ފަލަސްތީނު ރައްޔިތުންނަށް ތާއީދު ކޮށް ނިއުޔޯކު ގައި ބޭއްވި މުޒާހަރާ އެއްގައި ކޮލަމްބިއާގެ ރައީސް ބައިވެރިވުމުން އެމެރިކާ އިން އޭނާގެ ވިސާ ކެންސަލް ކޮށްފި

އދ. ގެ އާންމު މަޖިލިހުގެ ބައްދަލުވުމަށް ކޮލަމްބިއާ ގެ ރައީސް އެމެރިކާ އަށް ކުރެއްވި ދަތުރުފުޅުގައި ފަލަސްތީނު ރައްޔިތުންނާ އެއްބައިވަންތަކަން ހާމަ ކުރުމަށް ބޭއްވި މުޒާހަރާ އެއްގައި ބައިވެރިވެވަޑައިގަތުމުން އެމެރިކާ އިން އޭނާގެ ވިސާ ކެންސަލް ކޮށްފިއެވެ.

ކޮލޮމްބިއާގެ ރައީސް ގުސްޓާވޯ ޕެޓްރޯ ހޮނިހިރު ދުވަހު ވަނީ އޭނާގެ ވިސާ ބާތިލުކުރުމަށް އެމެރިކާ އިން ނިންމި ނިންމުމާ މެދު ފާޑު ވިދާޅުވެ، އަދި ޣައްޒާ ގައި އިސްރާއީލުން ހިންގަމުންދާ ހަނގުރާމަ އާ މެދު އޭނާ ފާޅުކުރެއްވި ޚިޔާލުތަކާ ގުޅިގެން އެމެރިކާ އިން އެޅި ފިޔަވަޅުގެ ސަބަބުން އެމެރިކާ ބައިނަލްއަޤްވާމީ ޤާނޫނާ ޚިލާފުވެފައިވާ ކަމަށް ތުހުމަތު ކުރައްވާފައެވެ.

ހުކުރު ދުވަހު ޕެޓްރޯ ނިއުޔޯކްގެ މަގުތަކަށް ނުކުމެވަޑައިގެން ފަލަސްތީނަށް ތާއީދުކޮށް ބޭއްވި މުޒާހަރާއެއްގައި ބައިވެރިވެ، އަދި އެމެރިކާގެ ރައީސް ޑޮނަލްޑް ޓްރަމްޕްގެ އަމުރުތަކަށް ނުކިޔަމަންތެރިވުމަށް އެމެރިކާގެ ސިފައިންނަށް ގޮވާލުމާ ގުޅިގެން އޭނާގެ ވިސާ ބާޠިލުކުރާނެ ކަމަށް އެމެރިކާ އިން ހަމަ އެ ދުވަހު ބުނެފައިވެއެވެ.

ކޮލަމްބިއާގެ ރައީސް ވިދާޅުވީ، ވިސާ ކެންސަލް ކުރިޔަސް އެކަމާ ކަންބޮޑު ނުވާ ކަމަށެވެ.

"އެމެރިކާ އަށް ދަތުރުކުރުމުގެ ވިސާ މިހާރަކު ނެތް. އަޅުގަނޑު އެކަމާ ކަންބޮޑެއް ނުވޭ. އަޅުގަނޑަށް ވިސާއެއް ބޭނުމެއް ނުވޭ... އެއީ އަޅުގަނޑަކީ ހަމައެކަނި ކޮލޮމްބިއާގެ ރައްޔިތެއް ނޫން، ޔޫރަޕްގެ ރައްޔިތެއް ވެސް މެ، އަދި އަޅުގަނޑު ޙަޤީޤަތުގައި ދެކެނީ އަޅުގަނޑަކީ ދުނިޔޭގެ މިނިވަން މީހެއްގެ ގޮތުގައި،" ޕެޓްރޯ ސޯޝަލް މީޑިއާގައި ބުނެފައެވެ.

އޭނާ އެކްސް ގައި ކުރެއްވި ޕޯސްޓު ގައި އިތުރަށް ވިދާޅުވީ، ނަސްލު ފޮހެލުމުގެ ޢަމަލުތަކާ މެދު ފާޑުކިޔުމުގެ ސަބަބުން ވިސާ ބާތިލު ކުރުމުން ދައްކުވައިދެނީ އެމެރިކާ އިން މިހާރު ބައިނަލްއަޤްވާމީ ޤާނޫނަށް އިޙްތިރާމް ނުކުރާކަން ކަމުގައެވެ.

އދ. ގެ 80 ވަނަ އާންމު މަޖިލީހުގައި ޕެޓްރޯ ދެއްކެވި ވާހަކަފުޅުގައި ފަލަސްތީނު ރައްޔިތުން ދިފާއު ކުރުމަށް ގައުމުތަކުން ގުޅިގެން ޚާއްސަ އަސްކަރީ ބާރެއް އުފެއްދުމަށް ގޮވާލެއްވިއެވެ.

ޣައްޒާ ގައި އިސްރާއީލުން ހިންގަމުންދާ ގަތުލުއާންމު އާ ދެކޮޅު ހެދުމުގެ ގޮތުން ކޮލަމްބިއާ އިން ވަނީ އިސްރާއީލާ އެކު އޮންނަ ގުޅުން ވެސް ކަނޑާލާފައެވެ.

އިސްރާއީލުން ޣައްޒާ ގައި ހިންގާ ޢަމަލުތަކަކީ ލާއިންސާނީ ނަސްނު ނައްތާލުމުގެ އަމަލުތަކެއް ކަމަށް މުޅި ދުނިޔޭން ބުނަމުން ގެންދާއިރު ވެސް އިސްރާއީލުން އެ ތުހުމަތުތައް ތަކުރާރުކޮށް ދޮގުކޮށް، އެއީ އަމިއްލަ ދިފާޢުގައި ކުރާ ކަމެއް ކަމަށް ބުނެފައިވެއެވެ.

ޣައްޒާގެ ރަސްމީ އިދާރާތަކުން ބުނާ ގޮތުގައި އިސްރާއީލުން ދެމުންދާ ހަމަލާތަކުގައި 65,000 މީހުން މަރުވެފައިވާ އިރު، އެ ސަރަޙައްދުގެ މުޅި އާބާދީ ވަނީ އެކި ފަހަރު މަތިން އެކި ތަންތަނަށް ހިޖުރަކުރަން މަޖުބޫރު ކޮށްފައެވެ.