ދުވާލަކު އެއްފަހަރު ބޭނުންކުރާ ބަރުދަން ލުއި ކުރާ ގުޅަ ބޭހެއްގެ ތަޖުރިބާތަކުން ދައްކާގޮތުގައި 72 ހަފްތާގެ ތެރޭގައި މި ބޭސް ބޭނުން ކުރާ މީހުންގެ ހަށިގަނޑުގެ ބަރުދަނުން 12 އިންސައްތަ ލުއިކުރެވިދާނެއެވެ.

މެނުފެކްޗަރަރ "އެލީ ލިލީ" އާ ހަވާލާ ދީ ބީބީސީ އިން ބުނެފައި ވަނީ، އަދި ލައިސަންސް ނުލިބޭ މި ބޭސް، ކުރިއަށް އޮތް އަހަރު ލިބެން ހުންނާނެ ކަމަށެވެ.

އޯފޯގްލިޕްރޮން ކިޔާ ދުވާލަކު އެއް ފަހަރު ބޭނުން ކުރާ މި ގުޅަ ބޭސް މަސައްކަތް ކުރަނީ ކެއުމުގެ ޝައުގު ކުޑަކޮށް، ބަނޑުހައި ނުވެ ހުންނަ ކަހަލަ އިހުސާސް ގެނުވައިދީގެންނެވެ.

މުހިންމު ޓްރަޔަލްއެއްގެ ފުރަތަމަ ނަތީޖާތަކުން ދައްކާ ގޮތުގައި އެންމެ މަތީ ޑޯޒްގައި މި ބޭސް ބޭނުން ކުރި މީހުން 16 މަސްދުވަހުގެ ތެރޭގައި އެވްރެޖްކޮށް 12 ކިލޯ ލުއިވެފައިވެއެވެ.

ނަމަވެސް ތަޖުރިބާގެ ނަތީޖާ ދައްކާ ގޮތުން ކޮންމެ 10 މީހަކުން އެކަކު މި ބޭސް ބޭނުން ކުރުން ހުއްޓާލާފައި ވަނީ މޭ ނުބައި ކުރުމާއި ހޮޑުލުން ފަދަ ސައިޑް އިފެކްޓްތަކުގެ ސަބަބުންނެވެ.

އަނެއްކޮޅުން ބޭސް ބޭނުން ކުރި މީހުންނަށް ބަރުދަން ލުއިވުމުގެ އިތުރުން، ކޮލެސްޓްރޯލް އާއި ލޭގައި ސަރުބީ ހުންނަ މިންވަރާއި އަދި ލޭގެ ޕްރެޝަރު ދަށްވުމުގެ ފައިދާވެސް ލިބުނެވެ.

އެލީ ލިލީގެ ފަރާތުން ބީބީސީ އާ ވާހަކަ ދެއްކި ޑރ. ކެނެތް ކަސްޓަރ ވިދާޅުވި ގޮތުގައި، މި އަހަރު ނިމުމުގެ ކުރިން މި ބޭހަށް ލައިސަންސް ހޯދުމަށް ހުށަހެޅުމަށް ކުންފުނިން މަސައްކަތް ކުރަމުން ދާކަމަށާއި، "ދުނިޔޭގެ ފެންވަރުގައި ކުރިމަތިވެފައިވާ މި ބޮޑު ޞިއްޙީ ނުރައްކަލަށް އެޑްރެސްކުރުމަށް" އެ ކުންފުނިން ތައްޔާރުވަމުންދާ ކަމަށެވެ.

އޯފޯގްލިޕްރޯން ބޭނުންކުރި މީހުންނަށް 12 އިންސައްތައިގެ ބަރުދަން ލުއިވި އިރު، ހަފްތާއަކު އެއްފަހަރު ޖަހާ އިންޖެކްޝަން - މައުންޖާރޯ ބޭނުންކުރި ބަލިމީހުންގެ 22 އިންސައްތައިގެ މިންވަރަކަށް ބަރުދަން ލުއިވިއެވެ.

މި އިންޖެކްޝަން އަކީ ވެސް އެލީ ލިލީ އިން އުފައްދާ ބޭހެކެވެ. ފަހުން މި އުފެއްދި ގުޅަ ބޭހަކީ އިންޖެކްޝަން ހާ ނަތީޖާ ރަނގަޅު ފަރުވާއެއް ނޫން ނަމަވެސް، ބަރުދަން ލުއި ކުރުމަށް އިންޖެކްޝަން ކަށި ޖަހަން ނުޖެހޭ މި ބޭހަށް ރަނގަޅު މާކެޓެއް ލިބޭނެ ކަމަށް ބެލެވެއެވެ.

މިހާރު ބޭނުންކުރާ ބޭހަށް ވުރެ އަލަށް އުފައްދާ ގުޅަ ބޭސް މާ އަގުހެޔޮ ވާނެ ކަމަށް ބެލޭތީ ގިނަ ބަޔަކަށް އެ ބޭސް ލިބޭނެ ކަމަށް އުއްމީދު ކުރެވެއެވެ.

މި ބޭހުގެ ޓްރަޔަލްގެ ފުރިހަމަ ނަތީޖާތައް ދިރާސާކުރުމަށް ޔޫރަޕިއަން އެސޯސިއޭޝަން ފޯރ ދަ ސްޓަޑީ އޮފް ޑައިބެޓީސްގެ އަހަރީ ބައްދަލުވުމުގައި އަންނަ މަހު ހުށަހަޅައި، ޕިއަރ-ރިވިއުކުރެވޭ މަޖައްލާ އެއްގައި ނަތީޖާތައް ޝާއިޢުކުރާ ގޮތައް ވަނީ ހަމަޖެހިފައެވެ.

ވާދަވެރި ކުންފުނި ނޯވޯ ނޯޑިސްކް އިން އުފައްދާފައިވާ ބަރުދަން ލުއި ކުރާ އިންޖެކްޝަންގެ ބަދަލުގައި ވެގޮވީ ނަމަކަށް ކިޔާ ގުޅަ ބޭހަކަށް ހުއްދަ ހޯދުމަށް އެމެރިކާގެ ކަމާ ބެހޭ އިދާރާތަކަށް ވަނީ ހުށަހަޅާފައެވެ. ޓްރަޔަލްތަކުގައި، ނޯވޯ ނޯޑިސްކްގެ ދުވާލަކު އެއްފަހަރު ކާ މި ބޭހުގެ އެންމެ މަތީ ޑޯޒް ގެ ގުޅު ބޭނުން ކުރި ބަލިމީހުން 64 ހަފްތާއަށްފަހު އެމީހުންގެ ހަށިގަނޑުގެ ބަރުދަނުގެ 15 އިންސައްތަ ލުއިވިއެވެ.