ރައްޔިތުންގެ ޕްރެޝަރ ބޮޑުވެ، މާލެ ސަރަހައްދުގެ ކުރިއަށްދާ ބިން ހިއްކުމުގެ މަޝްރޫޢުތައް ހަލުއިކުރަން އެޗްޑީސީން ނިންމައިފި
23 އޯގަސްޓު 2025 | ހޮނިހިރު 07:03ބިން ހިއްކުމުގެ މަޝްރޫއުތައް އަވަސް ކުރުމަށް އޮކްޓޯބަރު މަހުގެ ތެރޭގައި ތިން ޑްރެޖަރު ގެންނަން ވަނީނނިންމާފަ
ރަސްމާލެ ބިން ހިއްކުން
މާލޭ ސަރަހައްދުގައި ކުރިއަށްދާ ބިން ހިއްކުމުގެ މަޝްރޫއުތަކުގެ މަސައްކަތް ވަރަށް ބޮޑުތަނުން ލަސްވެ ރައްޔިތުންގެ ކަންބޮޑުވުންތައް އިންތިހާއަށް ގޮސް، ސަރުކާރަށް ޕްރެޝަރ ބޮޑުވުމުން، ބިން ހިއްކުމުގެ މަޝްރޫއުތަކުގެ މަސައްކަތް އަވަސް ކުރުމުގެ ގޮތުން ތިން ޑްރެޖަރު ގެންނަން ހަމަޖެހިފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.
އެޗްޑީސީން ނެރުނު ބަޔާނެއްގައި ބުނީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުތަކުގެ ތެރެއިން އެންމެ މުހިއްމު އެއް ވައުދަކީ ބޯހިޔާވަހިކަމުގެ މައްސަލައަށް ހައްލެއް ހޯދުން ކަމަށްވާތީ ހުޅުމާލޭގެ ތިންވަނަ ފިޔަވަހީގެ ބިން ހިއްކުމާއި، ގުޅިފަޅާއި ގިރާވަރުފަޅު އަދި އުތުރުތިލަފަޅު ބިން ހިއްކުމުގެ މަސައްކަތް ކުރަމުންދާ ކަމަށެވެ.
އެގޮތުން ބިންތައް ހިއްކުމުގެ މަޝްރޫއުތައް އަވަސްކުރުމުގެ ގޮތުން މިއަހަރުގެ އޮކްޓޯބަރު މަހުގެ ތެރޭގައި 45،000 ޓަނުގެ ދެ ހޮޕާ ޑްރެޖަރާއި 11،000 ޓަނުގެ ހޮޕާ ޑްރެޖަރެއް ބޭނުންކުރަން ނިންމާފައިވާ ކަމަށެވެ.
އެޗްޑީސީ އިން ވަނީ ބިން ހިއްކުމުގެ މަސައްކަތްތައް ހުއްޓުމެއް ނެތި ވީހާވެސް އަވަހަށް ކުރިއަށް ގެންދިއުމަށް ކުރިމަތިވެދާނެ ގޮންޖެހުންތައް ދެނެގަނެ އެކަންކަން ހައްލުކުރުމަށްޓަކައި ކަމާބެހޭ ފަރާތްތަކާ އެކު މަސައްކަތް ކުރަމުންދާ ކަމަށްވެސް ބުނެފަ އެވެ.
ތަފާތު އެކި ސަބަބުތަކާއި އެކު ރަސްމާލެ ހިއްކުން އެކި ފަހަރު މަތިން ވަނީ ހުއްޓާލާފައެ އެވެ.
ސަރުކާރުގެ ބިން ހިއްކުމުގެ މަޝްރޫއުތައް ކުރިއަށްދާގޮތް ބެލުމަށް ނިމިދިޔަ ހަފްތާގެ ތެރޭގައި އެމްޑީޕީގެ ޕާލަމެންޓަރީ ގްރޫޕްގެ ބައެއް މެންބަރުންވަނީ ރަސްމާލެއަށް ވަޑައިގެން އެ ތަނުގެ މަަަސައްކަތް ކުރިއަށްދާ ގޮތް ބައްލަވާލައްވާފަ އެވެ.
