2 އަހަރުވާ އިރު ކުޑަރިކިލަށް ލިބުނީ އޭޓީއެމްއެއް އެކަނި
ސަރުކާރުން ކުޑަރިކިލަށް ވެފައިވާ 500 މީހުންގެ މިސްކިތުގެ ވައުދުގެ މަސައްކަތް އަދި ނުފެށޭ
ކުޑަރިކިލު ކައުންސިލްގެ ރައީސް އަބްދުލްހައްނާން އައްބާސް
ރައީސް ޑރ. މުހައްމަދު މުއިއްޒުގެ ސަރުކާރަށް 2 އަހަރުވާން ކައިރިވެފައިވާ އިރު ބ. ކުޑަރިކިލަށް ލިބުނީ ބޭންކް އޮފް މޯލްޑިވްސް އިން ބެހެއްޓި އޭޓީއެމް އެކަނި ކަމަށް ކުޑަރިކިލު ކައުންސިލްގެ ރައީސް އަބްދުލްހައްނާން އައްބާސް ވިދާޅުވެއްޖެއެވެ.
ރާއްޖެޓީވީއާއި ވާހަކަ ދައްކަވަމުން ކުޑަރިކިލު ކައުންސިލްގެ ރައީސް އަބްދުލްހައްނާން އައްބާސް ވިދާޅުވީ އެރަށުގައި ބިންގާ އެޅުމަށް ތައްޔާރުކޮށްފައިވާ ތަނަކީ ރައީސް ޑރ. މުހައްމަދު މުއިއްޒު ކުޑަރިކިލުގެ ސިއްހީ މަރުކަަޒަށް އިތުރުކުރެވޭ އައު އިމާރާތުގެ ބިންގާ އެޅުމުގެ ރަސްމިއްޔާތު ބާއްވާ ތަން ކަމަށެވެ. އަދި ހޯމަ ދުވަހު ރައީސް ކުޑަރިކިލަށް ވަޑައިގަންނަވާ އިރު، މި ސަރުކާރުން ކުޑަރިކިލަށް ހަމައެކަނި ކޮށްދެއްވާފައިވާ ކަމަކީ ބޭންކު އޮފް މޯލްޑިވްސް އިން ބެހެއްޓީ އޭޓީއެމްގެ ރިބަން ކެނޑުން ކަމަށް ކައުންސިލްގެ ރައީސް ވިދާޅުވިއެވެ.
ކައުންސިލްގެ ރައީސް ވިދާޅުވީ އެރަށަށް އިތުރު އެއްވެސް ކަމެއް ނެތް ކަމަށެވެ. މިވީ 2 އަހަރުގެ ތެރޭގައި ކޮށްދެވުނު ހަމައެކަނި ކަމަކީ އޭޓީއެމް ކަމަށެވެ. ނަމަވެސް ކުޑަރިކިލަށް ސަރުކާރުން ވެފައިވާ ވައުދުތަކުގެ ތެރޭގައި 500 މީހުންގެ ޖާގައިގެ މިސްކިތެއް ހިމެނޭ ކަމަށާއި، ނަމަވެސް އެއްވެސް ވަރަށް އެ މަސައްކަތް ފެށިފައި ނުވާ ކަމަށެވެ.
މަގު ހެދުމުގެ މަސައްކަތް އެބައޮތް. ދެން އަޅުގަނޑަށް މައުލޫމަތު ލިބިފައިވާ ގޮތުގައި އާރުޑީސީއާއި މިހާރު ވަނީ ހަވާލުކޮށްފައި. މަސައްކަތް ކުރިއަކަށް ނުދޭ. މަސައްކަތް ފެށޭނެ ދުވަހެއްވެސް އަދި އަޅުގަނޑުމެންނަކަށް ނޭނގޭ. އެއީ މިރަށުގެ ފެނާ ނަރުދަމާ ނިމިގެން ނޫނިއްޔާ މަސައްކަތް ކުރިއަށް ގެންދެވެން ނެތް.ކުޑަރިކިލު ކައުންސިލްގެ ރައީސް އަބްދުލްހައްނާން އައްބާސް
ކައުންސިލްގެ ރައީސް ވިދާޅުވީ ޒުވާނުންނަށް ކަންކަން ކޮށްދެއްވުމަކީ ވެސް ރައީސް މުއިއްޒުގެ ވައުދުފުޅެއް ކަމަށެވެ. ނަމަވެސް މިހާތަނަށް އައި އިރުވެެސް އެއިން އެއްވެސްކަމެއްގެ އަމަލީ މަސައްކަތް ފެށިފައި ނުވާ ކަމަށާއި، ޒުވާނުންގެ މަރުކަޒަކީ މީގެ ތެރެއިން އެއް ވައުދު ކަމަށެވެ.
ކައުންސިލްގެ ރައީސް ވިދާޅުވީ 2 އަހަރު ވިއިރު އެއްވެސް މަސައްކަތެއް ނުފެށުނު އިރު އެރަށުގައި މިހާރު ހިނގަމުންދާ ތަރައްގީގެ މަޝްރޫއުތަކުގެ ތެރެއިން ފެނާ ނަރުދަމާ އަކީ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ފެށި މަސައްކަތެއް ކަމަށާއި، ސަރުކާރު ބަދަލުވި އިރުވެސް މަސައްކަތުގެ 40 އިންސައްތަ އޮތީ ނިމިފައި ކަމަށެވެ. ނަމަވެސް މި ސަރުކާރު އައި ފަހުން މަސައްކަތް އޮތީ ހުއްޓިފައި ކަމަށާއި، އަހަރަކަށްވުރެ ގިނަ ދުވަސްވެފައިވާއިރު މަސައްކަތް ފެށޭނެ ދުވަހެއް އަދި ދަންނަވަން އުނދަގޫ ކަމަށެވެ.
