އެންމެން ނިކުމެ މިކަން ހަމަ މަގަށް އަޅުވަން ވެއްޖެ، އަޅުގަނޑު ވެސް ނިކުންނާނަން: ރައީސް އިބޫ
ރައީސް އިބޫ ވިދާޅުވީ، ގަދަވެ ސަލާމަތު ހުރެއްޖެ ނަމަ، ހުކުރު ދުވަހު އޮންނަ އެއްވުމުގައި އެމަނިކުފާނު ބައިވެރިވެ ވަޑައިގަންނަވާނެ ކަމަށް
ކުރީގެ ރައީސް އިބްރާހީމް މުޙައްމަދު ޞާލިޙު
އިދިކޮޅު މައި ޕާޓީ، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ހުކުރު ދުވަހު ބާއްވާ ލޫޓުވައިފި އެއްވުމުގައި އެމަނިކުފާނު ބައިވެރިވެ ވަޑައިގަންނަވާނެ ކަމަށާއި، ކަންބޮޑުވުންތައް ހުރި އެންމެން ވެސް އެއްވުމުގައި ބައިވެރުވުމަށް އެދޭ ކަމަށް، ކުރީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެ އެވެ.
ބުރާސްފަތި ދުވަހު ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ރައީސް އިބޫ ވިދާޅުވީ، ގަދަވެ ސަލާމަތު ހުރެއްޖެ ނަމަ، ހުކުރު ދުވަހު އޮންނަ އެއްވުމުގައި އެމަނިކުފާނު ބައިވެރިވެ ވަޑައިގަންނަވާނެ ކަމަށެވެ.
މީގެ އިތުރުން ކަންބޮޑުވުންތައް ހުރި ހުރިހާ ބޭފުޅުން ވެސް ވަޑައިގެން، އެއްވުމުގައި އެ ޝުއޫރުތައް ފާޅު ކުރުމަށް އެދިވަޑައިގަންނަވާ ކަމަށް ރައީސް އިބޫ ވިދާޅުވި އެވެ. އެމްޑީޕީ އިން ކުރަމުން އަންނަ މަސައްކަތުން މިހާރު ވެސް ސަރުކާރަށް އަޑު އިވިއްޖެ ކަަމަށާއި، އަދިވެސް ސަރުކާރު ޒިންމާދާރު ކުރުމަށް ކުރެވެން އޮތް ކަމަކީ ޤާނޫނު އަސާސީގެ ހަތަރު ވަނަ މާއްދާގައި ބުނާ ގޮތަށް ކަން ކުރުން ކަަމަށް ރައީސް އިބޫ ވިދާޅުވި އެވެ.
ހަމަ އެހެންމެ ޤާނޫނު އަސާސީގައި އެ ބުނާ ބާރު އަބަދު ވެސް އޮންނާނީ ރައްޔިތުންގެ އަތް މަތީގައި ކަމަށާއި، މިހާރު މިއީ އެ ބާރު ރައްޔިތުންގެ އަތް މައްޗަށް ނަގަން ޖެހޭ ވަގުތު ކަމަށް ޤަބޫލު ކުރައްވާ ކަމަށް ރައީސް އިބޫ ވަނީ ވިދާޅުވެފަ އެވެ. އަދި ސިޔާސީ ކަންތައްތަކަކީ ހަމައެކަނި ސިޔާސީ މީހުންގެ އަތް މައްޗަށް ދޫކޮށްލައިގެން ތިބޭ ވަރުގެ ކަމެއް ނޫން ކަމަށް ވެސް ރައީސް އިބޫ ވިދާޅުވި އެވެ. ރައީސް އިބޫ ވިދާޅުވީ އެންމެން ނިކުމެ މިއަދު މި ޤައުމު ހަމަ މަގަށް އަޅުވަން ޖެހޭ ކަމަށެވެ.
އިދާރަ ކުރެއްވިއްޔާ އަޅުގަނޑު ސަލާމަތުން ހުރިއްޔާ އަޅުގަނޑު ބައިވެރި ވާނަން. އަޅުގަނޑު އެދެން އެމްޑީޕީގެ އަދި މި ކަންބޮޑުވުން އޮތް ހުރިހާ ބޭފުޅުން ވަޑައިގެން އެ ޝުއޫރުތައް ފާޅުކޮށް ސަރުކާރަށް އެ އަޑު އިއްވަން. މިހާރު ވެސް އިވެމުން އެބަ ދޭ މި ކުރެވުނު މަސައްކަތުން. އެހެންވީމާ އަދި ވެސް އަދި ވެސް، ސަރުކާރު ޒިންމާދާރު ކުރުމަށްޓަކައި، ޖަވާބުދާރީ ކުރުމަށްޓަކައި މިއަދު ކުރެވެން އޮތް ކަމަކީ މިހާރު އަޅުގަނޑު ދެކޭ ގޮތުގައި ޤާނޫނު އަސާސީގެ ހަތަރު ވަނަ މާއްދާގައި އެ ބުނާ ގޮތަށް ރައްޔިތުންގެ ބާރު ފެށިގެން އަންނަނީ ރައްޔިތުންގެ ފަރާތުން ކަމާއި، އެ ބާރު އަބަދު ވެސް ދެމި އޮންނާނީ ރައްޔިތުންގެ އަތް މަތީގައި ކަމަށް ވާތީ އެ ބާރު މިވަގުތު ރައްޔިތުންގެ އަތް މައްޗަށް ނަގަން ޖެހިއްޖެ ވަގުތު ޖެހިއްޖެ ކަމަށް އަޅުގަނޑު ޤަބޫލު ކުރަނީ. ސިޔާސީ ކަންތައްތަކަކީ ހަމަ އެކަނި ސިޔާސީ މީހުންގެ އަތް މައްޗަށް ދޫކޮށްލައިގެން ތިބޭ ވަރަށް ވުރެ މިއަދު މި ޤައުމުގެ ޙާލަތު ނާޒުކު ވެއްޖެ. އެންމެން ނިކުންނަން ޖެހިއްޖެ. އެންމެން ނިކުމެ މިކަން ހަމަ މަގަށް އަޅުވަން އެބަ ޖެހޭ.ކުރީގެ ރައީސް އިބްރާހީމް މުޙައްމަދު ޞާލިޙު
ސަރުކާރުން ރައްޔިތުންނަށް ދެމުން އަންނަ ޚިދުމަތްތައް ހުއްޓި، ތަރައްޤީގެ މަޝްރޫއުތައް ހުއްޓި، ރައްޔިތުންގެ އަސާސީ ހައްޤުތައް ނިގުޅައިގެންފައިވާތީ އެކަމާ ދެކޮޅަށް އަޑު އުފުލުމަށް ހުކުރު ދުވަހުގެ ރޭ އެމްޑީޕީ އިން އެއްވުމެއް ބާއްވަން ވަނީ ނިންމައިފަ އެވެ.
އެ އެއްވުމުގައި ވީހާ ވެސް ގިނަ ރައްޔިތުން ބައިވެރިވެ، ސަރުކާރަށް އަޑު އިއްވުމަށް އެމްޑީޕީ އިން އަންނަނީ ގޮވާލަމުންނެވެ.
