ގުރައިދޫ ފުޓުބޯޅަ މުބާރާތުގެ ފައިނަލަށް ވިންސިއާ ސްޕޯޓްސް އަދި އީވިލް ސްޕޯޓްސް ދަތުރުކޮށްފި

ކޮންމެ އަހަރެއްގެ އަލްހާ އީދާ ދިމާކޮށް ގުރައިދޫ އެންޑޯމަންޓް މޫވްމަންޓް (ޖެމް) އިން އިންތިޒާމު ކޮށްގެން ތ.ގުރައިދޫގައި ބާއްވަމުން އަންނަ ފުޓުބޯޅަ މުބާރާތުގެ ފައިނަލަށް ވިންސިއާ ސްޕޯޓްސް އަދި އީވިލް ސްޕޯޓްސް ކްލަބް ދަތުރުކޮށްފި އެވެ.

ރަށުގެ ޒުވާނުންގެ އެކުވެރިކަން އާލާކޮށް ގުޅުން ބަދަހި ކުރުމުގެ މަގްސަދުގައި ބާއްވާ މި މުބާރާތުގެ ފައިނަލަށް ވިންސިއާ ދަތުރުކުރީ ސެމީގައި ދީ ލައިވް ސްޕޯޓްސް ކްލަބާ ބައްދަލު ކޮށެވެ. މި މެޗު 1-5 ގެ ނަތީޖާއަކުން ވިންސިއާ ވަނީ ކާމިޔާބު ކޮށްފައެވެ.

ފާއިތުވެދިޔަ ހަތަރު އަހަރު މުބާރާތުގެ ޗެމްޕިއަންކަން ހޯދާފައިވާ އީވިލް ސްޕޯޓްސް ކްލަބް ފައިނަލަށް ދަތުރުކުރީ ސެމީގައި ދަކަދާ ސްޕޯޓްސްއާ ވާދަކޮށް 1-2 ގެ ނަތީޖާއިން މެޗު ކާމިޔާބު ކޮށްގެންނެވެ.

ދެ ގްރޫޕަކަށް ބަހާލައިގެން ކުރިޔަށްގެންދާ މި މުބާރާތުގައި ހަ ޓީމު ވާދަކުރެއެވެ. މުބާރާތުގައި ބައިވެރިވީ ދަކަނދާ ސްޕޯރޓްސް ކުލަބް، ލަޔަންސް ސްޕޯރޓްސް ކުލަބް، ދީ ލައިވް ސްޕޯރޓްސް ކުލަބް، އީވިލް ސްޕޯރޓްސް ކުލަބު، ވިންސިއާ ސްޕޯރޓްސް ކުލަބް އަދި އެލް އެގްޒިޓޯ ސްޕޯރޓްސް ކުލަބް އެވެ.

މުބާރާތުގެ ފައިނަލް މެޗު ބުދަ ދުވަހު ކުޅުމަށް ހަމަޖެހިފައިވާއިރު، ޗެމްޕިއަން ޓީމަށް 20،000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ. މުބާރާތުގެ ދެވަނަ އަށް ދާ ޓީމަކަށް 10،000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ.