ތައިލެންޑުގެ ޕްރިންސެސްގެ ޞިއްޙީ ޙާލަތު ސީރިއަސް

ތައިލެންޑުގެ ޕްރިންސެސް ބަޖްރަކިޓިޔާބާ ނަރެންދިރާ ޑެބްޔަވަޓީގެ ޞިއްޙީ ޙާލަތު ސީރިއަސް ކަމަށް، ތައިލެންޑުގެ ރޯޔަލް ޕެލަސް އިން ހާމަކޮށްފި އެވެ.

ހުކުރު ދުވަހު ރޯޔަލް ޕެލަސް އިން ހާމަކޮށްފައިވާ ގޮތުގައި އުމުރުން 46 އަހަރުގެ ޕްރިންސެސް ބަޖްރަކިޓިޔާބާގެ ލޭގައި ނުރައްކާތެރި އިންފެކްޝަނެއް ޖެހި، މިވަގުތު ވެސް ގެންދަވަނީ ޑޮކްޓަރުންގެ ފަރުވާ ހޯއްދަވަމުންނެވެ. 

މިއީ 2023 ވަނަ އަހަރު ފަހުން، ޕްރިންސެސްގެ ޞިއްޙީ ޙާލަތާ ގުޅޭ ގޮތުން ރޯޔަލް ޕެލަސް އިން އެއްޗެއް ހާމަކޮށްފައިވާ ފުރަތަމަ ފަހަރެވެ. 

ކިންގް މަހާ ވަޖިރަލޯންކޯންގެ އެންމެ ދޮށީ ދަރިފުޅު، ޕްރިންސެސް ބަޖްރަކިޓިޔާބާ ވަނީ 2022 ވަނަ އަހަރުގެ ޑިސެމްބަރު މަހު ހޮސްޕިޓަލްގައި އެޑްމިޓު ކޮށްފަ އެވެ. އެއީ ހިތުގެ ބައްޔެއްގެ ސަބަބުން ހޭނެތުމަށް ފަހު އެވެ. ރޯޔަލް ޕެލަސް އިން ނެރުނު ބަޔާނުގައި ވަނީ އެކަން ހާމަކޮށްފަ އެވެ. 

މީގެ އިތުރުން ޕްރިންސެސްގެ ފުއްޕާމެ އާއި ކިޑްނީގެ މަސައްކަތް ދެމެހެއްޓުމަށްޓަކައި ބޭހާއި، ޚާއްސަ ޞިއްޙީ އާލާތްތައް ބޭނުން ކުރަމުންދާ ކަމަށް ވެސް ރޯޔަލް ޕެލަސް އިން ވަނީ ބުނެފަ އެވެ. 

ފާއިތުވި ހަފުތާގައި ލޭގައި ޖެހިފައިވާ ނުރައްކާތެރި އިންފެކްޝަނަށް ފަރުވާ ދިނުމަށް އެންޓިބަޔޯޓިކްސް ދެވިފައިވާ ކަމަށް ވެސް ބުނެފައިވެ އެވެ. އަދި ލޭގެ ޕްރެޝަރު ހިފެހެއްޓުމަށްޓަކައި އިތުރު ބޭސްތައް ވެސް ދެމުން ގެންދާ ކަމަށް ޕެލަސް އިން ވަނީ ހާމަކޮށްފަ އެވެ. 

މީގެ އިތުރުން ޕްރިންސެސްގެ ޙާލަތު ރަނގަޅު ވަމުންދާކަން ކަށަވަރު ކުރުމަށްޓަކައި މެޑިކަލް ޓީމުން ވަަރަށް ގާތުން ޙާލަތު މޮނިޓާކުރަމުން ގެންދާ ކަމަށް ރިޕޯޓުތަކުގައި ވަނީ ބުނެފަ އެވެ. އެހެން ނަމަވެސް، ޕްރިންސެސްގެ ޙާލަތާ ގުޅޭ އިތުރު މައުލޫމާތު ހާމަކުރުމާ މެދު ރޯޔަލް ޕެލަސް އިން ވަކި ގޮތެއް ނިންމާފައި ނުވެ އެވެ.