ޣައްޒާ އަށް އެހީ ހިފައިގެން ދަތުރު ކުރަމުންދާ އުޅަނދުފަހަރަށް އެހީތެރިވުމަށް އިޓަލީން ދެވަނަ އަސްކަރީ އުޅަނދެއް ފޮނުވަނީ

ޣައްޒާ އަށް އެހީ ހިފައިގެން ދަތުރުކުރަމުންދާ އުޅަނދުފަހަރަށް އެހީތެރިވުމަށް އިޓަލީން ދެވަނަ ކަނޑު އުޅަނދެއް ފޮނުވައިފިއެވެ.

އިޓަލީ ދެވަނަ އުޅަނދެއް ފޮނުވަން ނިންމީ ޣައްޒާއަށް އެހީ ފޯރުކޮށްދިނުމަށް މަސައްކަތް ކުރަމުންދާ އުޅަނދުފަހަރަށް އަމާޒުކޮށް ޑްރޯން ހަމަލާތައް ދެމުން ގެންދާތީ ކަމަށް އިޓަލީގެ ދިފާއީ ވަޒީރު ގުއިޑޯ ކްރޮސެޓޯ ބުރާސްފަތި ދުވަހު ވިދާޅުވިއެވެ.

ގްލޯބަލް ސުމޫދު ފްލޮޓިލާ (ޖީއެސްއެފް) އިން 50 އާ ގާތްކުރާ އަމިއްލަ އުޅަނދުފަހަރު ބޭނުން ކޮށްގެން ދަތުރު ކުރަމުން ދަނީ އިސްރާއީލުން ޣައްޒާގައި އަޅާފައިވާ ކަނޑުގެ ހިސޯރު ނިމުމަކަށް ގެނައުމަށެވެ. މި ދަތުރުގައި ސުވިޑްން ގެ ތިމާވެށީގެ އެކްޓިވިސްޓް ގްރެޓާ ތަންބަރގް ހިމެނޭ ގޮތަށް ގިނަ ޤާނޫނީ ވަކީލުންނާއި އެކްޓިވިސްޓުން ބައިވެރިވެއެވެ.

"އަޅުގަނޑުމެން އެއް އުޅަނދު ފޮނުވައިފިން އަދި އަނެއް އުޅަނދު ދަތުރުމަތީގައި އެވަނީ، ކޮންމެ ކަމަކަށްވެސް ތައްޔާރަށް،" ކްރޮސެޓޯ ޕާލަމެންޓުގެ ތިރި ގޭގައި ދެއްކެވި ވާހަކަފުޅުގައި ވިދާޅުވިއެވެ.

އިޓަލީން ފުރަތަމަ ފްރިގޭޓް ފޮނުވީ ބުދަ ދުވަހުއެވެ. އެއީ ބައިނަލްއަޤްވާމީ ކަނޑުގައި، ޖީއެސްއެފް އަށް ސްޓަން ގްރެނޭޑްތަކާއި ޑްރޯން ހަމަލާތަކެއް އަމާޒުވިކަމަށް ބުނި ވަގުތާ ދާދި ގާތްކޮށެވެ.

ޖީއެސްއެފް އިން މި ހަމަލާގެ ޒިންމާ އިސްރާއީލުގެ މައްޗަށް އަޅުވާފައިވެއެވެ.

އިސްރާއީލުގެ ފޮރިން މިނިސްޓްރީން މި ތުހުމަތަށް ސީދާ ޖަވާބެއް ނުދެއެވެ. ނަމަވެސް އިސްރާއީލުގެ ބަނދަރަކަށް އިންސާނީ އެހީ ގެންގޮސް، އިސްރާއީލުގެ އިދާރާތަކުން އެ ތަކެތި ޣައްޒާ އަށް ގެންދިއުމަށް ހަވާލު ކުރުމަށް ހުށަހަޅާ ކަމަށް ބުނާ ވާހަކަ ތަކުރާރު ކޮށްފައިވެއެވެ. އެހެން ނޫނީ ނަތީޖާ ގޯސްވާނެ ކަމަށް ބުނެފައިވެއެވެ.

ސްޕެއިން އިން ވެސް ވަނީ ފްލޮޓިލާ ހިމާޔަތް ކުރުމަށް ހަނގުރާމަމަތީ އުޅަނދެއް ފޮނުވަން ނިންމާފައެވެ.

އިޓަލީގެ ދިފާއީ ވަޒީރު ކްރޮސެޓޯ ދަތުރު ގައި ބައިވެރިވާ އެކްޓިވިސްޓުންނަށް އިންޒާރުދެއްވީ އިސްރާއީލުގެ ހިސޯރު ނިމުމަކަށް ގެނައުމަށް މަސައްކަތް ކުރުމުގައި އިސްރާއީލަށް ކުރިމަތިލާ ނުހެދުމަށެވެ. އަދި އެހީގެ ތަކެތި އިސްރާއީލާ ޙަވާލުކޮށް، ޣައްޒާގައި ހުރި ނަސޯރާ ފައްޅިއެއް މެދުވެރިކޮށް އެ ތަކެތި ބެހުމަށް އިޓަލީން ހުށަހަޅާފައިވާ ހުށަހެޅުން ޤަބޫލު ކުރުމަށް އިލްތިމާސް ކުރެއްވިއެވެ.

އޭނާ އިތުރަށް ވިދާޅުވީ އެހެން ޤައުމުތަކުގެ ސަރަޙައްދީ ކަނޑުތަކަށް ވަދެއްޖެނަމަ އިޓަލީ އަށް އިޓަލީގެ ރައްޔިތުންގެ ރައްކާތެރިކަން ކަށަވަރު ކޮށްދެވޭނެ ކަމުގެ ޔަޤީންކަމެއް ނެތް ކަމުގައެވެ.

ޖީއެސްއެފް އިން ބުރާސްފަތި ދުވަހު ހެނދުނު ބުނެފައި ވަނީ އެމީހުންގެ އުޅަނދުފަހަރު ދަތުރު ކުރަމުން ދަނީ ގްރީސްގެ ސަރަޙައްދީ ކަނޑުގައި މަޑު ދުވެއްޔެއްގައި ކަމަށާއި، ރޭގަނޑުގެ ވަގުތުތަކުގައި ޑްރޯން ހަރަކާތްތަކާ ކުރިމަތިވެފައިވާ ކަމަށާއި، "މިއަދުގެ ފަހު ވަގުތެއްގައި" ބައިނަލްއަޤްވާމީ ކަނޑަށް ނުކުތުމަށް ދަތުރުކުރަމުންދާ ކަމަށެވެ.