ހަނގުރާމަ އަށް ފަހު ޣައްޒާ ހިންގުމަށް އުފައްދާ ވަގުތީ ވެރިކަމުގައި އިސްދައުރެއް އަދާކުރައްވާނީ އިނގިރޭސިވިލާތުގެ ކުރީގެ ބޮޑު ވަޒީރު ޓޯނީ ބްލެއަރ ކަމަށް ބެލޭ ކަމަށް އިނގިރޭސިވިލާތުގެ މީޑިއާތަކުން ރިޕޯޓު ކޮށްފިއެވެ.

ރިޕޯޓުތައް ބުނާ ގޮތުގައި އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރާއި ކަމާ ގުޅުން ހުރި އެހެނިހެން ފަރާތްތަކާއެކު ހަނގުރާމައަށްފަހު ޣައްޒާގައި އުފައްދާ ވަގުތީ ވެރިކަމާ ގުޅޭ ގޮތުން ބްލެއަރ ވަނީ މަޝްވަރާ ކުރައްވާފައެވެ.

ބީބީސީ އާއި ދަ އިކޮނޮމިސްޓް މަޖައްލާގައި ބުނެފައިވާ ގޮތުގައި ޕްލޭނުގައި ހިމެނެނީ އދ އާއި ގަލްފު ޤައުމުތަކުގެ އެހީތެރިކަމާއެކު ބްލެއަރ އިސްކޮށް ހުންނަވައިގެން ވަގުތީ ވެރިކަން ހިންގުމެވެ.

ފައިނޭންޝަލް ޓައިމްސްއިން ރިޕޯޓުކޮށްފައިވާ ގޮތުގައި 2007 އިން 2015 އަށް މެދުއިރުމަތީގެ ސުލްޙަވެރިކަމުގެ މެދުވެރިއެއްގެ ގޮތުގައި ރަސްމީކޮށް މަސައްކަތްކުރެއްވި އިނގިރޭސިވިލާތުގެ ކުރީގެ ބޮޑު ވަޒީރު ވަނީ ވަގުތީ ވެރިކަމުގެ ސުޕަރވައިޒަރީ ބޯޑު ގައި ހިމެނުނަށް އެދިވަޑައިގަނެފައެވެ.

އެމެރިކާގެ އިސްނެގުމުގެ މަތިން ހިންގާ ސުލްޙައިގެ މަސައްކަތުގައި ބްލެއަރގެ ބައިވެރިވުމާ ގުޅޭ ގޮތުން ފާއިތުވި ހަފްތާގައި އިސްރާއީލުގެ މީޑިއާތަކުން ހާމަ ކުރި ވާހަކަތަކާ ގުޅިގެން ބްލެއަރއާ ގާތް މަސްދަރުތަކުން ކަށަވަރުކޮށްދީފައި ވަނީ އޭނާ ކަމާ ބެހޭ ފަރާތްތަކާއެކު ހަނގުރާމަ ނިމުމަކަށް ގެނައުމަށް މަސައްކަތް ކުރަމުންދާ ކަމަށެވެ.

ނަމަވެސް، އެ މަސްދަރުތަކުން ފާހަގަކޮށްފައިވަނީ ޣައްޒާގެ ރައްޔިތުން ދާއިމީކޮށް އެތަނުން ނެރުމަށް ހުށަހަޅާ އެއްވެސް ހުށަހެޅުމަކަށް އޭނާ ތާއީދު ނުކުރާނެ ކަމަށާއި، އަދި އެ ސަރަޙައްދަށް އުފައްދާ ކޮންމެ ވަގުތީ ވެރިކަމަކުން ވެސް އެންމެ ފަހުން ބާރުތައް ހަވާލުކުރާނީ ވެސްޓް ބޭންކުގެ ރާމަﷲގައި ހުންނަ ފަލަސްޠީނު އޮތޯރިޓީއާ ކަމަށެވެ.

