ބުޑިސްޓުންނާއި މުސްލިމުންނާއި ދެމެދު ހިނގި ހަމަނުޖެހުންތަކާއި ގުޅިގެން އަވަށްޓެރި ސްރީ ލަންކާގައި އިޢުލާނުކުރި ކުއްލި ނުރައްކަލުގެ ޙާލަތު އުވާލައިފިއެވެ.

ލަންކާގެ ރައީސް، މައިތުރިޕާލާ ސިރިސޭނާ ވިދާޅުވީ، މި މާރިޗު މަހުގެ 6 ވަނަ ދުވަހު އެމަނިކުފާނު އިޢުލާނުކުރެއްވި ކުއްލި ނުރައްކަލުގެ ހާލަތު އުވާލައްވަން ނިންމެވީ އާންމު ރައްކާތެރިކަމުގެ ހާލަތު ބެއްލެވުމަށްފަހު ކަމަށެވެ.

ލަންކާގައި ކުއްލި ނުރައްކަލުގެ ޙާލަތު އިޢުލާނު ކުރީ މި މަހުގެ ކުރީކޮޅު އެ ޤައުމުގެ ކޭނޑީގައި ބުޑިސްޓުންނާއި މުސްލިމުންނާއި ދެމެދު ހިނގި ހަމަނުޖެހުންތަކުގައި ތަންތަނުގައި އަލިފާން ރޯކޮށް، މީހުންނަށާއި މުދަލަށް ބޮޑެތި ގެއްލުންތައް ލިބުމާއި ގުޅިގެން، އެ ޤައުމުގެ ހާލަތު އާންމު ހާލަތަކަށް ގެންދިއުމުގެ ބޭނުމުގައެވެ.

އެ ހަމަނުޖެހުންތަކުގައި 2 މީހުން މަރުވިއިރު، މުސްލިމުން ވިޔަފާރިކުރާ އެތައް ތަނެއްގައި ރޯކޮށް، 20 މިސްކިތަކަށް ގެއްލުން ދީފައިވެއެވެ.

މި ހަމަނުޖެހުންތައް ހިނޣާފައި މިވަނީ އެ ސަރަޙައްދުގައި ބުޑިސްޓުންނާއި މުސްލިމުންނާއި ދެމެދު ނުތަނަވަސްކަން އުފެދިފައިވާތާ އަހަރެއްހާ ދުވަސް ފަހުންނެވެ. ނުތަނަވަސްކަން އުފެދެން ދިމާވީ އެ ސަރަޙައްދުގައި އުޅޭ އެހެން ދީންތަކުގެ މީހުން އިސްލާމް ދީނަށް ވަނުމަށް މުސްލިމުން މަޖުބޫރު ކުރަމުންދާ ކަމަށާއި، ބުޑިސްޓުންގެ އާސާރީ ބިނާތަކަށް މުސްލިމުން ގެއްލުންދޭ ކަމަށް ހަރުކަށި ފިކުރުގެ ބައެއް ބުޑިސްޓުން ތުޙުމަތު ކުރުމާއި ގުޅިގެންނެވެ.