ޣައްޒާ ސިޓީ ހިފުމުގެ ޕްލޭނަށް، އިސްރާއީލްގެ ދިފާއީ ވަޒީރު ރުހުން ދީފި

ޣައްޒާ ސިޓީ ހިފައި، މުޅި ޣައްޒާގެ ކޮންޓްރޯލް ހޯދުމަށް އިސްރާއީލްގެ ސެކިއުރިޓީ ކެބިނެޓް އިން ނިންމާފައިވާ ނިންމުމަށް، އެ ޤައުމުގެ ދިފާއީ ވަޒީރު އިސްރާއީލް ކާޓްޒް ރުހުން ދީފި އެވެ.

އިސްރާއީލްގެ ދިފާއީ ވަޒީރު ކާޓްޒް ވަނީ، ޣައްޒާ ސިޓީ ހިފުމަށް ހުށަހަޅާފައިވާ އަސްކަރީ ޕްލޭން ފާސްކޮށް، އެ އޮޕަރޭޝަން އަށް 60،000 އަސްކަރީ ރިޒާވިސްޓުން ގެނައުމަށް ހުއްދަ ދީފަ އެވެ. އެކަން އިސްރާއީލްގެ ދިފާއީ ވުޒާރާ އިން ވަނީ ބުދަ ދުވަހު ކަށަވަރު ކޮށްދީފަ އެވެ.

މި ނިންމުމަކީ އިސްރާއީލް އާއި ހަމާސް ޖަމާއަތާ ދެމެދު ހިނގަމުން ގެންދާ ހަނގުރާމައިގެ އައު ބާބެއްގެ ފެށުން ކަމަށް ސަލާމަތީ ދާއިރާގެ މާހިރުން އަންނަނީ ފާހަގަ ކުރަމުންނެވެ. ޣައްޒާ ސިޓީ އަކީ ހަމާސް ޖަމާއަތުގެ މައި އަދި މުހިންމު މަރުކަޒުތައް ހުރި ސަރަހައްދު ކަަމަށް ވުމާ އެކު، އެ ސަރަހައްދު ހިފުމަކީ އިސްރާއީލްގެ އަސްކަރީ އޮޕަރޭޝަންގެ މުހިންމު ލަނޑު ދަނޑިއެއް ކަމަށް ވަނީ ކަނޑައަޅައިފަ އެވެ.

އިސްރާއީލްގެ ދިފާއީ ވުޒާރާ އިން މައުލޫމާތު ދީފައިވާ ގޮތުގައި، މި އޮޕަރޭޗަނަށް ގެނެވޭ ރިޒާވިސްޓުންނަކީ ތަޖުރިބާކާރު އަސްކަރީ މުވައްޒަފުންނެވެ. އަދި މި އޮޕަރޭޝަން އަށް ބޭނުންވާ ހަތިޔާރާއި، އެހެނިހެން ވަސީލަތްތައް ވެސް ވަނީ ތައްޔާރު ކޮށްފައި ކަމަށް ބުނެފައިވެ އެވެ.

މުޅި ޣައްޒާ ސިޓީ އެއްކޮށް ހިފުމަށް ހުށަހަޅާފައި ވަނީ އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެވެ. އަދި އޭނާގެ ހުށަހެޅުން ސެކިއުރިޓީ ކެބިނެޓުން ފާސްކޮށްފައިވާއިރު، ޣައްޒާ ހަނގުރާމަ ހުއްޓާލުމަށް ގޮވާލައި އިސްރާއީލް ގައި އަންނަނީ މުޒާހަރާ ވެސް ކުރަމުންނެވެ.

ޣައްޒާ ސިޓީ ހިފުމަށް ނަތަންޔާހޫ ނިންމާފައި ވަނީ، ހަމާސް އިން ރަހީނު ކޮށްފައިވާ އިސްރާއީލްގެ ރައްޔިތުންގެ ތެރެއިން ދެ މީހެއްގެ ވީޑިއޯ އާންމު ކޮށްފައި ވަނިކޮށެވެ. އެ ދެ މީހުންގެ ޙާލަތު އިންތިހާ އަށް ދަށްވެފައިވާއިރު، ނަތަންޔާހޫ ބުނެފައި ވަނީ އެ މީހުން މިނިވަން ކުރަން ދެން އިސްރާއީލް އިން ހަނގުރާމަ ކުރިއަށް ގެންދާނެ ކަމަށެވެ.

އިސްރާއީލް އިން ކުރިއަށް ގެންދަން ރާވާފައިވާ މި އޮޕަރޭޝަންގެ ސަބަބުން ޣައްޒާގެ ރައްޔިތުންނަށް ކުރިމަތި ވެދާނެ ގެއްލުންތަކާ މެދު ބައިނަލްއަޤުވާމީ މުޖުތަމައުގެ ކަންބޮޑުވުން ވަނީ ފާޅު ކޮށްފަ އެވެ. އަދި އިސްރާއީލް އިން ނިންމާފައިވާ އެ ނިންމުމަށް ގިނަ ޤައުމުތަކަކުން އަންނަނީ ފާޑު ވެސް ކިޔަމުންނެވެ.

އިސްރާއީލް އިން މި ފަދަ ނިންްމުމެއް ނިންމާފައިވާއިރު، އަންނަ ސެޕްޓެމްބަރު މަހު އޮންނަ އދ ގެ ޖެނަރަލް އެސެމްބްލީގައި ފަލަސްޠީނުގެ މިނިވަން ދައުލަތް ބަލައި ގަންނަން ގިނަ ޤައުމު ތަކަކުން ވަނީ ނިންމައިފަ އެވެ. އޭގެ ތެރޭގައި ފްރާންސް، އިނގިރޭސިވިލާތް، ކެނެޑާ، އޮސްޓްރޭލިއާ، މޯލްޓާ އަދި އެހެން ޤައުމުތައް ވެސް ހިމެނެ އެވެ.