ޓްރަމްޕުގެ ޣައްޒާ ސުލްހައިގެ ޕްލޭން އަވަހަށް ފާސް ކުރުމަށް އެމެރިކާ އާއި އަރަބި ގައުމު ތަކުން ގޮވާލައިފި

ހޯމަ ދުވަހު އދ ގެ ސަލާމަތީ މަޖިލީހުގައި އެމެރިކާގެ ރައީސް ޑޮނަލްޑް ޓްރަމްޕްގެ ޣައްޒާގެ ސުލްހައިގެ ޕްލޭނާ ބެހޭ ގަރާރަކަށް ވޯޓު ދޭނެ ކަމަށް ޑިޕްލޮމެޓުން ބުނެފިއެވެ.

ފާއިތުވި ހަފްތާގައި އެމެރިކާ އިން އިސް ނަގައިގެން ރަސްމީކޮށް 15 މެންބަރުންގެ ސަލާމަތީ މަޖިލީހުގެ ތެރޭގައި، އިޒްރޭލާއި ހަމާސް އާ ދެމެދު ދެ އަހަރު ދުވަހު ކުރިއަށްދިޔަ ހަނގުރާމަ ހުއްޓުވުމަށް ފަހު ކުރިއަށް ގެންދިއުމަށް އެކުލަވާލަފައިވާ ޕްލޭނަށް ބާރުދޭ ގަރާރުގެ ޑްރާފްޓުގެ މަޝްވަރާތައް ވަނީ ފަށާފަ އެވެ.

އޭއެފްޕީން ރިޕޯޓު ކުރި ގޮތުގައި ރިޒޮލިއުޝަންގެ ތިންވަނަ ޑްރާފްޓުގައި "ބޯޑް އޮފް ޕީސް ގާއިމުކުރުމަށް" ހުށަހަޅާފައިވާ އިރު، އެ ބޯޑަކީ ޣައްޒާގެ އިންތިގާލީ ވެރިކަން ކުރާ އިދާރާއެއް ގާއިމްކުރުމަށްފަހު ޓްރަމްޕް ރިޔާސަތު ބަލަހައްޓާ ގޮތަށް 2027 ވަނަ އަހަރުގެ ނިޔަލަށް މެންޑޭޓެއް ހިމެނޭ ބޯޑެކެވެ.

މި ޑްރާފްޓް ފާސްވެއްޖެ ނަމަ މެންބަރު ގައުމުތަކަށް "ވަގުތީ އިންޓަނޭޝަނަލް ސްޓެބިލައިޒޭޝަން ފޯސް (އައިއެސްއެފް)" އުފެއްދުމަށް ހުއްދަ ލިބިގެންދާނެ އެވެ. އަދި މި ފޯސް އިން އިޒްރޭލާއި މިސްރާއި އަލަށް ތަމްރީނުކުރެވޭ ފަލަސްތީނު ފުލުހުންނާ އެކު މަސައްކަތްކޮށް، ސަރަހައްދީ ރައްކާތެރިކަން ކަށަވަރުކޮށް، ޣައްޒާ އިން ހަތިޔާރު އެޅި ފަރާތްތައް އެއްކޮށް ނައްތާލަން މަސައްކަތް ކުރާނެ އެވެ.

އަދި އާންމުން ރައްކާތެރިކުރުމާއި އިންސާނީ އެހީގެ ކޮރިޑޯތައް ރައްކާތެރިކުރުމުގެ މަސައްކަތް ވެސް ކުރާނެއެވެ. ހަމަ މިއާއެކު ޣައްޒާ ގައި ހަތިޔާރު އެޅި ހަނގުރާމަވެރިން ތިބުން ނިމުމަކަށް ގެނައުމަށް މި ފޯސް އަށް ބާރު ލިބިގެންދާނެ އެވެ.

ކުރީގެ ޑްރާފްޓްތަކާ ހިލާފަށް، އެންމެ ފަހުގެ ޑްރާފްޓުގައި މުސްތަގުބަލުގައި ފަލަސްތީނު ސަރުކާރެއް އުފެދިދާނެކަމުގެ ވާހަކަ ބުނެފައިވެ އެވެ.

