އެމެރިކާ ސަރުކާރު ހުއްޓުމުގެ ސަބަބުން ދުވާލަކު 15 ބިލިއަން ޑޮލަރުގެ ގެއްލުންް

ސަރުކާރު ހިންގަން ބޭނުންވާ ބަޖެޓު ފާސް ނުކުރެވި އެމެރިކާގެ ސަރުކާރު ހުއްޓުމަކަށް އައިސްފައިވާއިރު، އެކަމުގެ ސަބަބުން ދުވާލަކު 15 ބިލިއަން އެމެރިކާ ޑޮލަރުގެ ގެއްލުން ވަމުން ދާ ކަމަށް، އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ވިދާޅުވެއްޖެ އެވެ.

އެމެރިކާގެ ފެޑަރަލް ސަރުކާރު ހުއްޓިފައި އޮންނަތާ މިހާރު ދެ ހަފުތާ ވެފައިވާއިރު، ބެސެންޓް ވިދާޅުވެފައި ވަނީ ސަރުކާރު ހުއްޓުމުގެ ސަބަބުން ދުވާލަކު 15 ބިލިއަން އެމެރިކާ ޑޮލަރުގެ ގެއްލުން އިޤްތިޞާދަށް ވަމުން އަންނަ ކަމަށެވެ. އޭނާ ވިދާޅުވީ މިހާރު ސަރުކާރު ހުއްޓިފައި އޮތް އޮތުން ނިމުމަކަށް ގެނައުމަށް، ރިޕަބްލިކަނުންނާއި ޑިމޮކްރަޓުން ގުޅިގެން މަސަައްކަތް ކުރުމަށް ވެސް ގޮވާލައްވާ ކަމަށެވެ.

ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ބެސެންޓް ވިދާޅުވީ، ސަރުކާރު ހުއްޓިފައި އޮތުމުން ސަބަބުން އެކަމުގެ އަސަރު މަސްތަކެއް ވަންދެން އެމެރިކާގެ އިޤްތިޞާދަށް ކުރާނެ ކަމަށެވެ. އެކަން ފާހަގަ ކުރައްވައި އޭނާ ވިދާޅުވީ އާޓިފިޝަލް އިންޓެލިޖެންސް ފަދަ ދާއިރާ ތަކަށް ކުރެވޭ އިންވެސްޓްމަންޓުތައް ދެމެހެއްޓެނިވި ގޮތެއްގައި ކުރިއަށް ދާނެ ކަމަށް ލަފާ ކުރެވުނު ނަމަވެސް، ސަރުކާރު ހުއްޓުމުގެ ސަބަބުން އެކަމަށް ހުރަސް ތަކެއް ކުރިމަތި ވެފައިވާ ކަމަށެވެ.

އިންޓަނޭޝަނަލް މަނިޓްރީ ފަންޑު (އައިއެމްއެފް) އަދި ވޯލްޑް ބޭންކުގެ އަހަރީ ބައްދަލުވުން ތަކުގެ ތެރެއިން ވާހަކަ ދައްކަވަމުން ބެސެންޓް ވިދާޅުވީ، އިންވެސްޓްމަންޓަށް ޑިމާންޑު އޮތް ނަމަވެސް، ރައީސް ޑޮނަލްޑް ޓްރަމްޕްގެ ސިޔާސަތު ތަކުގެ ސަބަބުން އިޤްތިޞާދީ ކުރިއެރުން ފެނިގެންދާ ކަމަށެވެ. އަދި މިވަގުތު އިޤްތިޞާދަށް ހުރަސް އެޅެމުން ދަނީ ހަމައެކަނި ސަރުކާރު ހުއްޓިފައި އޮތުމުން ކަމަށް އޭނާ ވަނީ ފާހަގަ ކުރައްވައިފަ އެވެ.

2025 ވަނަ އަހަރުގެ ފިސްކަލް ޑެފިސިޓް ވަނީ ކުރީ އަހަރުގެ 1.833 ޓްރިލިއަން ޑޮލަރަށް ވުރެ ކުޑަ ވެފައި ކަމަށް ބެސެންޓް ވިދާޅުވި އެވެ. ޑެފިސިޓް-ޓު-ޖީޑީޕީ ރޭޝިއޯ އަންނަ އަހަރު ތަކުގައި ތިން އިންސައްތަ އަށް ތިރި ކުރެވި ދާނެ ކަމަށް އޭނާ ލަފާ ކުރައްވަ އެވެ. މިކަން ޙާސިލު ކުރެވޭނީ އިތުރަށް ކުރިއަރައި، ޚަރަދުތައް މަދުކޮށް، އަދި ޚަރަދުތައް ކޮންޓްރޯލް ކުރެވިގެން ކަމަށް ވެސް އޭނާ ވިދާޅުވި އެވެ.

އެމެރިކާގެ ސަރުކާރު ހުއްޓުމަކަށް އައިސްފައިވާއިރު، ސަރުކާރު ހިންގުމަށް ބޭނުންވާ ބަޖެޓު ފާސް ކުރުމުގައި ރިޕަބްލިކަނުންނާއި، ޑިމޮކްރަޓުންނަށް ވަނީ ކާމިޔާބު ހޯދޭ ގޮތް ނުވެފަ އެވެ. އެކަމުގެ ސަބަބުން ސަރުކާރު ހުއްޓުމަކަށް އައިސްފައިވާއިރު، ސަރުކާރުގެ މުވައްޒަފުންނަށް މުސާރަ ދިނުމާއި، ހިންގުމުގައި ވަނީ ދަތިތަކާ ކުރިމަތިލާން ޖެހިފަ އެވެ.

އެމެރިކާގެ ސަރުކާރަށް އައި މި ހުއްޓުން ކިހާ ދުވަހަކަށް ދެމިގެން ދާނެކަން މިވަގުތު ސާފެއް ނުވެ އެވެ. ބައިޕާޓިސަން ޕޮލިސީ ސެންޓަރުގެ މައުލޫމާތު ތަކަށް ބަލާއިރު، 1980 ވަނަ އަހަރުން ފެށިގެން 14 ފަހަރެއްގެ މަތިން ސަރުކާރުގެ ހިންގުން ހުއްޓިފައިވެ އެވެ. އޭގެ ތެރެއިން ގިނަ ފަހަރު ސަރުކާރު ހުއްޓުމަކަށް އައިސްފައި ވަނީ ވަރަށް މަދު ދުވަސް ކޮޅަކަށެވެ.

އެމެރިކާގެ ތާރީޚުގައި އެންމެ ދިގު މުއްދަތަކަށް ސަރުކާރު ހުއްޓުމަކަަށް އައިސްފައި ވަނީ، 2018 ވަނަ އަހަރުގެ ފަހު ކޮޅާއި، 2019 ވަނަ އަހަރުގެ ކުރީ ކޮޅު އެވެ. އެއީ ގާތް ގަނޑަކަށް 34 ދުވަހުގެ މުއްދަތަކަށެވެ.