ސައުތު އޭޝިއަން ސުޕަ ކަޕްގެ ދެ ވަނަ މެޗުގައި ރާއްޖޭގެ ސީނިއާ ޤައުމީ ފުޓުބޯޅަ ޓީމުން ސްރީ ލަންކާއާ ދެކޮޅަށް ނިކުންނައިރު، އެ މެޗުގެ ޓިކެޓު ރާއްޖޭގެ ސަޕޯޓަރުންނަށް އަގުބޮޑުކޮށް ވިއްކާ ކަމުގެ ކަންބޮޑުވުން ފާޅު ކޮށްފި އެވެ.

ސުޕަ ކަޕްގައި ލަންކާއާ ދެކޮޅަށް ކުޅުނު ފުރަތަމަ މެޗުގައި ރާއްޖެ އިން ވަނީ، 3-0 އިން ލަންކާގެ މައްޗަށް ކުރި ހޯދައިފަ އެވެ. ދެ ވަނަ މެޗުގައި ރާއްޖެ އިން ލަންކާއާ ދެކޮޅަށް ނިކުންނާނީ އަންގާރަ ދުވަހުގެ ހަވީރު، 17:15 ގައެވެ.

ނަމަވެސް، ދެ ވަނަ މެޗަށް ލަންކާގެ ފުޓުބޯޅަ ފެޑެރޭޝަން އިން ރާއްޖޭގެ ސަޕޯޓަރުންނަށް ޓިކެޓު ވިއްކާފައި ވަނީ 3000 ރުޕީސް އަށެވެ. އޭގެ ކުރިން ކުޅުނު ފުރަތަމަ މެޗުގައި ރާއްޖޭގެ ސަޕޯޓަރުންނަށް ޓިކެޓު ވިއްކާފައި ވަނީ 1000 ރުޕީސް އަށެވެ. އެހެންކަމުން، ދެ ވަނަ މެޗަށް ލަންކާ ފެޑެރޭޝަން އިން ރާއްޖޭގެ ސަޕޯޓަރުންނަށް ޓިކެޓު ވިއްކީ 2000 ރުޕީސް ބޮޑު ކޮށެވެ.

އެކަމާ ގުޅިގެން ލަންކާގައި ތިބި ގިނަ އަދަދެއްގެ ދިވެހިން ވަނީ އެކަމުގެ ކަންބޮޑުވުން ފާޅު ކޮށްފަ އެވެ. އެގޮތުން ދެ ވަނަ މެޗުގެ ޓިކެޓު ވިއްކާފައި ވަނީ ސީދާ ލަންކާ ފުޓުބޯޅަ ފެޑެރޭޝަންގެ މީހުން ކަމަށާއި، ޓިކެޓު ވިއްކަން އެމްބަސީގައި މަސަައްކަތް ކުރާ ފަރާތްތަކާ ހަވާލު ނުކުރާ ކަމަށް ބައެއް ފަރާތްތަކުން ވަނީ ފާހަގަ ކޮށްފަ އެވެ.

ބައެއް ފަރާތްތަކުން ބުނެފައިވާ ގޮތުގައި ލަންކާގައި ތިބި ގިނަ އަދަދެއްގެ ދިވެހިން ދެ ވަނަ މެޗު ބަލަން ދާން ވެސް ބޭނުންވެ އެވެ. އެގޮތުން އާއިލާ ތަކުގައި ތިބި އެންމެން މެޗު ބަލަން ދާން ބޭނުންވާ ކަމަށާއި، ނަމަވެސް ޓިކެޓު އަގު ބޮޑު ކޮށްފައި ހުރުމުން އެކަމުގައި ބޮޑު އުނދަގޫ ތަކެއް ކުރިމަތިވާ ކަމަށް އެ ފަރާތްތަކުން ބުނެފައިވެ އެވެ.

ލަންކާ ފުޓުބޯޅަ ފެޑެރޭޝަން އިން ދިވެހި ސަޕޯޓަރުންނަށް ބޮޑު އަގުގައި ޓިކެޓު ވިއްކާފައިވާއިރު، ފުރަތަމަ މެޗުގައި ލަންކާ ސަޕޯޓަރުންގެ އަދަދު މަދުވުމުން، ލަންކާގެ ކޯޗު އަބްދުﷲ އަލް މުތައިރީ ވަނީ އެކަން ފާހަގަކޮށްފަ އެވެ. އެގޮތުން އެ މެޗުގައި ލަންކާގެ ސަޕޯޓަރުންނަށް ވުރެ ދިވެހި ސަޕޯޓަރުން ދަނޑުގައި ގިނަ ކަމަށާއި، މުޅި ދަނޑުގައި އޮތީ ދިވެހި ސަޕޯޓަރުންގެ އަޑު ކަމަށް އޭނާ ވަނީ ފާހަގަ ކޮށްފަ އެވެ.

ރާއްޖެ އަތުން ބަލިވި ފުރަތަމަ މެޗަށް ފަހު ވާހަކަ ދައްކަމުން މުތައިރީ ބުނެފައި ވަނީ ދެ ވަނަ މެޗަށް ނިކުންނައިރު އެކަން ބަދަލުވާން ޖެހޭ ކަމަށާއި، ލަންކާގެ ގިނަ ސަޕޯޓަރުން ދަނޑަށް ވަންނަން ޖެހޭ ކަމަށެވެ. އެހެންވެ، ދެ ވަނަ މެޗުގެ ޓިކެޓު، ލަންކާ ފުޓުބޯޅަ ފެޑެރޭޝަން އިން އެ ޤައުމުގެ ސަޕޯޓަރުންނަށް ވިއްކާފައި ވަނީ އަގު ހެޔޮ ކޮށެވެ.