ގާކޮށި ފްލެޓަކުން 3 ކިލޯއަށްވުރެ ގިނަ މަސްތުވާތަކެތި ފެނިފައިވާ މައްސަލައަކާ ގުޅިގެން ހައްޔަރުކުރި މީހާގެ ބަންދަށް 30 ދުވަސް
މަސްތުވާތަކެތި ޓްރެފިކް ކުރުމުގެ ތުހުމަތުގައި ހައްޔަރުކުރީ ގއ.ނިލަންދޫ 31 އަހަރުގެ މުއާވިޔަތު އަހުމަދު
ގާކޮށި ފްލެޓުތައް
ގ.ގާކޮށި ފްލެޓެއް ބަލާ ފާސްކޮށް 3 ކިލޯއަށްވުރެ ގިނަ މަސްތުވާތަކެތި ފެނިފައިވާ މައްސަލައަކާ ގުޅިގެން ޒުވާނަކު ހައްޔަރުކޮށް ބަންދުގެ މުއްދަތު ޖަހައިފިއެވެ.
ކްރިމިނަލް ކޯޓުގެ އަމުރުގައި ބުނެފައިވަނީ މަސްތުވާތަކެތި ޓްރެފިކް ކުރުމުގެ ތުހުމަތުގައި ގއ.ނިލަންދޫ 31 އަހަރުގެ މުއާވިޔަތު އަހުމަދު ހައްޔަރުކޮށްފައިވާ ކަމަށެވެ. އަދި މިހާރު ދިރިއުޅޭ އެޑްރެސްގެ ގޮތުގައި ބުނެފައިވަނީ ގ.ގާކޮށި ފްލެޓު 909 އޭ ކަމަށެވެ.
21 ސެޕްޓެންބަރު 2025ގައި ނެރުނު އަމުރުގައި ވަނީ ކަސްޓޯޑިއަލް ޖަލެއްގައި 30 ދުވަހަށް ބަންދު ކުރުމަށެވެ. އަދި ބަންދުގައި ބަހައްޓަން ނިންމި ސަބަބު ކަމަށް ބުނެފައިވަނީ ކުށްކުރި ކަމަށް ތުހުމަތު ކުރެވޭ މިންވަރު ހެކި ހުށަހަޅާފައިވާ ކަމަށެވެ.
އިތުރު ބަޔާނުގައި ބުނެފައިވަނީ، މިސީނުން 3 ކިލޯއަށްވުރެ ގިނަ މަސްތުވާތަކެއްޗާއި، މަސްތުވާތަކެތި ބަންދުކުރުމަށް ބޭނުންކުރާ އާލާތްތަކާއި ސާމާނު ފެނިފައިވާކަމަށް އައިއޯ ފާހަގަކުރި ކަމަށެވެ. އެޕާޓްމަންޓުގެ ކުލި މުއާވިޔަތު ދައްކާފައިވާ ސްލިޕާއި، އެތަނުގެ ތަޅުދަނޑި އޭނާގެ އަތުން ފެނުމުގެ އިތުރުން އޭނާގެ ފިންގަރ ޕްރިންޓު ވެސް ސީނުން ފެނިފައިވާ ކަމަށެވެ.
މީގެ އިތުރުން އޭނާގެ ބަލި ހާލަތާއި ގުޅިގެން ޝަކުވާކޮށްފައިވާތީއާއި، ގަވާއިދުން ގަޑިން ގަޑިއަށް ބޭސްނުދޭ ކަމަށް ބުނާތީ އެކަން ބެލުމަށް އައިއޯ ދެންނެވިކަން ފާހަގަކޮށްފައިވެއެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
