ހަމާސްގެ އަސްކަރީ ތަރުޖަމާނު އަބޫ އުބައިދާ ނައްތާލައިފި ކަމަށް އިސްރާއީލުން ބުނެފި
ޣައްޒާ ހަނގުރާމައިގައި ހަމާސް ގެ އެންމެ އިސް އަސްކަރީ މޫނު ކަމަށް ބެލޭ އަބޫ އުބައިދާ އިސްރާއީލުގެ ހަމަލާއަކުން މަރުވެއްޖެ ކަމަށް އިސްރާއީލުން ވަނީ ބުނެފައެވެ. މިއީ ދެއަހަރާ ގާތްކުރާ މި ހަނގުރާމައިގައި ހަމާސްގެ އިސްވެރިންގެ ތެރެއިން އެންމެ ފަހުން މަރުވި ފަރާތް ކަމަށް ވާއިރު، މިކަމާމެދު އަދި ހަމާސްއިން އެއްވެސް އެއްޗެއް ބުނެފައެއް ނުވޭ.
އަބޫ އުބެއިދާގެ ޕޯސްޓަރެއް ފާރެއްގައި ހަރުކޮށްފައި
ހަމާސްގެ އަސްކަރީ ތަރުޖަމާނު އަބޫ އުބައިދާ "ނައްތާލައިފި" ކަމަށް އިސްރާއީލުން ބުނެފިއެވެ.
އިސްރާއީލުން އާދީއްތަ ދުވަހު ބުނެފައި ވަނީ، ޣައްޒާ އަށް ހޮނިހިރު ދުވަހު ދިން ހަމަލާއެއްގައި ހަމާސްގެ އަސްކަރީ ބައިގެ ތަރުޖަމާނު މަރާލެވިފައިވާ ކަމަށެވެ.
"ހަމާސްގެ ޓެރަރިސްޓް ތަރުޖަމާނު އަބޫ އުބައިދާ ޣައްޒާ ގައި ނައްތާލެވިއްޖެ،" އިސްރާއީލުގެ ދިފާއީ ވަޒީރު އިސްރާއީލް ކަޓްޒް އެކްސް ގައި ޕޯސްޓް ކުރި މެސެޖެއްގައި ބުނެފައި ވެއެވެ. އޭގެ ކުރިން ބޮޑުވަޒީރު ބެންޖަމިން ނަތަންޔާހޫ ވަނީ އަބޫ އުބައިދާ އަށް ހަމަލާ ދީފައިވާ ކަމަށް ބުނެފައެވެ.
ޣައްޒާ ސަރަހައްދުގައި އިސްރާއީލުން ހިންގަމުން ގެންދާ 23 މަސް ދުވަހުގެ ނުރައްކާތެރި ހަނގުރާމައިގައި އިސްރާއީލުން ވަނީ ހަމާސްގެ ލީޑަރޝިޕްގެ ވަރަށް ގިނަ ފަރާތްތައް ޝަހީދު ކޮށްލާފައެވެ.
އެހެން ނަމަވެސް، އަބޫ އުބައިދާ މަރާލެވުނު ކަމާމެދު ހަމާސް އިން އަދި އެއްވެސް އެއްޗެއް ބުނެފައެއް ނުވެއެވެ.
ހަނގުރާމަ ފެށުނީއް ސުރެ، އޭނާ ވަނީ އަސްކަރީ ހެދުމުގައި، ރަތްކުލައިގެ ކަފިޔާ އަކުން މޫނު ނިވާ ކޮށް ޓީވީގައި އެތައް ބަޔާން ތަކެއް ދީފައެވެ. އަދި ގިނަ އަދަދެއްގެ އޯޑިއޯ މެސެޖްތަކާއި، ނޫސް ބަޔާންތަކާއި، ސޯޝަލް މީޑިއާ ޕޯސްޓްތައް ވެސް ކޮށްފައިވެއެވެ.
އަބޫ އުބައިދާ ގެ ނަމުން މަޝްހޫރު ވެފައިވާ ހަމާސް ގެ އަސްކަރީ ތަރުޖަމާނުގެ އަސްލު ނަމަކީ ހުޒައިފާ އަލް-ކަހްލޫތު އެވެ.
އާދީއްތަ ދުވަހު، ހަމާސް އިން ކަށަވަރުކޮށްދިން ގޮތުގައި އެ ޖަމާޢަތުގެ ޣައްޒާގެ ލީޑަރު ކަމަށް ބެލެވޭ މުޙައްމަދު ސިންވާރު ވަނީ ޝަހީދުވެފައެވެ. ހަމާސް އިން މިކަން ހާމަ ކުރީ އިސްރާއީލުން ދިން ވައިގެ ހަމަލާ އަކުން އޭނާ މަރާލި ކަމަށް ބުނިތާ ތިން މަސް ދުވަހަށް ވުރެ ގިނަ ދުވަސް ފަހުންނެވެ.
މަސްދަރު: އޭއެފްޕީ