ފަލަސްތީނު އޮތޯރިޓީން އެދިފައިވާ އިސްލާހުތައް ހިމަނައި، ޣައްޒާ އަލުން އާރާސްތު ކުރަން ފަށައިފިނަމަ، ފަލަސްތީނު ރައްޔިތުންގެ މިނިވަންކަމާއި ސަރުކާރެއް ގާއިމްކުރުމަށް މަގު ފަހިވެގެންދާނެ ކަމަށް ޑްރާފްޓުގައި ބުނެފައިވެ އެވެ. ޑްރާފްޓުގައި އިތުރަށް ބުނެފައިވަނީ އެމެރިކާއިން އިޒްރޭލާއި ފަލަސްތީނާ ދެމެދު މަޝްވަރާތައް ބޭއްވުމަށް ހަމަޖެހިފައިވާ އިރު މި މަޝްވަރާތަކުގައި ސިޔާސީ އަދި ހަމަޖެހުން ގާއިމްކޮށް އެއްފަރާތުން އަނެއް ފަރާތުގެ ކަންކަމާއި ނުބެހި އުޅޭވޭނެ ގޮތަށް ކަންކަން ފަހިކުރެވިގެންދާނެ ކަމަށެވެ.

އެމެރިކާ އާއި މިސްރު، ސައުދީ އަރަބިއާ އަދި ތުރުކީ ފަދަ ގިނަ އަރަބި އަދި މުސްލިމް އަގުލަބިއްޔަތު ބޮޑު ގައުމުތަކުން އދ ގެ ސަލާމަތީ މަޖިލީހުން ވީހާވެސް އަވަހަކަށް ގަރާރު ފާސްކުރުމަށް ގޮވާލާފައިވެ އެވެ.

އަނެއްކޮޅުން ޣައްޒާގެ ކުރިމަގު ބައްޓަން ކުރެވިދާނެ ގޮތްތައް ބަޔާންކޮށް، ރަޝިޔާއިން ވެސް އދ ގެ ސަލާމަތީ މަޖިލީހަށް ގަރާރެއް ހުށަހަޅާފައިވެ އެވެ. ރަޝިޔާގެ ގަރާރުގައި ޣައްޒާގައި ހަމަޖެހުން ގާއިމުކޮށް، އަމަން ބެލެހެއްޓުމަށް ބައިނަލްއަގުވާމީ ސުލްހަ ބަލަހައްޓާ ފައުޖެއް އެކުލަވައިލުމުގެ ޒިންމާ މަތިކޮށްފައި ވަނީ އދ ގެ ސެކްރެޓަރީ ޖެނެރަލްގެ މައްޗަށެވެ.

މިހާތަނަށް މަޖިލީހުގެ މެންބަރުން ސުލްހައިފެ ޕްލޭނުގެ އުސޫލުތަކަށް ތާއީދުކުރާ ކަމަށް ބުނެފައިވާއިރު، ޑިޕްލޮމެޓިކް ސޯސްތަކުން ފާހަގަކުރީ އެމެރިކާގެ ޑްރާފްޓް އާ ބެހޭގޮތުން އަދި ވެސް ސުވާލުތައް ހުރި ކަމުގައެވެ. ކައުންސިލްގެ މެމްބަރުން ބޯޑް އޮފް ޕީސް އުފެއްދުމަށް ތާއީދު ކުރާ ކަމަށް ފެނުނު ނަމަވެސް، ސެކިއުރިޓީ ކައުންސިލުގެ ދައުރު ލިޔުމުގައި ނެތުމާއި، ފަލަސްތީނު އޮތޯރިޓީއަށް މުސްތަގުބަލުގައި އޮތް ދައުރަކީ ކޮބާތޯ ފަދަ ސުވާލުތައް ފާހަގަ ކޮށްފައި ވެއެވެ.