ހުސްވި ޖުލައި މަހު 4.5 ބިލިއަން ރުފިޔާ ގެ މުދާ ރާއްޖެ އަށް އެތެރެ ކުރި ކަމަށް ކަސްޓަމްސް އިން ބުނެފިއެވެ.

ރާއްޖެ އިން ބޭރަށް ޖުލައި މަހު އެކްސްޕޯޓު ކުރީ 210 މިލިއަން ރުފިޔާގެ މުދާ ކަމަށް ވެސް ކަސްޓަމްސްގެ ތަފާސް ހިސާބުން ހާމަ ވެއެވެ.

ޖުލައި މަހު އެންމެ ބޮޑު އެއްޗެއް ހޭދަވެފައި ވަނީ ތެޔޮ އިމްޕޯޓް ކުރުމަށެވެ. އެއީ 923 މިލިއަން ރުފިޔާއެވެ. ދެން އެންމެ ގިނައިން އިމްޕޯޓު ޚަރަދެއް ހިނގާފައި ވަނީ ކާބޯތަކެތީގެ ބާވަތްތައް އެތެރެ ކުރުމަށެވެ. އެއީ 859 މިލިއަން ރުފިޔާއެވެ. މީގެ އިތުރުން 735 މިލިއަން ރުފިޔާގެ މެޝިނަރީ މެކޭނިކަލް އަދި އިލެކްޓްރިކަލް އެޕްލަޔަންސަސް އެތެރެ ކޮށްފައި ވެއެވެ. އެހެނިހެން މުހިންމު އިމްޕޯޓް ބައިތަކުގެ ތެރޭގައި 380 މިލިއަން ރުފިޔާ ގެ މެޓަލްގެ ބާވަތްތަކާއި، 308 މިލިއަން ރުފިޔާ ގެ ކެމިކަލް ބާވަތްތަކާއި 241 މިލިއަން ރުފިޔާގެ އަދި މިނަރަލްގެ ބާވަތްތައް ޖުލައި މަހު އެތެރެ ކޮށްފައި ވެއެވެ.

ރާއްޖެ އިން ޖުލައި މަހު އެންމެ ގިނައިން އެކްސްޕޯޓް ކޮށްފައި ވަނީ ގަނޑުކުރި ކަޅުބިލަމަހެވެ. 126 މިލިއަން ރުފިޔާގެ ގަނޑުކުރި ކަޅުބިލަ މަސް އެކްސްޕޯޓު ކޮށްފާވާއިރު، މިއީ ޖުމްލަ އެކްސްޕޯޓްގެ ދެބައިކުޅަ އެއްބަޔަށްވުރެ ގިނަ މިންވަރެކެވެ. އޭގެ އިތުރުން 43 މިލިއަން ރުފިޔާގެ ކަޅުބިލަމަހުގެ އުފެއްދުންތައް ޖުލައި މަހު ބޭރު ކޮށްފައިވެއެވެ. އޭގެ އިތުރުން 7 މިލިއަން ރުފިޔާގެ ރީނދޫއުރަހަ ކަންނެލި އެކްސްޕޯޓު ކޮށްފައިވެއެވެ. ކަންނެލި ލޮއިންސްގެ ގޮތުގައި 6 މިލިއަން ރުފިޔާގެ އުފެއްދުން ވަނީ އެކްސްޕޯޓު ކޮށްފައެވެ. އިންސާނުން ކެއުމަށް އެކަށީގެން ނުވާ މަހުގެ ބައިތަކުގެ އުފެއްދުންތަކުން 5 މިލިއަން ރުފިޔާގެ ބާވަތްތައް ވަނީ އެކްސްޕޯޓް ކޮށްފައެވެ.

ޖުލައި މަހު އެންމެ ގިނައިން މުދާ އެތެރެ ކޮށްފައި ވަނީ ރާއްޖެ އާ އެކު ފްރީ ޓްރޭޑް އެގްރީމެންޓް ހަދާފައިވާ ޗައިނާ އިންނެވެ. ޗައިނާ އިން 712 މިލިއަން ރުފިޔާގެ މުދާ އިމްޕޯޓު ކޮށްފައިވާއިރު އެއީ ޖުމްލަ އިމްޕޯޓުގެ 16 އިން ސައްތަ އެވެ. ކުޑަ ތަފާތަކާ އެކު ދެވަނަ އަށް އެންމެ ގިނަ މުދާ އިމްޕޯޓު ކުރި އިންޑިއާ އިން 704 މިލިއަން ރުފިޔާގެ މުދާ އެތެރެކޮށްފައި ވެއެވެ. ޔުނައިޓެޑް އަރަބް އެމިރޭޓްސްއިން 622 މިލިއަން ރުފިޔާގެ މުދާ އިމްޕޯޓްކުރެވުނެވެ. އޮމާން އާއި ސިންގަޕޫރު އެންމެ ގިނަ އިން އިމްޕޯޓު ކުރި ފަސް ޤައުމުގެ ތެރޭގައި ހިމެނެއެވެ.

ރާއްޖެ އިން ޖުލައި މަހު ވެސް އެންމެ ގިނައިން އެކްސްޕޯޓު ކޮށްފައި ވަނީ ތައިލެންޑަށެވެ. އެކްސްޕޯޓްގެ 53 އިންސައްތަ ނުވަތަ 111 މިލިއަން ރުފިޔާގެ މުދާ ގަނެފައިވަނީ ތައިލެންޑުންނެވެ. އިނގިރޭސި ވިލާތުން 18 އިންސައްތަ ނުވަތަ 38 މިލިއަން ރުފިޔާގެ މުދާ ގަތެވެ. މޮރިޝަސް، ފްރާންސް އަދި ވިއެޓްނާމް ރާއްޖެ އިން އެކްސްޕޯޓްކުރާ މުހިންމު ފަސް ޤައުމުތަކުގެ ތެރޭގައި ހިމެނެއެވެ.

ކަސްޓަމްސް އިން ޖުލައި މަހު ހިންގި މުއާމަލާތްތަކުން 295 މިލިއަން ރުފިޔާގެ އާމްދަނީ ލިބި، 1 މިލިއަން ރުފިޔާގެ ރޯޔަލްޓީ ލިބުނެވެ. 2024 ގެ ޖުލައި މަހާ އަޅާބަލާއިރު، ކުރީ އަހަރު އައި 97 އުޅަނދުގެ ބަދަލުގައި، މި އަހަރު 105 އުޅަނދު ރާއްޖެ އަށް އައެވެ. ރާއްޖެ އިން ބޭރަށް ފުރި އުޅަނދުގެ އަދަދަށް ބަލާއިރު، ވޭތުވެދިޔަ އަހަރުގެ ޖުލައި މަހު 118 އުޅަނދު ރެކޯޑް ކުރެވިފައި ވާއިރު މިއަހަރުގެ ޖުލައި މަހު ރެކޯޑް ކުރެވިފައިވަނީ 96 އުޅަނދެވެ. މި އަހަރުގެ ޖުލައި މަހު ޕްރޮސެސް ކުރި ޑިކްލަރޭޝަންގެ އަދަދަކީ 21,919 އެވެ.