ރަސްމާލޭގެ ބިން ހިއްކުމުގެ މަޝްރޫއު ކުރިއަށްދާ ގޮތާއި ގުޅޭގޮތުން ފާޅު ވިދާޅުވަމުން، އެމްޑީޕީގެ ޑެޕިއުޓީ ޕީޖީ ލީޑަރު އަދި ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވިގޮތުގައި، ރައީސް މުއިއްޒުގެ ސަރުކާރުން ހިންގާ އެންމެ ބޮޑު ބޯހިޔާވެހިކަމުގެ މަޝްރޫއު ކަމަށްވާ ރަސްމާލެ މަޝްރޫއުގެ މަސައްކަތް މިހާރު ކުރިޔަށްދާ ސްޕީޑުން، މި މަޝްރޫއު ނިންމަން މުއިއްޒަށް 30 އަހަރުގެ 2 ދައުރު ބޭނުންވާނެ ކަމަށެވެ.
ރަސްމާލެ މަޝްރޫއުގެ ދަށުން 1153 ހެކްޓަރުގެ ބިން 8 މަސް ދުވަސްތެރޭ ހިއްކާ ނިންމާނެ ކަމަށް ރައީސް މުއިއްޒު ވަނީ މީގެ ކުރިން ވިދާޅުވެފަ އެވެ. މި މަސައްކަތުގެ އެއްވެސް އަދާހަމައެއް ރަސްމީކޮށް، ސަރުކާރުން މިހާތަނަށް ހާމަކޮށްފައިނުވާއިރު، ސަރުކާރުގެ އެކްޓިވިސްޓުންތަކެއް ރަސްމާލެ މަޝްރޫއު ބަލަން ފުށިދިއްގަރުފަޅަށް ގޮސް، ނަގާފައިވާ ވީޑިއޯތަކުން ހާމަވި ގޮތުގައި މިހާރު އޭގެ ފަހުން 20 މަސް ދުވަސް ފާއިތުވެފައި ވާއިރު ހިއްކިފައިވަނީ އެންމެ 129 ހެކްޓަރުގެ ބިމެވެ. މިއީ މި މަޝްރޫއުގެ ދަށުން ހިއްކަން ހަމަޖެހިފައިވާ ބިމުގެ އެންމެ 12 އިންސައްތަ އެވެ.
ރަސްމާލެ މަޝްރޫއަކީ ރާއްޖެއަށް ދިމާވެފައިއޮތް ބޯހިޔާވަހިކަމުގެ މައްސަލައަށް ދާއިމީ ހައްލު ގެނައުމުގެ ގޮތުން ރައީސް ޑރ. މުޙައްމަދު މުއިއްޒު ފެއްޓެވި، އެ މަނިކުފާނުގެ އެންމެ ބޮޑު މަޝްރޫ އެވެ. މަޝްރޫއު ހިންގުމަށް ސަރުކާން އެންމެ ލޯ ލާރި އެއްވެސް ހަރަދު ނުކުރާނެ ކަމަށް ރައީސް މުއިއްޒު މީގެ ކުރިން ވިދާޅުވެފައި ވީނަމަވެސް، ސަރުކާރު ހިއްސާވާ ބައެއް ކުންފުނި ތަކުގެ ނަމުގައި ލޯނު ނަގައިގެން މި މަޝްރޫ އަށް ފައިނޭންސް ކުރުމަށް ސަރުކާރުން މިހާރު ދަނީ ތައްޔާރު ވަމުން ކަމަށް ސަރުކާރުން ބުނެ އެވެ.
އެ މަޝްރޫއަށް ފުރަތަމަ އެއްބަސްވުމެއް ހެދީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީސީސީ)އާ އެކުގަ އެވެ. އެކަމަކު، ސަރުކާރުން ވަނީ، ކޮންޓްރެކްޓަރަށް ބިންތަކެއް ނުދީ މަޝްރޫއު ގެންދަން ބޭނުންވާ ކަމަށް ބުނެ އެ އެއްބަސްވުން ބާތިލުކޮށްފަ އެވެ.
