ރާއްޖޭގެ މޫސުން ގޯސްވެ، ބޮޑު ސަރަހައްދަކަށް ވައިޓް އެލާޓް ނެރެފި
ވައިޓް އެލާޓް ނެރިފައިވަނީ ހޮނިހިރު ދުވަހުގެ ހެނދުނު 10:00ން ހަވީރު 4:00ށް ހއ.އަތޮޅުން ފެށިގެން މ. އަތޮޅަށް
ގަދައަށް ވައިޖެހި މާލޭގެ މަގުމައްޗަށް ބޮޑު ގަހެއް ވެއްޓިފައި
ރާއްޖޭގެ މޫސުން ގޯސްވެ، ބޮޑު ސަރަހައްދަކަށް ވައިޓް އެލާޓް ނެރެފި އެވެ.
މޫސުމާބެހޭ ގައުމީ އިދާރާއިން ވައިޓް އެލާޓް ނެރިފައިވަނީ ހޮނިހިރު ދުވަހުގެ ހެނދުނު 10:00ން ހަވީރު 4:00ށް ހއ.އަތޮޅުން ފެށިގެން މ. އަތޮޅަށެވެ.
ކުރިއަށް އޮތް 24ގަޑިއިރު މޫސުން ލަފާކުރާގޮތަށް ބަލާއިރު، އެކިހިސާބަށް ވިއްސާރަކުރާނެ ކަމަށާއި، ބައެއް ރަށްތަކަށް ބޯކޮށް ވާރޭވެހުމާއެކު ގުގުރުން އެކަށީގެންވާ ކަމަށް އެއިދާރާއިން ބުނެއެވެ.
މޫސުމާބެހޭ ގައުމީ އިދާރާއިން ބުނީ، ހުޅަނގުދެކުނާއި ހުޅަނގުން، ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަށް 40 މޭލަށް ވައިގަދަވުން އެކަށީގެންވާ ކަމަށެވެ.
މީގެ އިތުރުން ހޮނިހިރު ދުވަހުގެ ހެނދުނު ގަދަވަޔާއެކު މާލެއަށް ކުރި ވިއްސާރައިގެ ސަބަބުން، މާފަންނު އޯކިޑުމަގުގެ ގަޑިބުރު ކައިރިއަށް ބޮޑު ގަހެއް ވެއްޓި ބައެއް ވެހިކަލްތަކަށް ގެއްލުންވެފައިވެއެވެ. އެގަސް ވެއްޓުނީ އެ މަގުގައި ޕާކްކޮށްފައި ހުރި ބައެއް ސައިކަލްތަކާއި ޕިކަޕެއްގެ މައްޗަށެވެ.
މި ހާދިސާގެ ސަބަބުން ވަގުތުކޮޅަކަށް މަގު ބަންދުވި ނަމަވެސް އެއްވެސް މީހަކަށް އަނިޔާއެއް ނުލިބޭ ކަމަށް ފުލުހުން ބުނެއެވެ.
މީގެކުރިން ވެސް މޫސުން ގޯސްވުމުގެ ސަބަބުން، މާލޭގެ އިތުރުން ހުޅުމާލެ އަދި އަތޮޅުތެރޭގެ ރަށްތަކަށް ވައިގަދަވުމުގެ ސަބަބުން ގަސްތައް ވެއްޓުމާއި، ބައެއް ގެތަކުގެ ފުރާޅު އެއްލާލުން ފަދަ ހާދިސާތައް ހިނގާފައިވެއެވެ.
މުޅި ރާއްޖޭގެ މޫސުން ގޯސްވެފައިވާއިރު، ކުރިއަށް އޮތް 24 ގަޑިއިރު ކަނޑުތައް ގަދަވާނެ ކަމަށާއި، ރާޅުގެ އުސްމިނުގައި 7 ނުވަތަ 4 ފޫޓު ހުންނާނެ ކަމަށް މޫސުމާބެހޭ ގައުމީ އިދާރާއިން ބުނެއެވެ. އަދި ހުރިހާ ފަރާތްތަކުން މޫސުމަށް އަދި ޚާއްސަކޮށް ކަނޑުދަތުރުކުރާ ފަރާތްތަކުން ސަމާލުވުމަށް އިލްތިމާސްކޮށްފައިވެއެވެ.
