މެދު އިރުމަތީގެ މައްސަލަ އާއި، ޔުކްރެއިންގެ ހަނގުރާމައާ ގުޅޭ ގޮތުން މެކްރޮން އާއި ރަމަފޯސާ މަޝްވަރާ ކުރައްވައިފި

މެދު އިރުމަތީގެ ޙާލަތާއި، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގެ ޙާލަތާ ގުޅޭ ގޮތުން ފްރާންސްގެ ރައީސް އިމަނުއެލް މެކްރޮން އަދި ދެކުނު އެފްރިކާގެ ރައީސް ސައިރިލް ރަމަފޯސާ މަޝްވަރާ ކުރައްވައިފި އެވެ.

މެކްރޮން އާއި ރަމަފޯސާ މަޝްވަރާ ކުރައްވާފައި ވަނީ ހޮނިހިރު ދުވަހު ފޯނުން ގުޅުއްވައިގެންނެވެ. އެކަމާ ގުޅިގެން މެކްރޮން އޭނާގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވީ، މަޝްވަރާ ތަކުގައި ވާހަކަ ދައްކާފައި ވަނީ މިދިޔަ ހޯމަ ދުވަހު އެމެރިކާގެ ރިޔާސީ ގަނޑުވަރު ވަައިޓް ހައުސްގައި ކުރިއަށް ދިޔަ ބައްދަލުވުމާ ގުޅޭ ގޮތުން ކަމަށެވެ.

ޚާއްސަކޮށް ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގެ ޙާލަތާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައިވެ އެވެ. މީގެ އިތުރުން ގްރޭޓް ލޭކް ސަރަހައްދާ ގުޅޭ ގޮތުން ވެސް މަޝްވަރާތައް ކުރިއަށް ގެންދަވާފައިވާ ކަމަށް މެކްރޮން ވަނީ ވިދާޅުވެފަ އެވެ.

އެ މަޝްވަރާތަކުގައި މެކްރޮން އާއި ރަމަފޯސާ ވެސް ވަނީ، ކުރިއަށް އޮތް ސެޕްޓެމްބަރު މަހު އެމެރިކާގެ ނިއު ޔޯކުގައި އޮންނަ އދ ގެ އާންމު މަޖިލީހިގެ ބައްދަލުވުމުގެ ތެރޭގައި ދެ ބޭފުޅުން ބައްދަލު ކުރެއްވުމަށް އެއްބަސްވެފަ އެވެ.

މި ބައްދަލުވުމަކީ ބައިނަލްއަޤުވާމީ މައިދާނުގައި ދިމާވެފައިވާ މުހިންމު މައްސަލަތަކާ ގުޅޭ ގޮތުން ދެ ޤައުމުގެ ދެ މެދުގައި އޮތް ގުޅުން ބަދަހި ކުރުމުގެ އިތުރުން، އިތުރު މަޝްވަރާތަކަށް މަގު ފަހި ކޮށްދޭނެ ބަައްދަލުވުމެއް ކަމަށް ބެލެވެ އެވެ.

މީގެ އިތުރުން މި މަޝްވަރާތަކަކީ ޔުކްރެއިން ހަނގުރާމަ އަދި މެދު އިރުމަތީގެ ހަމަޖެހުންތަކާ ގުޅޭ ގޮތުން ބައިނަލްއަޤުވާމީ މުޖުތަމައުގެ އެއްބާރުލުން ހޯދުމަށް ފްރާންސް އިން ކުރަމުންދާ މަސައްކަތުގެ ތެރެއިން ކުރެވުނު މަޝްވަރާތަކެކެވެ.

ފްރާންސް އިން ވަނީ އަންނަ ސެޕްޓެމްބަރު މަހު އޮންނަ އދ ގެ އާންމު މަޖިލީހުގެ ބައްދަލުވުމުގައި ފަލަސްޠީނުގެ މިނިވަން ދައުލަތް ބަލައި ގަންނަން ރަސްމީކޮށް އިއުލާން ކުރާނެ ކަމަށް ހާމަކޮށްފަ އެވެ. ފްރާންސްގެ އިތުރުން އިނގިރޭސިވިލާތް، ކެނެޑާ، އޮސްޓްރޭލިއާ އަދި ބައެއް އެހެން ޤައުމު ތަކުން ވެސް ފަލަސްޠީނުގެ މިނިވަން ދައުލަތް ބަަލައި ގަންނަން ވަނީ ނިންމައިފަ އެވެ.