ޓްރަމްޕް ޣައްޒާ އަށް ހުށަހަޅާ 21 ނުކުތާގެ ސުލްޙައިގެ ޕްލޭނުގެ ތަފްސީލުތައް ހާމަވެއްޖެ

ޣައްޒާ ގައި ހިނގަމުންދާ ހަނގުރާމަ ނިންމުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅާ 21 ނުކުތާގެ ޕްލޭނުގެ ތަފްސީލުތައް ހާމަ ވެއްޖެއެވެ.

މެދުއިރުމަތީގެ އަލް އަރަބިއްޔާ އިން ރިޕޯޓު ކޮށްފައިވާ ގޮތުގައި އެ މީޑިއާ އަށް ޕްލޭނުގެ ކޮޕީއެއް ވަނީ ލިބިފައެވެ.

މި ހުށަހެޅުން ޓްރަމްޕް ނިއު ޔޯކުގައި ޢަރަބި އަދި މުސްލިމު ޤައުމުތަކުގެ އިސް އޮފިޝަލުންނާ އެކު މިދިޔަ ހަފްތާ ގައި ބޭއްވި ބައްދަލުވުންތަކުގައި މަޝްވަރާ ކުރެވުނެވެ. މި މަޝްވަރާތަކާ އަހުލުވެރި ޑިޕްލޮމެޓުން ބުނާ ގޮތުގައި މި ޕްލޭނުގައި ވަގުތުން ހަނގުރާމަ ހުއްޓާލުމާއި، ބަންދުގައި ތިބި އެންމެން ދޫކޮށްލޮށްލުމާއި، ޣައްޒާގެ ބާރުތައް މަރުހަލާތަކަކަށް ބަހާލައިގެން ބަދަލުކުރުން ހިމެނެއެވެ.

އޮފިޝަލުން ބުނާ ގޮތުގައި މި ޕްލޭނުގައި އިންސާނީ އެހީ އާއި، ސިޔާސީ ފަސޭހަތަކާއި، ސަލާމަތީ ގެރެންޓީތައް ތަރުތީބުކޮށްފައިވާ ގޮތުން މި ޕްލޭން ބަލައިނުގަތުމަކީ އުނދަގޫ ކަމަކަށް ވާނެއެވެ.

ޕްލޭނުގެ މައިގަނޑު ފުރަތަމަ ފިޔަވަޅުތަކުގެ ތެރޭގައި ހިމެނެނީ:

• ޣައްޒާގައި ވަގުތުން ހަނގުރާމަ ހުއްޓާލުން.
• އެއްވެސް ޝަރުތަކާ ނުލައި ހަމާސް އިން ބަންދު ކޮށްފައި ތިބި ހުރިހާ ރަހީނުން ދޫކޮށްލުން.
• އެތައް ހާސް ފަލަސްޠީނު ގައިދީން ދޫކޮށްލުން، އޭގެ ތެރޭގައި ހަރުކަށި އަދަބު ތަންފީޒު ކުރަމުންދާ 100 އާއި 200 އާ ދެމެދުގެ އަދަދެއްގެ މީހުން ހިމެނޭ.
• ބައިނަލްއަޤްވާމީ ޖަމްޢިއްޔާ ތަކާއި އ.ދ. އިން ފޯރުކޮށްދޭ އިންސާނީ އެހީ ހުރަހެއްނެތި ޣައްޒާ އަށް ވަނުމަށް ހުއްދަދިނުން.

މީގެ އިތުރުން، މި ޕްލޭނުގައި ޣައްޒާ ހިއުމެނިޓޭރިއަން ފައުންޑޭޝަން ބަންދުކުރުމަށާއި، ވަކި މުއްދަތެއްގެ ތެރޭގައި ބައިނަލްއަޤްވާމީ، ޢަރަބި ބާރަކުން ޙަމާސްގެ ހަތިޔާރުތައް ހޯދުމަށް ގޮވާލާފައިވެއެވެ. އޭގެ އިތުރުން ހަތިޔާރު ބަހައްޓާ ޣައްޒާ ދޫކޮށް ދިއުމަށް އެއްބަސްވާ ޙަމާސްގެ މެންބަރުންނަށް މަޢާފު ދެވޭނެއެވެ.

މި ރޯޑްމެޕްގެ ދަށުން، ޣައްޒާ ވަގުތީ ގޮތުން ހިންގާނީ ބައިނަލްއަޤްވާމީ، ޢަރަބި ސަލާމަތީ ބާރަކުންނެވެ. ފަލަސްޠީނު އޮތޯރިޓީ (ޕީއޭ) ގެ ދަށުން ފަލަސްޠީނު ކޮމިޓީއެއް އުފައްދައި، އެ ކޮމިޓީން ދުވަހުން ދުވަހަށް ހިންގުމުގެ ކަންކަން ބަލަހައްޓާނެއެވެ. އަދި ވަކި މުއްދަތެއްގެ ތެރޭގައި ޕީއޭ އަށް ފުރިހަމަ ބާރު ދޫކޮށްލާނެ ކަމަށް ބެލެވެއެވެ.

ޣައްޒާގެ އެކި ސަރަޙައްދުތަކުގައި ރައްކާތެރި އިންސާނީ ކޮރިޑޯތައް ގާއިމުކުރެވޭނެއެވެ. އަދި ޣައްޒާ އަލުން ބިނާކުރުމުގެ މަސައްކަތް 5 އަހަރުގެ ތެރޭގައި ކުރިއަށްދާނެއެވެ. މި މަސައްކަތް ބަލަހައްޓާނީ ބައިނަލްއަޤްވާމީ އަދި ޢަރަބި ކޮންސޯޓިއަމްއަކުންނެވެ.

ޕްލޭން ގައިވާ ގޮތުން އިސްރާއީލުން ވެސްޓް ބޭންކް ހިސޯރު ކުރުން ހުއްޓުވުމަށް އެމެރިކާ އިން ގެރެންޓީ ދޭނެ އެވެ. އަދި ދެ ފަރާތުން ވެސް އިސްރާއީލާއި ފަލަސްޠީން އާ މެދުގައި ފައިނަލް-ސްޓޭޓަސް މަޝްވަރާތައް އަލުން ފެށުމަށް އެއްބަސްވާނެއެވެ.

މި ޑްރާފްޓުގައިވާ ގޮތުން، މުޅި ޕްލޭން ބިނާވެފައި ވަނީ ޙަމާސް އިން އެ ފަރާތުގެ ހަތިޔާރުތައް ދޫކޮށްލައި ޣައްޒާ ދޫކޮށް ދިއުމަށް އެއްބަސްވުމުގެ މައްޗަށެވެ.

އެމެރިކާގެ އިސް އޮފިޝަލުން ބުނާ ގޮތުގައި މި ރޯޑްމެޕް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވައިޓް ހައުސް އަށް ޒިޔާރަތް ކުރާއިރު އޭނާ އަށް ހުށަހެޅޭނެއެވެ.