އަފްޣާނިސްތާނުގެ ވެރިރަށް ކާބުލްގެ މިސްކިތެއްގައި ބޮމެއް ގޮއްވާލައިފިއެވެ.

ބޭރުގެ މީޑިއާތަކުން ރިޕޯޓްކޮށްފައިވާގޮތުގައި މި ބޮން ގޮއްވާލާފައިވަނީ ބުދަ ދުވަހުގެ ރޭގެ އިޝާ ނަމާދު ކުރަން ތިއްބައެވެ. އެހެންވެ، ގިނަ ބަޔަކު ޝަހީދުވެފައިވާކަމަށް ބެލެވޭކަމަށް ވަނީ ރިޕޯޓް ކޮށްފައެވެ. އޭގެ ތެރޭގައި މިސްކިތުގެ އިމާމުވެސް ހިމެނޭކަމަށް ބޭރުގެ ރިޕޯޓްތައް ބުނިނަމަވެސް، އަފްޣާނިސްތާނުގެ ވެރިކަން ކުރަމުން އަންނަ ތާލިބާނުން އެކަން ހާމަކޮށްފައެއްނުވެއެވެ. އެ ޖަމާއަތުން ބުނެފައިވަނީ ކާބުލްގެ 17 ވަނަ ޑިސްޓްރިކްޓުގައި ގޮވުމެއް ގޮވާފައިވާ ކަމަށެވެ. އިތުރު ތަފްސީލެއް ދީފައެއްނުވެއެެވެ.

ތާލިބާނުގެ އިންޓެލިޖެންސް އޮފިޝަލަކާ ހަވާލާދީ ރޮއިޓަރސްއިން ރިޕޯޓްކޮށްފައިވާގޮތުގައި މި ހަމަލާގައި 35 މީހުންނަށް ވަނީ އެކި ވަރުގެ ޒަޚަމް ލިބިފައެވެ. އަދި ގިނަ ބަޔަކު ޝަހީދުވެފައިވާއިރު އަދަދު އިތުރުވުމަކީ އެކަށީގެންވާކަމެއް ކަމަށްވެސް ވަނީ ރިޕޯޓްކޮށްފައެވެ.

ކާބުލްގެ އިމަރޖެންސީ ހޮސްޕިޓަލުން ބުނެފައިވާގޮތުގައި އެ ހޮސްޕިޓަލަށް 27 މީހަކު ވަނީ ޒަޚަމްތަކާއެކު ގެންގޮސްފައެވެ. މީގެ ތެރޭގައި ހަތް އަހަރުގެ ކުއްޖަކުވެސް ހިމެނޭ ކަމަށް ވަނީ ބުނެފައެވެ.

އަލްޖަޒީރާއިން ބުނެފައިވާގޮތުގައި 20 މީހަކު ވަނީ މި ހަމަލާގައި ޝަހީދުވެފައެވެ.

ފާއިތުވި ހަފުތާގައި ޖާނުންފިދާވުމުގެ ބޮމުގެ ހަމަލާއެއްގައި ތާލިބާނުގެ އިސް މީހަކުވެސް ވަނީ މަރާލާފައެވެ. އެ ހަމަލާގެ ޒިންމާ، ހަނގުރާމަވެރި ޖަމާއަތެއްކަމަށްވާ އިސްލާމިކް ސްޓޭޓް (އައިއެސް)އިން ވަނީ ނަގާފައެވެ.