ސަރުކާރެއް ބޭނުންކޮށްގެން ކޮރަޕްޝަނާއި ވައްކަމުގެ އަމަލުތައް ހިންގަވާ ބޭފުޅަކީ މުއިއްޒު: އާޒިމް

ސަރުކާރެއް ބޭނުންކޮށްގެން ކޮރަޕްޝަނާއި ވައްކަމުގެ އަމަލުތައް ހިންގަވާ ބޭފުޅަކީ ރައީސް ޑރ.މުހައްމަދު މުއިއްޒު ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ ކުރީގެ މެމްބަރު އަލީ އާޒިމް ވިދާޅުވެއްޖެއެވެ.

އޭނާ އެފަދައިން ވިދާޅުވީ އެންސްޕާގެ ފައިސާއިން އެމްއެމްޓީވީ އުފެއްދިކަމުގެ ތުހުމަތުކުރެވޭތީ އަވަސް މައްސަލައެއްގެ ގޮތުގައި އެކަން ތަހުގީގު ކުރުމަށް އޭސީސީ އަށް މައްސަލަ ހުށަހެޅުމާއި ގުޅޭ ގޮތުން ނޫސްވެރިންނަށް މައުލޫމާތުދެއްވަމުންނެވެ.

މިއަދު މިނިވަން މުއައްސަސާތައް މިނިވަން ނޫންކަމަށް ފާހަގަކުރައްވާ އާޒިމް ވިދާޅުވީ އަބަދު ވެސް ފެންނަނީ ނިމޭ ސަރުކާރެއްގެ ނުވަތަ ބާރު ނެތް ބައެއްގެ މައްސަލަތައް ނަގައިގެން މިނިވަން މުއައްސަސާތަކުން އެ މައްސަލަތައް ކުރިއަށް ގެންދާ މަންޒަރު ކަމަށެވެ.

" މުއިއްޒު ވަކިން ޚާއްސަކޮށް ވަޒީރުކަމުގައި އާއި މޭޔަރުކަމުގައި ހުންނެވި އިރު ކޮށްފައި ހުރި ވައްކަންތައް އިންތިހާ އަށް އެބަ ހުރި. އެކަންކަން މިއަދު މުއައްސަސާތަކުން ވެސް މިނިސްޓްރީން ވެސް ސިޓީ ކައުންސިލުން ވެސް ބަލާފައި ހުށަހަޅަން ޖެހޭ ފަރާތްތަކަށް ހުށަހެޅުމަކީ އެންމެ މުހިންމު ކަންތައް." އާޒިމް ވިދާޅުވިއެވެ.

އެކަމާއި ގުޅޭ ގޮތުން އިތުރަށް ވާހަކަދައްކަވަމުން އާޒިމް ވިދާޅުވީ ސިޓީ ކައުންސިލްގައި، މޭޔަރަކަށް ރައީސް މުއިއްޒު ހުންނެވި އިރު ވެސް ވަރަށް ބައިވަރު ވައްކަންތައް ހިންގާފައިވާ ކަމަށެވެ. އަދި އެކަންކަން ބެލެން ޖެހޭ ކަމަށް އާޒިމް ވިދާޅުވިއެވެ.

ރައީސް މުއިއްޒު އަށް ވުރެ ބޮޑަށް ކޮރަޕްޝަން ހިންގާ، ވައްކަން ކޮށްފައިވާ އެއްވެސް މީހެއް ދިވެހިރާއްޖޭގެ ރައީސުލްޖުމްހޫރިއްޔާ އަކަށް ވެސް ވަޒީރަކަށް ވެސް ނުހުންނާނެކަން ޔަޤީންވާ ކަމަށް އާޒިމް ވަނީ ވިދާޅުވެފައެވެ.

އަމިއްލަ ފަރާތްތަކުންނާއި އިދިކޮޅު ޕާޓީ އެމްޑީޕީ ހިމެނޭހެން ސަރުކާރުގެ ކޮރަޕްޝަން އާއި ގުޅުން ހުރި ގިނަ މައްސަލަތަކެއް އޭސީސީ އަށް ހުށަހެޅި ނަމަވެސް އެ މައްސަލަތައް ނުބަލާ ކަމަށް ބުނެ އާއްމުން ދަނީ އެކަމާއި މެދު ކަންބޮޑުވުން ފާޅުކުރަމުންނެވެ.