އަލްހާ އީދު ބަންދަށްފަހު ސަރުކާރުގެ އޮފިސްތައް ހުޅުވައިފި
5 ސެޕްޓެމްބަރު 2017 | އަންގާރަ 05:22އީދު ބަންދާއި ސްކޫލްތަކުގެ ޗުއްޓީއާއި ދިމާވެފައިވާތީ ގިނަ ބަޔަކު އަދިވެސް ތިބީ ޗުއްޓީގައި
ރައީސް އޮފީސް
މިއަހަރުގެ ހައްޖު ދުވަހާއި އަލްހާ އީދުގެ ބަންދަށްފަހު ސަރުކާރުގެ އޮފީސްތައް އަންގާރަ ދުވަހު ހުޅުވައިފި އެވެ.
މިދިޔަ ބުރާސްފަތި ދުވަހު ހައްޖު ދުވަހަށް ސަރުކާރު ބަންދު ކުރުމަށްފަހު، އަލްހާ އީދު މިއަހަރު ދިމާވެފައި ވަނީ ހަފްތާ ބަންދަށެވެ. އަލްހާ އީދުގެ ބަންދަށް ހަތަރު ދުވަހަށްފަހު، އަންގާރަ ދުވަހު ސަރުކާރުގެ އޮފީސްތައް ހުޅުވިނަމަވެސް މިދުވަސް ވަރަކީ ސްކޫލްތަކުގެ މެދު ޓާރމް ޗުއްޓީ ދުވަސްވަރު ކަމަށްވާތީ ގިނަ އަދަދެއްގެ ބަޔަކު ގެންދަނީ ރާއްޖޭ އެކިއެކި ރަށްރަށުގައާއި ރާއްޖެއިން ބޭރުގައި ޗުއްޓީ ހޭދަކުރަމުންނެވެ.
އަންގާރަ ދުވަހު ސަރުކާރުގެ އޮފީސްތައް ހުޅުވިނަމަވެސް ސްކޫލްތައް ހުޅުވުމަށް ހަމަޖެހިފައިވަނީ އަންނަ އާދިއްތަ ދުވަހު އެވެ.
ސްކޫލްތަކުގެ އެއް ހަފްތާގެ މިޗުއްޓީއަށްފަހު، މި ދިރާސީ އަހަރުގެ ފަހު ޓާރމްގެ ކިޔެވުން ފެށުނީ އެވެ.
މިއަހަރުގެ އީދު ޗުއްޓީ ދިމާވެފައިވަނީ ރާއްޖޭގެ ހުޅަނގު މޫސުމަށް ކަމަށްވާތީ، މުޅި ރާއްޖެއަށް ވިއްސާރަކޮށް، ބައެއް ރަށްރަށް މޫސުން ގޮސްވެފައިވެސް ވެއެވެ. އަދި ރާއްޖޭގެ ބައެއް ސަރަހައްދުތަކުން މޫސުމަށް ސަމާލުވެގެން ތިބުމަށްވެސް ކަމާބެހޭ ފަރާތްތަކުން އިލްތިމާސް ކޮށްފައި ވެސް ވެއެވެ.
