އޮފީހުގެ އެންމެ އިސްވެރިޔާ އައްޔަންކޮށް ވަކިކުރުމުގެ ބާރު މިނިސްޓަރަށް ލިބޭ އިންޓެލެކްޗުއަލް ޕްރޮޕަޓީ އޮފީހެއް ގާއިމްކުރަން ފާސްކޮށްފި
އައު އޮފީހުގެ މައިގަނޑު މަަސައްކަތަކީ އިންޓެލެކްޗުއަލް ޕްރޮޕަރޓީ ހިމާޔަތްކުރުން
އިކޮނަމިކް މިނިސްޓަރު މުހައްމަދު ސައީދު, މޯލްޑިވްސް އިންޓަލެކްޗުއަލް ޕްރޮޕަޓީ އޮފީހަށް ވެރިއަކުން އައްޔަންކުރުމުގެ ބާރު އޮތީ މިނިސްޓަރުގެ އަތުގައި
އޮފީހުގެ އެންމެ އިސްވެރިޔާ އައްޔަން ކޮށް ވަކި ކުރުމުގެ ބާރު މިނިސްޓަރަށް ލިބޭ ގޮތައް މޯލްޑިވްސް އިންޓަލެކްޗުއަލް ޕްރޮޕަޓީ އޮފީސް ގެ ނަމުގައި އައު އޮފީހެއް އުފެއްދުމަށް، ރައްޔިތުންގެ މަޖިލީހުން ފާސްކޮށްފިއެވެ.
މަޖިލީހުން މި ބިލު ފާސްކޮށްފައިވާއިރު، މަޖިލީހަށް މި ބިލު ހުށަހެޅުނު ދުވަހު ފުރަތަ ކިއުން އިއްވާ އިބްތިދާއީ ބަހުސް މަރުހަލާ ކުރިއަށް ގެންގޮސް ކޮމިޓީއަށް ފޮނުވިއެވެ. މި ބިލުގައި 4 ބާބު އަދި 34 މާއްދާ ހިމެނެއެވެ. ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ކުޑަހުވަދޫ ދާއިރާގެ މެމްބަރު ހުސެއިން ހަމީދުއެވެ.
މި ބިލުގެ ބޭނުމެއް ކަމަށް ބުނެފައި ވަނީ، ދިވެހިރާއްޖޭ ގައި ފިކުރީ މުދާ ހިމާޔާތްކޮށް ކުރިއެރުވޭނެ ހަރުދަނާ ނިޒާމެއް ގާއިމު ކޮށް ވިޔަފާރީގެ ދާއިރާ ގައި ފަންނުވެރިކަމާއި އިނޮވޭޝަން އަށް ހިތްވަރުދީ އެ ދާއިރާ ކުރިއަރުވައި ގައުމުގެ އިގްތިސާދީ ތަރައްގީ އަށް މަގުފަހި ކުރުމަށްޓަކައި މޯލްޑިވްސް އިންޓަލެކްޗުއަލް ޕްރޮޕަޓީ އޮފީހުގެ ނަމުގައި ސަރުކާރުގެ އިދާރާއެއް ގާއިމު ކޮށް އެ އޮފީހުގެ ބާރުތަކާއި މަސްއޫލިއްޔަތުތައް ބިލުގައި ބަޔާން ކުރުން ކަމަށެވެ.
މި އޮފީހުން ހިމާޔަތް ކޮށްދޭ ފިކުރީ މުދަލުގެ ތެރޭގައި ޓްރޭޑްމާކާއި، ކޮޕީރައިޓް އާއި ޕޭޓަންޓާއި، އިންޑަސްޓްރިއަލް ޑިޒައިން އާއި ޖިއޮގްރަފިކަލް އިންޑިކޭޝަންތައް ހިމެނެއެވެ.
މި ގާނޫނު ތަންފީޒު ކުރުމާއެކު އުފެދޭ މޯލްޑިވްސް އިންޓަލެކްޗުއަލް ޕްރޮޕަޓީ އޮފީހުގެ މަސްއޫލިއްޔަތުގެ ތެރޭގައި ފިކުރީ މުދާ ރަޖިސްޓަރީ ކުރުމާއި، އެފަދަ މުދަލުގެ ދަފްތަރު ބެލެހެއްޓުމާއި، ކަމާ ބެހޭ ބައިނަލް އަގްވާމީ ޖަމްއިއްޔާ ތަކާ ގުޅުން ބަދަހި ކުރުމާއި، ކަމާ ބެހޭ ބައިނަލް އަގްވާމީ މުއާހަދާ ތަކުގައި ބައިވެރިވުމުގެ ކަންކަން ކުރުމާއި، އާންމުން ހޭލުންތެރި ކުރުވުމާއި، ގާނޫނުގެ ދަށުން ޚިދުމަތްތަކަށް ކަނޑައަޅާފައިވާ ފީ ނެގުން ހިމެނެއެވެ.
އޮފީހުގެ އެންމެ އިސް ވެރިއެއްގެ ގޮތުގައި ހުންނާނީ ރެޖިސްޓްރާ އޮފް އިންޓަލެކްޗުއަލް ޕްރޮޕަޓީ ކަމަށް ބިލުގައި ވެއެވެ.
