ ގޮތުގައި ގެނައިނަމަވެސް މި ފިލްމަކީ ތަފާތު ވާހަކައެއްގެ މައްޗަށް ބިނާކޮށްފައިވާ ފިލްމެއް ކަމަށް، ފިލްމުގެ ޕްރޮޑަކްޝަނުން ބުނެއެވެ.

3 ސަރަހައްދެއްގައި ޝޫޓްކޮށްފައިވާ މި ފިލްމުން ރާއްޖެއާއި ސްރީލަންކާގެ ރީތި މަންޒަރުތައް ފެނިގެންދާނެއެވެ.

"ލޯބިވެވިއްޖެ" ފިލްމުގެ ޓިކެޓް އޮލިމްޕަސް ކައުންޓަރުން ލިބެން ހުންނާނެއެވެ. އަދި އެ ފިލްމުގެ ޓިކެޓު ގަތުމަށް ޚާއްސަ ނަންބަރު 7458800ށް ގުޅައިގެންވެސް ޓިކެޓު ގަނެވޭނެއެވެ.