ކުރިއަށް އޮތް ސީޒަންގައި ވެލެންސިއާ އަށް އިރުޝާދު ދޭނީ ފެސްކޯ

ކުރިއަށް އޮތް ފުޓުބޯޅަ ސީޒަންގައި ކުލަބު ވެލެންސިއާގެ ކޯޗަކަށް، އަޙުމަދު މުޖުތަބާ (ފެސްކޯ) އެ ކުލަބުން ހަމަޖައްސައިފި އެވެ.

އެންމެ ފަހުން ވެސް ވެލެންސިއާގެ ކޯޗަކަށް ހުރީ ފެސްކޯ އެވެ. އޭނާ ވެލެންސިއާއާ ހަވާލުވީ 2022 ވަނަ އަހަރުގެ ޖަނަވަރީ މަހު އެވެ. ނަމަވެސް ފެސްކޯ ވަނީ ފަހުން ވެލެންސިއާގެ ކޯޗުކަމުން ވަކިވެފަ އެވެ.

މިވަގުތު ވެލެންސިއާ އިން އަންނަނީ ކުރިއަށް އޮތް ފުޓުބޯޅަ ސީޒަނަށް އެ ޓީމުގެ ފަރިތަކުރުންތައް ކުރިއަށް ގެންދަމުންނެވެ. އެގޮތުން ވެލެންސިއާ އިން އެ ޓީމުގެ ފަރިތަކުރުންތައް ފަށާފައި ވަނީ، އިސްމާއީލް އާސިފް (ކުޑަ ހީނާ)ގެ އިރުޝާދުގެ ދަށުންނެވެ.

އައު ސީޒަނަށް ވެލެންސިއާ ތައްޔާރުވަމުން އަންނައިރު، މިއަހަރުގެ ތެރޭގައި އެ ކުލަބުން ވަނީ ބޭރުގެ އެކި ފަރާތްތަކަށް ދައްކަން ޖެހޭ އެންމެހައި ދަރަނިތަކެއް އަދާކޮށް ނިންމައިފަ އެވެ. އެގޮތުން ވެލެންސިއާ އިން ވަނީ ރާއްޖެ އިން ބޭރުގެ އެކި ފަރާތްތަކަށް ދައްކަން ޖެހިފައި އޮތް 1.3 މިލިއަން ރުފިޔާގެ ދަރަނި ދައްކައިފަ އެވެ.

ވެލެންސިއާ އިން މީގެ ކުރިން ބުނެފައި ވަނީ އެ ކުލަބުން އައު ސީޒަނަށް ތައްޔާރުވަމުން އަންނައިރު، އެ ކުލަބަށް ބިދޭސީ ކުޅުންތެރިން ވެސް ގެންނަން ނިންމާފައިވާ ކަމަށެވެ. މީގެ އިތުރުން ވެލެންސިއާގައި ޒުވާން ގިނަ ކުޅުންތެރިން ހިމެނޭއިރު، އެންމެ ފަހުން ވެސް އެ ޓީމު ކުޅެފައި ވަނީ ޒުވާން ކުޅުންތެރިންގެ މައްޗަށް އޮތް ސްކޮޑަކާ އެކު އެވެ.

މީގެ ކުރިން ރާއްޖޭގައި ފުޓުބޯޅައިގައި ގިނަ ކާމިޔާބީތަަކެއް ހޯދާފައިވާ ވެލެންސިއާ އަށް މި ފަހުން ދިމާވި އެންމެ ބޮޑު މައްސަލަ އަކީ މާލީ ދަތިކަމުގެ މައްސަލަ އެވެ. އެގޮތުން ދުނިޔޭގެ ފުޓުބޯޅަައިގެ މައި އިދާރާ (ފީފާ) އިން 2022 ވަނަ އަހަރު ވެލެންސިއާ އަށް ފިޔަވަޅު އެޅިއިރު، އެ މައްސަލައިގައި އެ ޓީމަށް އެއްވެސް ކުޅުންތެރިޔަކު ރަޖިސްޓްރީ ނުކުރެވޭ ގޮތަށް އޮތީ ނިންމައިފަ އެވެ. އެއީ ބިދޭސީ ކުޅުންތެރިންގެ މުސާރައިގެ މައްސަލައިގަ އެވެ.

ނަމަވެސް ވެލެންސިއާގެ މެނޭޖުމަންޓު ބަދަލުވެ، މިހާރު އެ ކުލަބުން އަންނަނީ އަނެއްކާ ވެސް އިހުގައި އޮތް އަމާޒަށް ވާސިލުވުމުގެ މަސައްކަތް ވަރަށް ބޮޑަށް ކުރަމުންނެވެ. އެގޮތުން ވެލެންސިއާގެ އައު މެނޭޖުމަންޓް އިން އެންމެ ބޮޑު އިސްކަމެއް ދެމުން އަންނަނީ ދަރަނިތައް އަދާކޮށް، ކުލަބު ހަމަ މަގަށް އަޅުވައި، ރަނގަޅު ސްކޮޑަކާ އެކު ސީޒަން ފެށުމަށެވެ.