ރައްޔިތުންގެ މަޖިލީހުން ފާސްކޮށްފައިވާ މީޑިއާ ބްރޯޑްކާސްޓިންގ ބިލާމެދު ވިމެން އެންޑް ޑިމޮކްރެސީން އެކަން ހަރުކަށި އިބާރާތުން ކުށްވެރިކޮށް ކަންބޮޑުވުން ފާޅުކޮށްފި އެވެ.

އެ ޖަމިއްޔާއިން ނެރުނު ބަޔާނެއްގައި ބުނީ މި ބިލަކީ ނޫސްވެރިކަމުގެ މިނިވަންކަން ނެތިކޮށްލުމުގެ މަގުސަދުގައި މިސަރުކާރުން ކުރި ފިނޑި އަމަލެކެވެ. އަދި މިއީ ސަރުކާރުން މީޑިއާ ކޮންޓްރޯލްކޮށް، ޚިޔާލުފާޅުކުރުމުގެ މިނިވަންކަން ހަނިކުރުމަށް އަޅާ ނުރައްކާތެރި ފިޔަވަޅެއް ކަމަށް އެ ޖަމކިއްޔާއިން ފާހަގަ ކުރެއެވެ.

ބިލު އެކުލަވާލުމުގެ މަރުހަލާގައި އެންމެ ބޮޑު އެއް މައްސަލައަކީ މަޝްވަރާގެ ދާއިރާ ހަނިކޮށްފައިވުން ކަމަށް އެ ޖަމިއްޔާއިން ބުނެފައިވެ އެވެ. އަދި ނޫސްވެރިންނާއި، މީޑިއާގެ ފަންނުވެރިންނާއި، މަދަނީ ޖަމްއިއްޔާތަކުގެ ހިޔާލު ހޯދުމެއްނެތި، އަވަސް އަވަހަށް ބިލު ފާސްކުރުމަށް މަސައްކަތްކޮށްފައިވާކަން ވިމެން އެންޑް ޑިމޮކްރެސީން ވަނީ ފާހަގަކޮށްފައެވެ. ބިލާއި މެދު ގިނަ ފަރާތްތަކެއް ކަންބޮޑުވުން ފާޅުކުރި ނަމަވެސް، އެ ކަންބޮޑުވުންތަކަށް ސަމާލުކަމެއް ދީފައިނުވާކަން އެޖަމިއްޔާއިން ފާހަގަކުރެއެވެ.

މީގެ އިތުރުން މީޑިއާ ކޮންޓްރޯލް ކުރާ ބިލާއި ގުޅިގެން ނޫސްވެރިންނާއި ޒުވާނުން ކުރި ސުލްހަވެރި އިހްތިޖާޖުތަކުގައި ފުލުހުންގެ ފަރާތުން ނޫސްވެރިންނާއި ޒުވާނުންނާ ދެކޮޅަށް ހާލަތާއި ނުބައްދަލު ބާރުގެ ބޭނުން ކޮށްފައިވާތި އެ ޖަމިއްޔާއިން ވަނީ އެކަން ކުށްވެރިކޮށްފައެވެ. ޚާއްސަކޮށް އަންހެން ނޫސްވެރިންނާމެދު ފުލުހުން އަމަލު ކޮށްފައިވާ ގޮތާމެދު އެ ޖަމްއިއްޔާއިން ވަނީ ފާޅުކޮށްފައެވެ.

އަދި ނޫސްވެރިންނަށް ބިރުދެއްކުމާއި ދެމުންދާ މަރުގެ އިންޒާރުތަކަކީ ހަމައެކަނި ވަކިވަކި ފަރުދުންނަށް އަމާޒުކޮށްގެން ދެވޭ ހަމަލާތަކެއް ނޫންކަމަށް ވިމެން އެންޑް ޑިމޮކްރެސީން ވަނީ ބުނެފައެވެ. މިއީ މުޅި ޑިމޮކްރެސީގެ އަސާސްތަކަށް ދެވޭ ނުރައްކާތެރި ހަމަލާއެއްކަމަށް ވެސް އެ ޖަމްއިއްޔާއިން ބުނެފައިވެއެވެ

ދިވެހިރާއްޖޭގެ ޑިމޮކްރެސީގެ ހަރަކާތްތަކުގައި އަންހެން ނޫސްވެރިން އަދާކުރަމުންދާ މުހިންމު ދައުރު ވިމެން އެންޑް ޑިމޮކްރެސީން ވަނީ ފާހަގަކޮށްފައެވެ. އަންހެން ނޫސްވެރިން މީޑިއާ ދާއިރާއަށް ގެނެސްދޭ ތަފާތު ނަޒަރިއްޔާތަކާއި، ޖެންޑަރ މައްސަލަތަކަށް އަލިއަޅުވާލުމުގައި އަދާކުރާ ދައުރުގެ މުހިންމުކަން އެ ޖަމްއިއްޔާއިން ވަނީ ފާހަގަކޮށްފައެވެ.

ވިމެން އެންޑް ޑިމޮކްރެސީން ވަނީ މީޑިއާތައް ކޮންޓްރޯލް ކުރާ ބިލު ވަގުތުން އަނބުރާ ގެންދިއުމަށާއި، މި ބިލު ރައީސް މުއިއްޒު ތަސްދީޤުނުކުރުމަށް ގޮވާލާފައެވެ. ނޫސްވެރިކަމުގެ މިނިވަންކަމަކީ ޑިމޮކްރެސީގެ މައިގަނޑު ތަނބެއްކަމަށާއި، މި މިނިވަންކަން ހަނިކުރުމަކީ ޤައުމުގެ ޑިމޮކްރެޓިކް އަސާސްތަކަށް ދެވޭ ނުރައްކާތެރި ހަމަލާއެއްކަމަށް އެ ޖަމްއިއްޔާއިން ފާހަގަ ކޮށްފައިވެއެވެ.