މި މަގާމަށް މީހަކު އައްޔަނު ކޮށް ވަކި ކުރާނީ މިނިސްޓަރު ކަމަށް ބުނެފައިވުމާއެކު، އެ އޮފީހުގެ މަސްއޫލިއްޔަތުތައް އަދާ ކުރުމުގައި ރަޖިސްޓްރަރ އާއި އޮފީހުގެ އެންމެހާ މުވައްޒަފުން އަމަލު ކުރަންވާނީ ސިޔާސީ އަދި އެހެނިހެން ނުފޫޒަށް ލެނބުމަކާ ނުލައި ޕްރޮފެޝަނަލް އިންޑިިޕެންޑެންސް ހިފަހައްޓައގެން ކަމަށް ބިލުގައި ވެއެވެ.
އޭނާގެ މުސާރަ ކަނޑައަޅާނީ މިނިސްޓަރުގެ ލަފާގެ މަތިން ނޭޝަނަލް ޕޭ ކޮމިޝަނުން ކަމަށް ބުނެފައިވެއެވެ.
ސިވިލް ސާވިސްގެ ނިޒާމުން ބޭރުން މި އޮފީހުގެ އެންމެ އިސް މަގާމަށް މިނިސްޓަރު އައްޔަން ކުރާ ފަރާތެއް 5 އަހަރު ދުވަހުގެ މުއްދަތައް މަގާމު ދެމި އޮންނާނެ ކަމަށް ބުނެފައިވެއެވެ. އަދި ވަކި ކުރެވޭ ފަރާތެއް ފިޔަވާ އެހެން ފަރާތްތައް ފަސް އަހަރުގެ އިތުރު ދައުރަކަށް ދެމި ހުރެވިދާނެ ކަމަށް ވެސް ބިލުގައި ވެއެވެ.
ބިލުގައި ބުނަނީ، އޮފީހުގެ އޮނިގަނޑު އެކުލަވާލާނީ، މިނިސްޓަރުގެ ލަފާގެ މަތިން ރެޖިސްޓްރާ އޮފް އިންޓަލެކްޗުއަލް ޕްރޮޕަޓީސް ކަމަށެވެ. އެ އޮފީހަށަ ބޭނުންވާ މުވަައްޒަފުންނާއި ވަސީލަތްތައް މިނިސްޓްރީގެ ފަރާތުން ހަމަޖައްސައިދޭން ވާނެ ކަމަށް ބިލުގައި ވެއެވެ.
މި ގާނޫނުގެ ދަށުން އެކުލަވާލާ ދަފްތަރުގައި ނުވަ ޝަރުތެއް ހަމަވާން ޖެހޭ
- ރަޖިސްޓްރީ ކުރެވޭ މުދަލާއި އޭގެ ކްލެސިފިކޭޝަން
- ރަޖިސްޓްރީ ކުރެވޭ ފިކުރީ މުދަލުގެ ވެރިފަރާތުގެ މައުލޫމާތު
- ރަޖިސްޓްރީ ކުރެވޭ ފިކުރީ މުދަލުގެ ވެރިފަރާތަށް ލިބިދޭ ހައްގުތައް
- ރަޖިސްޓްރީ ކުރި ތާރީހު
- ރަޖިސްޓްރީ ކުރެވޭ މުދަލަށް ހިމާޔަތް ލިބިދެވޭ މުއްދަތެއް
- ރަޖިސްޓްރީ ކޮށްފައިވާ ފިކުރީ މުދަލާ ގުޅޭގޮތުން ރަޖިސްޓްރީގައި ހިމަނަން ގާނޫނުން ލާޒިމުކުރާ މުއާމަލާތްތަކުގެ މައުލޫމާތު
- ހައްގުތައް ބަދަލުކުރެވިފައިވާނަމަ، އެކަން ނުވަތަ ލައިސަންސިން އެގްރީމެންޓެއްވާނަމަ އެކަން ހިމެނޭ ގޮތުން، ރަޖިސްޓްރޭޝަންގެ ހާލަތު
- ރަޖިސްޓްރޭޝަނަށް ގެނެވޭ އެންމެހާ ބަދަލުތައް
- ރަޖިސްޓްރީ ކޮށްފައިވާ ފިކުރީ މުދަލާ ބެހޭ، ކަމާބެހޭ ގާނޫނުގައި އަދި މި ގާނުނުގެ ދަށުން ހަދާ ގަވާއިދުގައި ބަޔާންކުރާ އެ ނޫންވެސް މައުލޫމާތު
މި ބިލުގައި ފިކުރީ މުދަލުގެ ގޮތުގައި ބަޔާންކޮށްފައިވަނީ، ރާއްޖޭގައި އަމަލުކުރެވޭ ފިކުރީ މުދަލާގުޅޭ ކަމާބެހޭ ގާނޫނުތަކުގެ ދަށުން ހިމާޔަތްކޮށްދޭ އެންމެހައި ބާވަތްތަކުގެ ފިކުރީ މުދަލަށެވެ. އޭގެ ތެރޭގައި ޓްރޭޑްމާކާއި، ކޮޕީރައިޓާއި، ޕޭޓަންޓާއި، އިންޑަސްޓްރިއަލް ޑިޒައިން އަދި ޖިއޮގްރަފިކަލް އިންޑިކޭޝަންތައް ހިމެނެއެވެ.
ހޯމަ ދުވަހުގެ މަޖިލީހުގެ ޖަލްސާގައި މި ބިލު ފާސްކުރީ ސްޓޭޓް އޯންޑް އެންޓަޕްރައިސަސް ކޮމިޓީއިން ގެނައި އަށް އިސްލާހާ އެކުއެވެ. ބިލު ފާސްކުރީ ވޯޓުގައި ބައިވެރިވި 68 މެންބަރުންގެ އިއްތިފާގުންނެވެ. މި ބިލަށް އަމަލުކުރަން ފަށާނީ 2026 ވަނަ އަހަރުން ފެށިގެންނެވެ.
