ދެ ދައުލަތުގެ ހައްލު ހޯދުމަށް އދ އިން ތާއީދު ކުރާ ޕްލޭންގައި ޕެލެސްޓައިން އޮތޯރިޓީ އަށް އޮންނާނީ ކޮން ދައުރެއް؟

އދ. އިން ތާއީދު ކޮށްފައިވާ އިސްރާއީލާއި ފަލަސްތީނުގެ ދެމެދު ދެ ދައުލަތުގެ ހައްލު ހޯދުމަށް ކުރިއަށް ގެންދިއުމަށް އެކުލަވާލެވިފައިވާ ޕްލޭންގައި މަހުމޫދު އައްބާސް ވެރިއަކަށް ހުންނަވާ ޕެލަސްޓައިން އޮތޯރިޓީއަށް އޮތް ޒިންމާތަކާއި ދައުރު ބަޔާންކޮށްފައިވެއެވެ.

މި 7 ޞަފްޙާގެ ޕްލޭނަކީ ޖުލައި މަހު އދ. ގައި ބޭއްވުނު ބައިނަލްއަޤްވާމީ ކޮންފަރެންސެއްގެ ނަތީޖާއެކެވެ. މި ކޮންފަރެންސް ބޭއްވީ ސައޫދީ އަރަބިއްޔާ އާއި ފަރަންސޭސިވިލާތުން އިސް ނަގައިގެންނެވެ. އެމެރިކާ އާއި އިސްރާއީލުން މި ކޮންފަރެންސް ބައިކޮޓްކުރިއެވެ.

އދ. އިން ތާއީދުކުރާ މި އިނީޝިއޭޓިވް އާ ބެހޭގޮތުން އެމެރިކާގެ ރައީސް ޑޮނަލްޑް ޓްރަމްޕް އާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާ ދެމެދު ހޯމަ ދުވަހު ބޭއްވޭ ބައްދަލުވުމުގައި މަޝްވަރާ ކުރާނެ ކަމަކަށް ނުބެލެވެއެވެ.

އޭގެ ބަދަލުގައި، މި ދެ ފަރާތުން މަޝްވަރާ ކުރާނީ ހަނގުރާމަ ނިންމުމަށާއި، ބަންދުގައި ތިބި މީހުން ދޫކޮށްލުމަށާއި، އިސްރާއީލާއި ފަލަސްތީނު ސުލްޙަވެރިކަމާއެކު އެކުގައި ދެމި އޮތުމާ ބެހޭގޮތުން މަޝްވަރާކުރުމަށް މަގުފަހިކުރުމަށް އަމާޒުކޮށް ވޭތުވެދިޔަ ހަފްތާގައި އަރަބި އަދި މުސްލިމު ޤައުމުތަކަށް ވޮޝިންގްޓަނުން ހުށަހެޅި 21 ނުކުތާގެ ސުލްޙައިގެ ޕްލޭނަކާ ބެހޭގޮތުންނެވެ.

އދ. ގެ ޖެނެރަލް އެސެމްބްލީގެ 193 މެންބަރުންގެ ތެރެއިން ގިނަ މެންބަރުން ސެޕްޓެމްބަރު 12 ގައި ދެ ދައުލަތުގެ ޕްލޭނަށް ތާއީދުކުރާ ޤަރާރެއް ފާސްކުރިއެވެ. މި ޤަރާރަށް 142 ވޯޓު ލިބުނުއިރު، 10 ވޯޓު ލިބުނީ އިދިކޮޅަށެވެ. އަދި 12 ޤައުމުން ވޯޓު ދިނުމުން ދުރުހެލިވިއެވެ.

އދ. އިން ތާއީދުކުރާ ޕްލޭނުގައި ބަޔާންކޮށްފައި ވަނީ "ޣައްޒާގައި ހިނގަމުންދާ ހަނގުރާމަ މިހާރުން މިހާރަށް ނިންމަންޖެހޭ" ކަމަށާއި، އެމެރިކާ އާއި ގަތަރު އަދި މިޞްރުގެ މެދުވެރިވެގެން ކުރަމުން ގެންދާ މަސައްކަތްތަކަށް ތާއީދުކުރާ ކަމަށެވެ.

