ސަރުކާރު ބަދަލުވި ދުވަހުން ފެށިގެން ސަރުކާރުގެ އެއްވެސް ޕްރޮޖެކްޓެއް ކުޅުދުއްފުށީގައި ނުހިނގާ - އާތިފް
14 އޯގަސްޓު 2025 | ބުރާސްފަތި 13:07މިއަދުގެ ހަގީގަތަކީ ސަރުކާރުގެ މަޝްރޫޢުތައް ހުއްޓިފައި ހުރި އިރު ކައުންސިލްތަކުން މަސައްކަތް ކުރަމުންދިއުން ކަަމަށް އާތިފް ވަނީ ވިދާޅުވެފަ
ކުޅުދުއްފުށި ސިޓީ ކައުންސިލްގެ މޭޔަރ މުހައްމަދު އާތިފް ޖަލްސާ އެއްގައި ވާހަކަދައްކަވަނީ
ސަރުކާރު ބަދަލުވި ދުވަހުން ފެށިގެން ސަރުކާރުގެ އެއްވެސް ޕްރޮޖެކްޓެއް ކުޅުދުއްފުށީގައި ނުހިނގާ ކަމަށް ކުޅުދުއްފުށި ސިޓީ ކައުންސިލްގެ މޭޔަރ މުހައްމަދު އާތިފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
މިއަދުގެ ހަގީގަތަކީ ސަރުކާރުގެ މަޝްރޫޢުތައް ހުއްޓިފައި ހުރި އިރު ކައުންސިލްތަކުން މަސައްކަތް ކުރަމުންދިއުން ކަަމަށް އާތިފް ވަނީ ވިދާޅުވެފައެވެ. ސަރުކާރުން ކުޅުދުއްފުށީގައި ހިންގާ މަޝްރޫޢުތައް ސަރުކާރު ބަދަލުވި ދުވަހުން ފެށިގެން ހުއްޓިފައިވާ ކަމަށެވެ. ކުޅުދުއްފުށީގައި ނިމިދިޔަ ސަރުކާރުން ފެށި 400 ހައުސިން ޔުނިޓް ޤާއިމްކުރުމުގެ މަސައްކަތް ސަރުކާރު ބަދަލުވި ދުވަހުން ފެށިގެން ހުއްޓާލާފައިވާ ކަމަށް އޭނާ ވިދާޅުވިއެވެ. އެ މަސައްކަތް ކުރިއަށް ނުދާ ނަަމަ ކޮންޓްރެކްޓަރާއި އެކު ވެފައިވާ އެއްބަސްވުން ބާތިލްކުރާނެ ކަަމަށް ސަރުކާރުން ބުނި ނަމަވެސް މިހާތަނަށް ވެސް އެކަން ނުވެ އޮތް ކަމަށް އޭނާ ވިދާޅުވިއެވެ.
ކަރަންޓުގެ މައްސަލަ އަށް ދާއިމީ ހައްލެއް ހޯދުމަށް އިންޖީނުގެ އެއް އެޅުމުގެ މަސައްކަތް ވެސް ނިމިދިޔަ ސަރުކާރު ނިމުނު އިރު ކުރަމުން ދިޔަ ކަމަށް އާތިފް ވިދާޅުވިއެވެ. އެ މަސައްކަތުގެ 85-95% މަސައްކަތް ކުރީ ސަރުކާރުން އޮތީ ނިންމާފައި ކަމަށް އާތިފް ވަނީ ވިދާޅުވެފައެވެ. ސަރުކާރުގެ ޕްލޭން އެކަމާއި މެދު ސާފު ނުވާ ކަމަށް އާތިފް ވަނީ ވިދާޅުވެފައެވެ.
މީގެ އިތުރުން ލޯކަލް ކައުންސިލުތަކަށް ލިބިދީފައި އޮތް ބާރު ހަނިކުރުމާއެކު ކުޅުދުއްފުށީ ރައްޔިތުންގެ މާލިއްޔާއަށް އަހަރަކު ހަތަރު މިލިއަނެއްހާ ރުފިޔާގެ ގެއްލުން ލިބޭނެކަމަށް މޭޔަރު ވަނީ ވިދާޅުވެފައެވެ.
