އެއްވެ އުޅުމުގެ މިނިވަންކަން ބޭނުންކޮށްގެން ދައުވާ ކުރި ފުރަތަމަ މީހަކީ މުޢިއްޒު: ވައްޑޭ

ފެހި ގާނޫނު އަސާސީ 2007 ވަނަ އަހަރު ތަސްދީގު ކުރެވުނު ފަހުން އަލަށް އެއްވެ އުޅުމުގެ މިނިވަންކަން ބޭނުންކޮށްގެން ދައުވާކުރި ފުރަތަމަ މީހަކީ ރައިސް ޑރ މުޙައްމަދު މުޢިއްޒު ކަމަށް އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ.

ދ. ކުޑަހުވަދޫގައި އެމްޑީޕީ އިން ބޭއްވި ޖަލްސާގައި ވާހަކަ ދައްކަވަމުން ވަހީދު ވިދާޅުވީ ސަންގު ނޫހުގެ ޒަމާނުގައި ސިއްރު ލިޔުން އަޅައިގެން ފާރު ފާރުގައި ސިއްރު ޝިއާރު ޖަހައިގެން އުޅުނު ޒަމާނުގެ ހާލަތައް އަލުން ރާއްޖޭގައި ހިޔާލު ފާޅުކުރުމުގެ ހައްގު ހަނިކުރަން ރައީސް މުޢިއްޒު އެ ނިކުންނެވީ ލަދެއް ހަޔާތެއް ނެތި ކަމަށެވެ. އަދި ގާނޫނު އަސާސީ ތަސައްވަރު ކުރާ އެންމެ ބޮޑު ބާރު ރައްޔިތުން މަޖިލީސް މިއަދު އެވަނީ އެސްޓީއޯ ފުއްގުދަނަށް ހަދާފައިކަމަށް ވިދާޅުވެ ވަހީދު ވަނީ ފާޑު ވިދާޅުވެފަ އެވެ.

ރައްޔިތުންގެ މަންދޫބުންގެ ނަމުގައި މީހުންތަކެއް ގުދަން ކުރާތާކަށް އެތަން އެވަނީ ހަދާފަ، އެސްޓީއޯ ފުއްގުދަނެކޭ އެތަނެކޭ ކޮބައިތޯ ތަފާތަކީ މީގެ ދެތިން ބޭފުޅަކު ވަރަށް ހިތްވަރު ކުރައްވާ، ތިބޭއިރު 93 ތިބޭއިރު އޭގާ 80 އަށްވުރެ ގިނައީ ހަމަ 80 ފުއްބަސްތާއެކޭ އެޔެކޭ ނެތް ތަފާތެއް ޝަރުއީ ނިޒާމެކޭ އަނެއް ޝަރުޢި ގުދަނެކޭ އެއްގޮތް މިނިވަން މުއައްސަސާތަކަކީ ދެން ތަންކޮޅެއް ކުދިކުދި ގުދަން އެއީ ހަމަ ޖަހާފަ ހުންނަ ފަސް ފުއްބަސްތާއެކޭ ފަސް ކޮމިޝަނަރުންނެކޭ ތަފާތެއް ނެތް ދައްކާ ވާހަކައެއް ނެތް ކުރާ ކަމެއް ނެތް އެމީހުންނަކަށް ކަންބޮޑުވާ މައްސަލައެއް ނެތް

އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ)

ވަހީދު ވިދާޅުވީ މިދައުލަތް ވަނީ މުޢިއްޒުގެ މުދާ ރައްކާ ކުރާ ގުދަނަކަށް ވެފައި ކަމަށާއި ލާމަރުކަޒީ ނިޒާމް އަލުން އަނބުރާ މަރުކަޒީ ކުރުމުގެ ނުރައްކާތެރި މަސައްކަތް ވެސް ފަށާފައިވާކަމަށެވެ. އަދި މީގެ 8 މަސް ފަހުން އޮން ލޯކަލް ކައުންސިލް އިންތިހާބަކީ ދައުރު މެދުތެރެއިން މުޢިއްޒަށް ނުރުހޭ ބުނަން ލިބޭ އެންމެ ސާފު ފުރުސަތު ކަމަށް ވަހީދު ވިދާޅުވި އެވެ.

ވަހީދު ވިދާޅުވީ އަންނަ އަހަރު އޭޕްރިލް މަހު އޮންނަ ލޯކަލް ކައުންސިލް އިންތިހާބުގައި އެންމެން ގުޅިގެން ތަރުތީބު ވެގެން ރޭވުންތެރިކަމާއެކީ އިންތިޒާމުވެގެން ނުކުމެ މުޢިއްޒު ބޮޑުތަނުން ބަލިކުރުން އެއީ ގައުމީ ވާޖިބެއް ކަމުގައި ދެކެންޖެހޭ ކަމަށެވެ.