ރޭނާގެ އިސްތިއުފާއާ ގުޅިގެން، ސްޓާމަރ ގެ ސަރުކާރަށް ބަދަލު ތަކެއް

އިނގިރޭސިވިލާތުގެ ބޮޑު ވަޒީރު ކިއާ ސްޓާމަރގެ ސަރުކާރުގެ އެންމެ އިސް ބޭފުޅެއްގެ ގޮތުގައި ހުންނެވި، ބޮޑު ވަޒީރުގެ ނައިބު އެންޖެލާ ރޭނާ އިސްތިއުފާ ދެއްވުމާ އެކު، ސަރުކާރަށް ބޮޑެތި ބަދަލު ތަކެއް ގެނެސް، މަސައްކަތް ކުރާނެ އައު ގޮތްތަކެއް ސްޓާމަރ ކަނޑައަޅުއްވައިފި އެވެ.

ބޮޑު ވަޒީރުގެ ނައިބުގެ މަގާމުގައި ހުންނެވި ރޭނާ އިސްތިއުފާ ދެއްވުމާ އެކު، ސްޓާމަރ ވަނީ އެ މަގާމަށް ފޮރިން މިނިސްޓަރު ކަމުގައި ހުންނެވި ޑޭވިޑް ލެމީ އައްޔަން ކުރައްވައިފަ އެވެ. ލެމީގެ ބަދަލުގައި ފޮރިން މިނިސްޓަރުގެ މަގާމަށް ސްޓާމަރ ވަނީ، އިންޓީރިއަރ މިނިސްޓަރު އިވެޓް ކޫޕާ އައްޔަން ކުރައްވައިފަ އެވެ.

މީގެ އިތުރުން ކޫޕާ ހުންނެވި މަގާމަށް ވަނީ، ޖަސްޓިސް ސެކްރެޓަރީ ޝަބާނާ މަހްމޫދު އައްޔަން ކުރައްވައިފަ އެވެ. މި ތިން ބޭފުޅުންނަކީ ވެސް، ސަރުކާރުގައި ބޮޑު ވަޒީރު ސްޓާމަރ އެންމެ އިތުބާރު ކުރައްވައި، އަދި އޭނާގެ އެންމެ އަރިސް ތިން ބޭފުޅުން ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ.

ބޮޑު ވަޒީރުގެ ނައިބު ކަމުގެ މަގާމުން ރޭނާ އިިސްތިއުފާ ދެއްވާފައި ވަނީ، އޭނާއާ ގުޅޭ ޓެކްސްގެ މައްސަލައާ ގުޅިގެންނެވެ. އެގޮތުން އިނގިރޭސިވިލާތުގެ މިނިވަން ލަފާ ދޭ ފަރާތަކުން ވަނީ، މިނިސްޓީރިއަލް ކޯޑް އާއި ރޭނާ ޚިލާފުވެފައިވާ ކަމަށް ކަނޑައަޅައިފަ އެވެ. އެއާއެކު ރޭނާ ވަނީ، 40،000 (ސާޅީސް ހާސް) ޕައުންޑުގެ ޓެކްސް ދެއްކުމުގައި މައްސަލަ ޖެހިފައިވާ ކަމަށް ޤަބޫލު ކުރައްވައި، އެކަމަށް މައާފަށް އެދިވަޑައިގެން، މަގާމުން އިސްތިއުފާ ދެއްވައިފަ އެވެ.

ރޭނާގެ އިސްތިއުފާއާ ގުޅިގެން ބޮޑު ވަޒީރު ސްޓާމަރގެ ސަރުކާރަށް ގެންނަން ޖެހުނު ކުއްލި ބަދަލުތަކާ ގުޅިގެން، ސްޓާމަރ ވަނީ ސަރުކާރުގެ ލީޑަރޝިޕް އަލުން ބައްޓަން ކުރައްވައި، އޭނާ ނިސްބަތް ވެވަޑައިގަންނަވާ ލޭބަރ ޕާޓީ އަށް ގެއްލެމުންދާ އިތުބާރު އަލުން ހޯދުމުގެ މަސައްކަތް ފައްޓަވައިފަ އެވެ.

އެގޮތުން ސަވަންތާ ޕޯލިމް ފާމްގެ ރިސާޗް ޑިރެކްޓަރު ކްރިސް ހޮޕްކިންސް ފާހަގަ ކޮށްފައިވާ ގޮތުގައި، މިވަގުތު ވެރިކަން ކުރަމުން އަންނަ ލޭބަރ ޕާޓީ އަށާއި، ބޮޑު ވަޒީރު ސްޓާމަރގެ ސަރުކާރަށް ދިމާވެފައިވާ މައިގަނޑު މައްސަލަ އަކީ، އެ މީހުންގެ މަޤުސަދު އަދި ސިޔާސަތުތައް ސާފުކޮށް ބަޔާންކޮށް، އެކަން ތަންފީޒު ކުރުމުގެ މައްސަލަ އެވެ.

އިނގިރޭސިވިލާތުގެ ބޮޑު ވަޒީރު ކަމުގެ މަގާމަށް ސްޓާމަރ ވަޑައިގެންނެވީ 2024 ވަނަ އަހަރުގެ ޖުލައި މަހުގެ ތެރޭގަ އެވެ. ބޮޑު ވަޒީރު ކަމުގެ މަޤާމަށް ސްޓާމަރ ވަޑައިގެންނެވީ ގިނަ ކަންތައްތަކެއް އިސްލާހުކޮށް، ޚަރުދަނާ ގޮތެއްގައި ސަރުކާރު ހިންގަވާނެ ކަމުގެ ވައުދާ އެކު އެވެ. ނަމަވެސް، ސަރުކާރުގެ ޚަރަދުތަކާއި، ޓެކްސްއާ ގުޅޭ ނިންމުންތަކުގައި ބޮޑު ވަޒީރު ސްޓާމަރ އަށް ދަނީ ގިނަ ގޮންޖެހުންތަކާ ކުރިމަތި ވަމުންނެވެ.