މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން އިސްނަގައިގެން "ހިޔާލާއި ފިކުރު ކަފުނަށް" ނަމުގައި ހޮނިހިރު ދުވަހުގެ ރޭ 8:45 ގައި އާޓިފިޝަލް ބީޗުގައި ފޯރަމެއް ބާއްވަން ތައްޔާރު ވެއްޖެ އެވެ.

އެމްޖޭއޭ އިން ހާމަކުރި ގޮތުގައި، މި ފޯރަމްގައި ހިޔާލާއި ފިކުރު ކަފުން ކުރުމަށް ރައްޔިތުންގެ މަޖިލީހަށް ހުށަހަޅާފައިވާ "މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލް" ގައި ހުރި ކަންބޮޑުވުންތައް ރައްޔިތުންނަށް ކިޔައިދީ، އެކަމާ ގުޅޭ ގޮތުން އުފެދޭ ސުވާލުތަކަށް ޖަވާބު ދެވޭނެއެވެ. އަދި މި ބިލުގެ ސަބަބުން ރައްޔިތުންނަށް ކުރާނެ އަސަރުތަކާ ބެހޭ މަޢުލޫމާތު ވެސް ހިއްސާ ކުރެވޭނެ ކަމަށް އެމްޖޭއޭ އިން ބުނެފައިވެއެވެ.

މި ފޯރަމް ބޭއްވުމަށް ހަމަޖެހިފައިވަނީ، މި ބިލާ ގުޅިގެން ގިނަ އަދަދެއްގެ ރައްޔިތުންނާއި ނޫސްވެރިން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ. މިހާތަނަށް 40 އަށްވުރެ ގިނަ މީޑިއާ އާއި 150 އަށްވުރެ ގިނަ ނޫސްވެރިންގެ އިތުރުން ބައިނަލްއަގުވާމީ ޖަމިއްޔާތަކުން ވެސް ވަނީ މި ބިލު ރައްޔިތުންގެ މަޖިލީހުން ބޭރުކޮށްލުމަށް ގޮވާލާފައެވެ.

ނަމަވެސް، ޕްރޮގްރެސިވް ނޭޝަނަލް ކޮންގްރެސް (ޕީއެންސީ) ގެ ސުޕަ މެޖޯރިޓީ ބޭނުންކޮށްގެން ސަރުކާރުން އަންނަނީ މި ބިލު ފާސްކުރުމަށް މަސައްކަތް ކުރަމުންނެވެ.

ހޮނިހިރު ދުވަހުގެ ރޭ ބާއްވާ މި ފޯރަމަކީ ރައްޔިތުންނަށް ހުޅުވާލެވިފައިވާ ފޯރަމެއް ކަމަށާއި، ބިލާ ގުޅޭ ގޮތުން ސުވާލު އުފެދޭ ފަރާތްތަކަށް މި ފުރުސަތުގައި ބައިވެރިވެވޭނެ ކަމަށް އެމްޖޭއޭ އިން ވަނީ ފާހަގަކޮށްފައެވެ.