ޕެލަސްޓައިން އޮތޯރިޓީގެ ދައުރާ ޒިންމާ ތަކާ ބެހޭގޮތުން މި ޕްލޭނުގައި ބަޔާން ކޮށްފައިވަނީ:

1. ޣައްޒާގައި ހަނގުރާމަ ހުއްޓުމަށްފަހު، ވަގުތީ އިދާރީ ކޮމިޓީއެއް ވަގުތުން އުފައްދަންވާނެއެވެ. މި ކޮމިޓީން ޣައްޒާގައި މަސައްކަތްކުރާނީ ޕެލަސްޓައިން އޮތޯރިޓީ ގެ ދަށުންނެވެ.
2. ޕެލަސްޓައިން އޮތޯރިޓީގެ ދަޢުވަތަކަށް އަދި އދ. ގެ ސަލާމަތީ މަޖިލީހުގެ ތާއީދާއެކު، އެކަށީގެންވާ ސަރަޙައްދީ އަދި ބައިނަލްއަޤްވާމީ އެހީތެރިކަމާއެކު ވަގުތީ ބައިނަލްއަޤްވާމީ މިޝަނެއް ފޮނުވުމަށް މި ޕްލޭނުން ތާއީދުކުރެއެވެ.
3. މި މިޝަނުގެ މަސައްކަތް ބަދަލުވަމުންދާނީ އެ ވަގުތެއްގެ ހާލަތާ އެއްގޮތަށެވެ. މި މިޝަނުން ފަލަސްތީނުގެ އާންމު ރައްޔިތުންނަށް ރައްކާތެރިކަން ފޯރުކޮށްދީ، އެތެރޭގެ ސަލާމަތީ ޒިންމާތައް ޕެލަސްޓައިން އޮތޯރިޓީއަށް ބަދަލުކުރުމަށް އެހީތެރިވެދޭނެއެވެ. އަދި ފަލަސްތީނު ދައުލަތާއި އެ ދައުލަތުގެ ސަލާމަތީ ބާރުތަކުގެ ޤާބިލުކަން އިތުރުކުރުމަށް އެހީތެރިވެދީ، އިސްރާއީލާއި ފަލަސްތީނަށް ސަލާމަތީ ގެރެންޓީތައް ފޯރުކޮށްދޭނެއެވެ. މީގެ ތެރޭގައި ހިމެނެނީ ހަނގުރާމަ ހުއްޓުވުމާއި މުސްތަޤްބަލުގައި ވެވޭ ސުލްޙައިގެ އެއްބަސްވުމެއް މޮނިޓަރކުރުމެވެ. މިހުރިހާ ކަމެއްވެސް ކުރާނީ އެ ދެ ފަރާތުގެ ސިޔާދަތަށް ފުރިހަމައަށް އިޙްތިރާމް ކުރުމާ އެކުގައެވެ.
4. މި ޕްލޭނުން ގައި ގޮވާލާފައިވަނީ ޕެލަސްޓައިން އޮތޯރިޓީން އިތުބާރު ހުރި އިޞްލާޙީ އެޖެންޑާއެއް ތަންފީޒުކުރުމުގެ މަސައްކަތް ކުރިއަށް ގެންދިއުމުގެ މުހިންމުކަމެވެ. މިކަމަށް ބައިނަލްއަޤްވާމީ އެހީތެރިކަން ލިބެންވާނެއެވެ. ޚާއްޞަކޮށް ޔޫރަޕިއަން ޔޫނިއަން އަދި އަރަބި ލީގުގެ އެހީތެރިކަން ލިބެންވާނެއެވެ. މި އިޞްލާޙީ އެޖެންޑާގައި އަމާޒުކުރަންވާނީ ހެޔޮ ވެރިކަމާއި، ހާމަކަން ބޮޑުކުރުމާއި، މާލީ ދެމެހެއްޓެނިވިކަމާއި، ރުޅިވެރިކަމާއި ނަފްރަތުގެ ވާހަކަތަކާ ދެކޮޅަށް މަސައްކަތްކުރުމާއި، ޚިދުމަތްތައް ފޯރުކޮށްދިނުމާއި، ވިޔަފާރީގެ މާޙައުލާއި ތަރައްޤީއަށެވެ.
