ރައީސްގެ ކޮއްކޯފުޅުގެ ދާއިރާ ހިމެނޭހެން ތިން މައްސަލަ އެއް ދައުލަތުން އަނބުރާ ގެންގޮސްފި
ކުޑަކުދިންނަށް ޖިންސީ ގޯނާ ކުރިކަމުގެ ތިން މައްސަލަ އެއް ދައުލަތުން އަނބުރާ ގެންގޮސްފި
ފުލުހުންގެ މައި އިދާރާ، ޝަހީދު ހުސައިން އާދަމް ބިލްޑިން
ދައުލަތުން އަނބުރާ ކުޑަކުދިންނަށް ޖިންސީ ގޯނާ ކުރިކަމުގެ ދައުވާކޮށްފައިވާ ތިން މައްސަލަ އެއް ގެންގޮސްފި އެވެ.
މީގެ ތެރޭގައި ރައީސް ޑރ. މުހައްމު މުއިއްޒުގެ ކޮއްކޯފުޅު ފާތިމަތު ސައުދާ ރައްޔިތުންގެ މަޖިލީހުގެ ފ.ނިލަންދޫ ދާއިރާގެ މީހަކު ހިމެނެއެވެ.
ދައުލަތުން ބުނެފައިވާ ގޮތުގައި ދައުލަތުން އަނބުރާ ގެންގޮސްފައިވާ މައްސަލަތަކުގެ ތެރޭގައި އިތުބާރު ކުރެވޭ މަގާމެއްގައި ހުރެ ކުޑަކުއްޖަކަށް ޖިންސީ ގޯނާ ކުރުމުގެ ދައުވާކޮށްފައިވާ ދެ މައްސަލަ އެއް ހިމެނެއެވެ. މީގެ އިތުރުން އާއިލާގެ ކުޑަކުއްޖަކާ އެކު ޖިންސީ އަމަލެއް ހިންގާފައިވާ ކަމުގެ ދައުވާކޮށްފައިވާ މައްސަލަ އެއް ވެސް ހިމެނެއެވެ.
ދައުލަތުން ބުނެފައިވާ ގޮތުގައި އޭގެ ތެރެއިން ދެ މައްސަލަ އަކީ އަނިޔާ ލިބުނު ކުޑަކުދިންގެ އާއިލާތަކުން މައްސަލަ އިތުރަށް ކުރިއަށް ގެންދަން ބޭނުންނުވާ މައްސަލަތަކެވެ. އެކަން ދައުލަތުން ހައި ކޯޓަށް ފޮނުވި ސިޓީތަކުގައި ބުނެފައިވާ ކަމަށް ހައި ކޯޓުން ބުނެފައިވެއެވެ. އެހެންކަމުން، ދައުލަތުން އެދުނު ގޮތަށް ހައި ކޯޓުން މި މައްސަލަ ބާތިލްކޮށްފައިވެއެވެ.
މި މައްސަލަތަކުގައި ދަށު ކޯޓުން ކުށް ސާބިތު ވެފަ އެއް ނުވެއެވެ. ދައުލަތުން މި މައްސަލަ އިސްތިއުނާފް ކޮށްފައިވާ އިރު މި ހިނގާ އޮކްޓޯބަރ މަހު ދައުލަތުން އަނބުރާ ގެންގޮސްފައި ވަނީ އެ މައްސަލަތަކުގައި ހާދިސާ ހިނގިތާ އެތައް އަހަރު ފާއިތުވީ ފަހުންނެވެ. އަދި ހައި ކޯޓުން މައްސަލަ ނުނިމި ދިގުލާފައިވާ ކަމަށް ވެސް ބުނެފައިވެއެވެ.
