ވަކީލާ ބައްދަލުކުރުމުގެ ފުރުޞަތު ނުދީ 48 ގަޑިއިރަށް ހިފެހެއްޓޭ ގޮތަށް ހެދި ގަވާއިދު ގެޒެޓްކޮށް އަމަލުކުރަން ފަށައިފިއެވެ.

ގޭންގު ކުށްތަކާއި ނުރައްކާތެރި ކުށްތައް ހުއްޓުވުމުގައި ފުލުހުން ޢަމަލުކުރާނެ އައު ގަވާއިދެއް ދިވެހި ފުލުހުންގެ ޚިދުމަތުން އެކުލަވާލައިފިއެވެ. މި ގަވާއިދަކީ ގޭންގު ކުށްތަކާއި ނުރައްކާތެރި ކުށްތައް ހުއްޓުވުމުގެ ޤާނޫނުގެ ދަށުން އެކުލަވާލެވުނު ގަވާއިދެކެވެ.

މިދިޔަ މަހު ވުޖޫދަށް އައި ގަވާއިދުގެ ސަބަބުން ތަހުގީގީ ހާލަތްތަކުގައި ގާނޫނު ތަންފީޒު ކުރާ އިދާރާތަކަށް ބާރު ލިބިގެންދާނެ އެވެ. މި އާ ގަވާއިދުގެ ދަށުން ހައްޔަރު ކުރެވޭ މީހާއަށް ގާނޫނީ ވަކީލަކާ މަޝްވަރާ ކުރުމުގެ ހައްގު ގާނޫނު ތަންފީޒު ކުރާ އިދާރާތަކުން ވަގުތީ ގޮތުން ހަނި ކުރެވިދާނެ އެވެ. މި ބާރު ލިބޭނީ ސަބް އިންސްޕެކްޓަރ އޮފް ޕޮލިސް ނުވަތަ އެއަށްވުރެ މަތީ ރޭންކެއް ލިބިފައިވާ ބޭފުޅުންނަށެވެ.

އައު ގަވާއިދުގެ ދަށުން، ކުށްތައް ހުއްޓުވުމަށް ކޮންޓްރޯލްޑް ޑެލިވަރީ އަދި ސިއްރު އޮޕަރޭޝަންތައް ހިންގުމުގެ އިޚްތިޔާރު ފުލުހުންނަށް ލިބިގެންދާނެއެވެ. މީގެ އިތުރުން، ކުށުގެ ތުހުމަތުގައި ހައްޔަރުކުރެވޭ މީހުންގެ ޤާނޫނީ ޙައްޤުތަކާއި، އެފަދަ މައްސަލަތަކުގައި ހިފެހެއްޓޭ މުދަލާމެދު ޢަމަލުކުރާނެ ގޮތްތައްވެސް މި ގަވާއިދުގައި ބަޔާންކޮށްފައިވެއެވެ.

ގަވާއިދުގެ ދަށުން، ކުށުގެ ތުހުމަތުގައިވާ މީހާއަށް ޤާނޫނީ ވަކީލެއްގެ އެހީތެރިކަން ހޯދައި ލިބިގަތުމުގެ ޙައްޤު ލިބިދެއެވެ. ނަމަވެސް، ވަކި ޚާއްޞަ ހާލަތްތަކެއްގައި، 48 ގަޑިއިރަށް ވުރެ އިތުރުނުވާ ގޮތަށް، ވަކީލާ ބައްދަލުކުރުމުގެ ފުރުޞަތު ނުދީ ހިފެހެއްޓުމުގެ އިޚްތިޔާރު ފުލުހުންނަށް ލިބިގެންވެއެވެ.

އަދި ކުށުގެ މައްސަލަތަކުގައި ހިފެހެއްޓޭ މުދަލާމެދު ގޮތެއް ނިންމުމަށް ޚާއްޞަ ކޮމިޓީއެއް އެކުލަވާލެވޭނެއެވެ. މި ކޮމިޓީގައި މިނިސްޓްރީ އޮފް ފިނޭންސް، ފުލުހުންގެ ޚިދުމަތް، މީރާ، ކަސްޓަމްސް އަދި ޕްރޮސިކިއުޓަރ ޖެނެރަލްގެ އޮފީހުގެ މެންބަރުން ހިމެނޭނެއެވެ.

މި ގަވާއިދަށް ޢަމަލުކުރަން ފަށާނީ ދިވެހި ސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެންނެވެ. މި ގަވާއިދުގެ މައިގަނޑު މަޤްޞަދަކީ ގޭންގު ކުށްތަކާއި ނުރައްކާތެރި ކުށްތައް ހުއްޓުވުމުގެ ޤާނޫނު ތަންފީޒުކުރުމުގައި ފުލުހުން ޢަމަލުކުރާނެ އުސޫލުތައް އެކަށައެޅުމެވެ.