5. ފަލަސްތީނުގެ ރައީސް މަޙްމޫދު އައްބާސް އަހަރެއްގެ ތެރޭގައި އޮކިއުޕައިޑް ފަލަސްތީނު ޓެރިޓަރީގައި، އޭގެ ތެރޭގައި އިރުމަތީ ޖެރޫސަލަމްވްވެސް ހިމެނޭގޮތަށް، ޑިމޮކްރޮކްރެޓިކް އަދި ހާމަކަން ބޮޑު އާންމު އަދި ރިޔާސީ އިންތިޚާބުތަކެއް ބޭއްވުމަށް ވެފައިވާ ވަޢުދަށް މި ޕްލޭނުން މަރުޙަބާ ކިޔާފައިވެއެވެ. މި އިންތިޚާބުތައް ބާއްވާނީ ބައިނަލްއަޤްވާމީ މުޖުތަމައުގެ ބެލުމުގެ ދަށުންނެވެ. މި އިންތިޚާބުތަކުން ފަލަސްތީނު ލިބަރޭޝަން އޯގަނައިޒޭޝަންގެ ސިޔާސީ ޕްލެޓްފޯމަށާއި، އެ ޖަމާއަތުން ވެފައިވާ ބައިނަލްއަޤްވާމީ ވަޢުދުތަކަށާއި، ކަމާގުޅޭ އދ. ގެ ޤަރާރުތަކަށް އިޙްތިރާމްކުރާ ފަލަސްތީނުގެ ފަރާތްތަކުގެ މެދުގައި ޑިމޮކްރެޓިކް ވާދަވެރިކަމަށް ފުރުޞަތު ދޭނެއެވެ. މި އިންތިޚާބުތަކުން އާ ޖީލެއްގެ އިންތިޚާބުކުރެވޭ ބަޔަކަށް ޒިންމާ ނެގުމުގެ ފުރުޞަތު ލިބިގެންދާނެއެވެ. ޕެލަސްޓައިން އޮތޯރިޓީގެ ދަޢުވަތަކަށް، ޔޫރަޕިއަން ޔޫނިއަނުން އިންތިޚާބީ މަސައްކަތްތަކަށް ދެމެހެއްޓެނިވި އެހީތެރިކަން ފޯރުކޮށްދިނުމަށް ވަނީ ޒިންމާވެފައެވެ.
6. އދ. އިން ތާއީދުކުރާ މި ޕްލޭނުގައި ފަލަސްތީނު އޮތޯރިޓީއަށް ސިޔާސީ އަދި މާލީ އެހީތެރިކަން ހޯދައިދިނުމަށް ހުށަހަޅާފައިވެއެވެ. މިގޮތުން އޮތޯރިޓީން އިޞްލާޙުތައް ކުރިއަށް ގެންދިއުމަށާއި، މުއައްސަސާތަކުގެ ޤާބިލުކަން އިތުރުކުރުމަށާއި، އިޞްލާޙީ އެޖެންޑާ ތަންފީޒު ކުރުމަށާއި، އޮކިއުޕައިޑް ފަލަސްތީނު ޓެރިޓަރީ ގައި ޒިންމާތައް އަދާކުރުމަށް އެހީތެރިވެދޭނެއެވެ. މި ޕްލޭނުގައި އިތުރު ޤައުމުތަކުން މާލީ އެހީތެރިކަން އިތުރުކުރުމަށް ވަޢުދުވުމަށް ގޮވާލާފައިވެއެވެ. އަދި ވީހާވެސް އަވަހަކަށް ބައިނަލްއަޤްވާމީ ހިލޭ އެހީ ދޭ ފަރާތްތަކުގެ ބައްދަލުވުމެއް ބޭއްވުމަށް ގޮވާލާފައިވެއެވެ.