ސައުތު އޭޝިއަން ސުޕަ ކަޕްގެ ފުރަތަމަ މެޗުގައި، ސްރީ ލަންކާއާ ދެކޮޅަށް ކުޅުނު މެޗުން ދިވެހި ރާއްޖޭގެ ސީނިއާ ޤައުމީ ޓީމު މޮޅުވެއްޖެ އެވެ.

ލަންކާގެ ވެރި ރަށް ކޮލަމްބޯ ގައި ހޮނިހިރު ދުވަހުގެ ހަވީރު ކުޅުނު މެޗު ރާއްޖެ އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ރާއްޖެ އިން ދެ ލަނޑު ޖެހިއިރު، އަނެއް ލަނޑު ރާއްޖެ އިން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި ރާއްޖެ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ރާއްޖެ އަށް ޖަހައިދިނީ ނާއިޒް ޙަސަން އެވެ. އެއީ ރާއްޖެ އަށް ލިބުނު ކޯނަރެއްގައި، އިބްރާހީމް އައިޝަމް ހުރަސްކޮށްދިން ބޯޅަ ގޯލަށް ވައްދާލައިގެން ނާއިޒް ޖެހި ލަނޑެކެވެ.

މެޗުގެ ފުރަތަމަ ހާފު ނިމުމުގެ ކުރިން ރާއްޖެ އިން ދެ ވަނަ ލަނޑެއް ޖެހި އެވެ. އެގޮތުން ފުރަތަމަ ހާފުގެ 25 ވަނަ މިނެޓުގައި ރާއްޖޭގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އިބްރާހީމް މަހުދީ އެވެ.

މެޗުގައި ރާއްޖެ އިން ތިން ވަނަ ލަނޑު ޖެހީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އެ ލަނޑު ރާއްޖެ އަށް ޖަހައިދިނީ އަލީ ފާޞިރު (ސެންޓޭ) އެވެ. ސެންޓޭ އެ ލަނޑު ޖަހައިދިނީ ޒުވާން ކުޅުންތެރިޔާ މުޙައްމަދު އިލާން އިމްރާން ތަނަވަސްކޮށްދިން ފުރުސަތެއްގަ އެވެ.

ލަންކާ އަތުން ހޯދި މޮޅާއެކު ރާއްޖެ އިން މި ވަނީ ފުޓުބޯޅައިގެ އުންމީދެއް ހޯދައިފަ އެވެ. މިއީ ދާދި ފަހުން ރާއްޖޭގެ ސީނިއާ ޤައުމީ ޓީމުގެ ކޯޗަކަށް ހަމަޖެއްސި މުޙައްމަދު ޝިޔާޒް (މޯހަން)ގެ އިރުޝާދުގެ ދަށުން ރާއްޖެ އިން ކުޅުނު ފުރަތަމަ މެޗެވެ،

ރާއްޖެ އަށް މެޗަކުން މޮޅުވެވިފައި މި ވަނީ، އެންމެ ފަހުން ކުޅުނު ފަސް މެޗުން ވެސް ބަލިވެފައި އޮތުމަށް ފަހު އެވެ. ލަންކާ މެޗުގެ ކުރިން، އެންމެ ފަހުން ރާއްޖެ މޮޅުވެފައި ވަނީ ބަންގްލަދޭޝް އަތުންނެވެ. އޭގެ ފަހުން ކުޅުނު ފަސް މެޗުން ވެސް ރާއްޖެ ވަނީ ބަލިވެފަ އެވެ.

ލަންކާއާ ދެކޮޅަށް ކުޅުނު މި މެޗުގެ ކުރިން، އެންމެ ފަހުން ރާއްޖޭގެ ޤައުމީ ޓީމުން ކުޅުނު މެޗަކީ އޭއެފްސީ އޭޝިއަން ކަޕް ކޮލިފިކޭޝަންގައި ޓިމޯ ލެސްޓޭއާ ދެކޮޅަށް ކުޅުނު މެޗެވެ. އެ މެޗުން ރާއްޖެ ވަނީ ބަލިވެފަ އެވެ.

އޭގެ ކުރިން ބަންގްލަދޭޝަން، އިންޑިއާ އަދި ސިންގަޕޫރާ ދެކޮޅަށް ކުޅުނު ރަޙުމަތްތެރި ކަމުގެ މެޗުތަކުން ވެސް ރާއްޖެ ވަނީ ބަލިވެފަ އެވެ.