މި ސަރުކާރަކީ ފޮތިގަނޑުން ބޮޑު ކޭމެއް ކަމަށާއި އެތެރެ އޮތީ ހުސްކޮށް ކަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.

އޭނާ އެފަދައިން ވިދާޅުވީ، ދ. ކުޑަހުވަދޫގައި އެމްޑީޕީ އިން ބޭއްވި ޖަލްސާގައި ވާހަކަ ދައްކަވަމުންނެވެ. ޒިޔާދު ވަނީ މި ސަރުކާރުން ބޮޑެތި ވައުދުތައް ވީ ނަމަވެސް އެ ކަންކަން ނުކުރެވޭކަމަށް ފާހަގަކުރައްވާފައެވެ.

ޚުދުމުހުތާރުކޮށް ކަންކަން ކުރާ ކަމަށް ފާހަގަކުރައްވާ ޒިޔާދު ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން ޒިޔާދު ވަނީ މި ސަރުކާރުން ކައުންސިލްތަކުގެ ބާރުވެރިކަން އެއްކޮށް ގެއްލުވާލާފައިވާ ކަމަށް ފާހަގަކުރައްވާފައެވެ. އަދި އެއްވެސް ރަށެއްގައި އެއްވެސް މަޝްރޫޢު އެއް ނުހިނގާ ކަމަށާއި އެކަންކަމާއި ސަރުކާރުން ޖަވާބުދާރީ ވާން ބޭނުން ނުވާ ކަމަށް ޒިޔާދު ވިދާޅުވިއެވެ. ސަރުކާެރުން ބޮޑެތި މަޝްރޫޢުތައް ހިންގާ ކަމަށް ދެއްކި ނަމަވެސް ކަންކަން ހިނގަނީ އެހެން ނޫން ކަމަށް ޒިޔާދު ވިދާޅުވިއެވެ. މި ސަރުކާރަކީ ސްކޭމް ސަރުކާރެއް ކަމަށް އާއްމުން ސިފަކުރަނީ އެހެން ވެގެން ކަމަށް ޒިޔާދު ވަނީ ވިދާޅުވެފައެވެ.

" އަހަރު ނިމެނީ. ނެތޭ މި ދައުރު ތެރޭގައި ބަރަވެއްޔެއް ވެސް ތޮށި ބަދަލުކޮށްލާފައި އަލަކަށް. މިއީ ގައުމުގެ ހާލަތު. މި ކިޔާދިނީ ސަރުކާރުގެ ސިޔާސަތު." އޭނާ ވިދާޅުވިއެވެ.

މިހާރު ބާކީ ސަލާމަތުން އޮތީ ނޫސްވެރިކަން އެކަނި ކަމަށާއި މިހާރު ސަރުކާރުން މަސައްކަތް ކުރަނީ އެ ނޫސްވެރިކަން ވެސް ނައްތާލަން ކަމަށް އޭނާ ވިދާޅުވިއެވެ. ޒިޔާދު ވިދާޅުވީ ނޫސްވެރިކަން ހިމާޔަތްކުރުމަކީ ހަމައެކަނި ނޫސްވެރިންގެ ޒިންމާ އެއް ނޫން ކަމަށެވެ. ސަރުކާރުން ކުރާ ނޭދެވޭ ކަންކަން ކިރިޔާ ވެސް އާއްމުންނަށް އެނގެނީ ނޫސްވެރިންގެ ސަބަބުން ކަމަށް އޭނާ ވަނީ ވިދާޅުވެފައެެވެ.