ސޮނިކް ވެޕަން ހަތިޔާރެއްގެ ގޮތުގައި މީގެ ކުރިން ބޭނުން ކުރި ކަމަށް ބުނެ އިހުސާން އިތުރުފުޅެއް ހައްދަވައިފި!
2023 ވަނަ އަހަރުގެ މެއި މަހު ސޮނިކް ވެޕަން ނުވަތަ ލޯންގް ރޭންޖް އެކޯސްޓިކް ޑިވައިސް ހަތިޔާރެއްގެ ގޮތުގައި ބޭނުންކޮށްފައެއް ނުވެ
މިނިސްޓަރު އިހުސާން
އިދިކޮޅު އެމްޑީޕީން އޮކްޓޯބަރު 3، ގައި ބޭއްވި މުޒާހަރާގެ ބައިވެރިންނާ ދެކޮޅަށް ފުލުހުން ބޭނުންކުރި ބާރުގަދަ އަޑު އިއްވާ "ސޮނިކް ވެޕަން" އެއް ކަމަށްވާ ލޯންގް ރޭންޖް އެކޯސްޓިކް ޑިވައިސް (އެލްރެޑް) ހަތިޔާރެއްގެ ގޮތުގައި ބޭނުން ކުރީ އަލަށް ނޫންކަމަށާއި އޮކްޓޫބަރު 3 ގައި ބޭނުން ކުރި މޮޑެލްގެ ސޮނިކް ވެޕަން ހަތިޔާރެއްގެ ގޮތުގައި އެންމެ ފުރަތަމަ ބޭނުންކުރަންފެށީ 2023 ވަނަ އަހަރުގެ މެއި މަހު ކަމަށް ވިދާޅުވެ ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ކަނޑައެޅިގެން އިތުރުފުޅެއް ހައްދަވައިފި އެވެ.
މިނިސްޓާރު އިހްސާން އެކްސް ގައި ކުރެއްވި ޕޯސްޓެއްގައި ވިދާޅުވީ، ލޯންގް-ރޭންޖް އެކޯސްޓިކް ޑިވައިސް (އެލްރެޑް) މޯލްޑިވްސް ޕޮލިސް ސަރވިސްއިން ފުރަތަމަ ބޭނުންކުރަން ފެށީ 2013 ގައި ކަމަށާއި ފުރަތަމަ މޮޑެލް (އެލްރެޑް 450 އެކްސްއެލް) ހަރުކުރެވިފައިވަނީ ޕޮލިސް ސްޕެޝަލް އޮޕަރޭޝަންސްއިން ބޭނުންކުރާ ވެހިކަލްއެއްގައި ކަމަށެވެ. އަދި އެލްރެޑް 100 އެކްސް މޮޑެލް 3 އޮކްޓޯބަރ 2025 ގައި ބޭނުން ކުރި ސޮނިކް ވެޕަން އެންމެ ފުރަތަމަ ބޭނުންކުރަން ފެށީ 2023 ވަނަ އަހަރުގެ މެއި މަހު ގައި ކަމަށެވެ. ނަމަވެސް 2023 ވަނަ އަހަރުގެ މެއި މަހު ސޮނިކް ވެޕަން ނުވަތަ ލޯންގް ރޭންޖް އެކޯސްޓިކް ޑިވައިސް ހަތިޔާރެއްގެ ގޮތުގައި ބޭނުންކޮށްފައެއް ނުވެއެވެ. އޭރު އެ ޑިވައިސް ބޭނުންކޮށްފައި ވަނީ މުޒާހަރާއިގެ ބައިވެރިންނާއި މުވާސަލާތުކުރުމަށެވެ.
