ލަންކާ ބަލިކޮށް ސައުތް އޭޝިއަން ސުޕަރ ކަޕް ދިވެހިރާއްޖެ އަށް
ރާއްޖެއިން މި މުބާރާތް ކާމިޔާބުކުރީ ސްރީ ލަންކާއާ ދެކޮޅަށް ކުޅުނު ދެ ލެގުގެ މެޗުތަކުން 4-1 ގެ އެގްރިގޭޓް ނަތީޖާއަކުން
ދިވެހި ފުޓުބޯޅަ ޓީމު ތަށި އުފުލާލަނީ
ސައުތު އޭޝިއަން ސުޕަ ކަޕް 2025 ގެ ޗެމްޕިއަންކަން ދިވެހިރާއްޖެއިން ހޯދައިފިއެވެ. ރާއްޖެއިން މި މުބާރާތް ކާމިޔާބުކުރީ ސްރީ ލަންކާއާ ދެކޮޅަށް ކުޅުނު ދެ ލެގުގެ މެޗުތަކުން 4-1 ގެ އެގްރިގޭޓް ނަތީޖާއަކުންނެވެ.
މި މުބާރާތުގެ ފުރަތަމަ ލެގުގައި ދިވެހިރާއްޖެއިން ވަނީ ސްރީ ލަންކާ 3-0 އިން ބަލިކޮށްފައެވެ. އަދި ދެވަނަ ލެގުގެ މެޗު ނިމުނީ 1-1 އިން އެއްވަރުވެގެންނެވެ.
ލަންކާގެ ވެރިރަށް ކޮލޮމްބޯގެ ރޭސްކޯސް ސްޓޭޑިއަމްގައި ކުޅުނު ދެވަނަ ލެގުގެ މެޗުގައި ދިވެހި ޓީމުން ދެއްކީ ވަރަށް ފުރިހަމަ ކުޅުމެކެވެ. މެޗުގެ ފުރަތަމަ ހާފު ނިމިފައިވަނިީ ދެ ޓީމުން ކުރެ ޓީމަކަށް ލަނޑެއް ނުޖެހި އެއްވަރު ވެގެންނެވެ.
މެޗުގެ 67 ވަނަ މިނެޓުގައި ދިވެހިރާއްޖެއިން ވަނީ ލީޑު ނަގާފައެވެ. މި ލަނޑު ރާއްޖެއަށް ކާމިޔާބުކޮށްދިނީ ނާއިޒް ހަސަން (ދާދު) އެވެ. ފޭދޫ އިއްބެ ބޮލުން ފޮނުވާލި ހަމަލާއެއް ގޯލުގެ ހުރަސް ދަނޑީގައި ޖެހި ނުކުތް ވަގުތު، ރިބައުންޑް ވި ބޯޅަ ދާދު ވަނީ ގޯލުގެ ތެރެއަށް ވައްދާލާފައެވެ.
މުޅި މެޗުގައި ދިވެހިރާއްޖޭގެ ގޯލްކީޕަރު ފައިސަލް ވަނީ ލަންކާގެ ނުރައްކާތެރި ހަމަލާތައް ހުޝިޔާރުކަމާއެކު ދިފާއުކޮށްފައެވެ. ނަމަވެސް މެޗުގެ އިތުރު ވަގުތުގެ ދެވަނަ މިނެޓުގައި ލަންކާގެ ސްޓްރައިކަރު ކެލާޓް ވަނީ އޭރިއާ ތެރެއިން ލިބުނު ފުރުސަތަކުން ނަތީޖާ އެއްވަރުކޮށްފައެވެ.
ސައުތު އޭޝިއަން ސުޕަ ކަޕްގެ ޗެމްޕިއަންކަން ހޯދުމާއެކު، ހަތް އަހަރުގެ ދިގު މުއްދަތަކަށްފަހު ދިވެހި ފުޓުބޯޅައަށް ވަނީ އަނެއްކާވެސް ތައްޓެއް ލިބިފައެވެ. މިއީ ދިވެހި ފުޓުބޯޅައިގެ ތާރީޚުގައި އަނެއްކާވެސް ފާހަގަކޮށްލެވޭވަރުގެ ކާމިޔާބީއެކެވެ.
