ކާބުލްގައި ބޮންތަކެއް ގޮއްވައި މަދުވެގެން 19 މީހުން މަރާލައިފި
2 ނޮވެމްބަރު 2021 | އަންގާރަ 12:43މަރުވި މީހުންގެ އިތުރަށް މަދުވެގެން 43 މީހަކު ވަނީ ޒަޚަމްވެފައި
ކާބުލްގެ އަސްކަރީ ހޮސްޕިޓަލު ކައިރީގައި ދިން ބޮމުގެ ހަމަލާގައި އަނިޔާވި މީހަކު ހޮސްޕިޓަލަށް ގެންދަނިކޮށް
އަފްޣާނިސްތާނުގެ ވެރިރަށް ކާބުލްގެ އަސްކަރީ އަސްފަތާލުގައި ބޮންތަކެއް ގޮވައި މަދުވެގެން 19 މީހުން މަރުވެއްޖެއެވެ.
މަރުވި މީހުންގެ އިތުރަށް މަދުވެގެން 43 މީހަކު ޒަޚަމްވެފައިވާ ކަމަށް ރަސްމީ ފަރާތްތަކުން ބުނެއެވެ. ބޮންތައް ގޮއްވައިލުމާއެކުއެކީގައި ހަސްފަތާލުގެ ކައިރިން ބަޑީގެ އަޑުވެސް ވަނީ އިވިފައެވެ. އަފްޣާނިސްތާނުގައި ވެރިކަންކުރާ ތާލިބާން ޖަމާއަތުގެ ތަރުޖަމާނު ވިދާޅުވީ އެ ސަރަހައްދުގައި ބޮމުގެ ވަރުގަދަ ދެ ހަމަލާއެއް ދީފައިވާ ކަމަށެވެ. މި ހަމަލާތައް ދިނީ ބަޔަކު އަމިއްލައަށް މަރުވެގެން ކަމަށް ބެލެވޭ ކަމަށެވެ. މި ހާދިސާއަށްފަހު އެ ސަރަހައްދުގެ ސަލާމަތީ ކަންކަން މިހާރު ވަރުގަދަ ކޮށްފައިވާ ކަމަށް އޭނާ ވިދާޅުވިއެވެ.
ބޮމުގެ ހަމަލާތަކުގެ ޒިންމާ މިހާތަނަށް އެއްވެސް ޖަމާއަތަކުން އުފުލާފައިނުވާއިރު ބޮޑަށް ތުހުމަތު ކުރެވެނީ މިއީ އައިއެސްއާ ގުޅުން އޮންނަ ޖަމާއަތެއްގެ އަމަލެއް ކަމުގައެވެ. އަފްޣާނިސްތާނުގެ ވެރިކަމާ ތާލިބާން ޖަމާއަތުން ހަވާލުވުމާއެކު އައިއެސްއާ ގުޅިފައިވާ ޖަމާއަތްތަކުން އަންނަނީ ހަނގުރާމައިގެ އެކި ހަރަކާތްތައް ހިންގަމުންނެވެ. އެގޮތުން މީގެ ކުޑަ ދުވަސްކޮޅެއް ކުރިން ކަންދަހާރުގެ މިސްކިތެއްގައިވެސް ބޮން ގޮއްވައި އެތައް ބަޔަކު މަރާލާފައިވެއެވެ.