އިހުސާން ވިދާޅުވީ، އެ ސިސްޓަމްތައް 100 އަށްވުރެ ގިނަ ގައުމުތަކުން ބޭނުންކުރާ ކަމަށެވެ. އަދި އެ ޑިވައިސް ބޭނުންކުރަނީ ޕަބްލިކް ސޭފްޓީ އޭޖެންސީތަކާއި، މިލިޓަރީތަކާއި، ލޯ އެންފޯސްމަންޓް އޭޖެންސީތަކުން ދުރު ދުރުން މުވާސަލާތުކުރުމަށާއި، ހަލަބޮލިކަން ކޮންޓްރޯލްކުރުމަށާއި، ބޯޑަރ ސެކިއުރިޓީއަށާއި، ކަނޑުގެ ސަލާމަތާއި، އަދި ކުއްލި ނުރައްކަލުގެ ހާލަތު ތަކުގައި ކަމަށެވެ.
މުޒާހަރާ ރޫޅާލުމަށް ފުލުހުން ބޭނުންކުރި ސޮނިކް ވެޕަން އިތުރަށް ބޭނުން ނުކުރަން ގޮވާލައި އޮންލައިން ޕެޓިޝަނެއްގައި ސޮއިކުރަން ވެސް ވަނީ ފަށައިފަ އެވެ. އެއީ މުޒާހަރާތައް ކޮންޓްރޯލް ކުރުމަށް ފުލުހުންނާއި ސިފައިން ބޭނުންކުރާ ނޮން-ލީތަލް ހަތިޔާރެކެވެ. އެ ހަތިޔާރު ބޭނުންކުރުމުގެ ސަބަބުން މުޒާހަރާގެ ބައިވެރިންނާއި މުޒާހަރާކުރި ސަރަހައްދުގެ ގެތަކުގައި ދިރިއުޅޭ އާއިލާތަކާއި ކުޑަކުދިންނަށް އޭގެ އަސަރު ކުރި ކަމަށް ވެސް ޕެޓިޝަންގައި ބުނެފައިވެ އެވެ.
ސޮނިކް ވެޕަންއަކީ ލޯންގު ރޭންޖް އެކޮސްޓިކް ޑިވައިޒް ނުވަތަ އެލްއާރުއޭޑީ ބޭނުންކޮށްގެން އެއް ރިދަމަކަށް އުފައްދާ ގަދަ އަޑެކެވެ.
މި އާލާތަކީ މާ ކައިރީގައި ބަހައްޓައިގެން ބޭނުންކޮށްފި ނަމަ ސިއްހަތަށް ވަރަށް ބޮޑަށް ގެއްލުން ލިބޭނެ އެއްޗެކެވެ. ރޭގައި ފުލުހުން މި އާލާތް ބޭނުންކުރީ އާންމުންނާއި ފުލުހުންނާ ދެމެދުގައި ޝީލްޑް ޖަހައިފައި ހުރި ހިސާބުގައި ތިބެގެންނެވެ. މީގެން އިވޭ އަޑުގެ ސަބަބުން ކަންފަތަށް ވަރަށް ބޮޑަށް ތަދުވެ، ދާއިމަށް ބީރުވުމުގެ ބިރު ވެސް އޮވެ އެވެ.
ސޮނިކް ވެޕަން ބޭނުންކުރި މައްސަލައިގައި އާންމުން ފާޑުކިޔަން ފެށުމުން އެކަން ދިފާއުކޮށް ފުލުހުން ވަނީ ނޫސް ބަޔާނެއް ނެރެފައެވެ. ފުލުހުން ނެރުނު ބަޔާނުގައި ބުނީ އެއްވުން ހުއްޓުވުމުގައި ފުލުހުން ބޭނުންކޮށްފައިވަނީ ފުލުހުންގެ ހިދުމަތުގެ ގާނޫނުގެ ދަށުން ހަދާފައިވާ، ހަތިޔާރު ގެންގުޅުމާއި ބޭނުންކުރުމުގެ ގަވާއިދާއި ފުލުހުންނަށް ލިބިދީފައިވާ ބާރާއި އިހުތިޔާރުގެ ބޭނުންކުރުމުގައި އަމަލުކުރާނެ ގޮތުގެ ގަވާއިދުގައި ހުއްދަކޮށްފައިވާ ބާރުތައް ކަމަށެވެ.