ދަ އިކޮނޮމިސްޓްގެ ރިޕޯޓުގައި ބުނެފައިވާ ގޮތުގައި "ޣައްޒާ އިންޓަނޭޝަނަލް ޓްރާންޒިޝަނަލް އޮތޯރިޓީ" ގެ ނަމުގައި އުފައްދާ މުއައްސަސާއަކުން އދގެ މެންޑޭޓެއް ހޯދުމަށް މަސައްކަތްކުރާނެއެވެ. އެއީ 5 އަހަރު ވަންދެން "އެންމެ މަތީ ސިޔާސީ އަދި ޤާނޫނީ އޮތޯރިޓީ" އެއްގެ ގޮތުގައި ޣައްޒާ އާ ބެހޭ މަސައްކަތް ކުރުމަށްފަހު ބާރުތައް ފަލަސްޠީނުގެ ރައްޔިތުންނާ ހަވާލުކުރާ ގޮތަށެވެ.

މި އޮތޯރިޓީގައި 25 މީހުންގެ ސެކްރެޓޭރިއެޓަކާއި 7 މެންބަރުންގެ ބޯޑެއް ހިމެނޭނެ ކަމަށް އެ ރިޕޯޓުގައި އިތުރަށް ބުނެފައިވެއެވެ.

ބީބީސީން ބުނެފައިވާ ގޮތުގައި މި އޮތޯރިޓީ ފުރަތަމަ ޤާއިމު ކުރާނީ ޣައްޒާގެ ދެކުނު ސަރަޙައްދާ ކައިރި މިސުރުގައެވެ. އަދި ޣައްޒާގެ ރައްކާތެރިކަން ކަށަވަރު ވުމުން ޣައްޒާ އަށް އޮފީސް ބަދަލުކުރެވޭނެ އެވެ.

މޮސާޑު ގެ ކުރީގެ ވެރިޔާ ޔޮސި ކޯހެން ވަނީ ހުކުރު ދުވަހު ބީބީސީ ރޭޑިއޯ އަށް ދިން ބަޔާނެއްގައި މި ޚިޔާލަށް "ގަޔާވާ" ކަމަށް ބުނެ، ބްލެއަރ އަކީ "ވަރަށް ބަރާބަރު މީހެއް" ކަމަށް ބުނެފައެވެ.

"އޭނާ މި ބޮޑު ޒިންމާ ނަގަން ބޭނުންވާ ނަމަ، އަހަރެން ދެކޭގޮތުގައި... ޣައްޒާ އަށް އުއްމީދެއް އެބައޮތް،" އޭނާ އިތުރަށް ބުންޏެވެ.

"އަހަރެން ދެކޭގޮތުގައި އޭނާ އަށް އެ ބުރަ ވަރަށް ވަރުގަދަ އަށް އުފުލޭނެ."

މިޒިންމާ ބްލެއަރ ނަންގަވާނަމަ 2003 ވަނަ އަހަރު އިރާގުގައި އެމެރިކާގެ އިސްނެގުމުގެ މަތިން ކުރި ހަނގުރާމައިގައި ބްލެއަރގެ ބައިވެރިވުމާ ގުޅިގެން އޭރު ކުރެވުނު ތުހުމަތުތަައް އަލުން ފެންމަތިވުން އެކަށީގެންވާ ކަމަށް ރިޕޯޓުތައް ބުނެއެވެ.

އެ ހަނގުރާމައާ ގުޅޭ ގޮތުން އިނގިރޭސިވިލާތުގެ ރަސްމީ ތަޙްޤީޤަކުން ދައްކާފައިވަނީ ހަނގުރާމައިގައި ބައިވެރިވުމަށް ނިންމުމުގައި ބްލެއަރ ދެއްކެވި ސަބަބުތައް ބިނާކޮށްފައި ވަނީ ނުބައި އިންޓެލިޖެންސްގެ މައްޗަށް ކަމަށެވެ.

ރިޕޯޓުތަކުގައި ބުނެފައިވާ ގޮތުގައި ބްލެއަރ ވަނީ އޯގަސްޓު މަހު ވައިޓް ހައުސްގައި ބޭއްވުނު ބައްދަލުވުމެއްގައި ޓްރަމްޕާއެކު ބައިވެރިވެ، ހަނގުރާމަ އަށް ފަހު ޣައްޒާއާ ގުޅޭ ރޭވުންތަކާ ބެހޭ ގޮތުން މަޝްވަރާކޮށްފައެވެ.