ރޫބިއޯ، ފްރާންސް އަދި އިނގިރޭސިވިލާތުގެ ޚާރިޖީ ވަޒީރުންނާ ބައްދަލު ކުރައްވައިފި

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ، އިނގިރޭސިވިލާތުގެ ޚާރިޖީ ވަޒީރު ޑޭވިޑް ލަމީ އަދި ފްރާންސްގެ ޚާރިޖީ ވަޒިރު ޖީން ނޮއެލް ބަރޮޓްއާ ބައްދަލު ކުރައްވައިފި އެވެ.

މި ބޭފުޅުންނާ ބައްދަލު ކުރައްވައި ރޫބިއޯ ވަނީ، ޣައްޒާގެ އިންސާނީ ޙާލަތާއި، ކުރިމަތި ވަމުން އަންނަ ހުރަސްއެޅުންތަކާ އެކު ވެސް، ހަނގުރާމަ ހުއްޓުވުމަށް ކުރަމުން އަންނަ މަސައްކަތްތަކާ ގުޅޭ ގޮތުން މަޝްވަރާ ކުރައްވައިފި އެވެ. އެ ބައްދަލުވުމުގައި ރޫބިއޯ ވަނީ ހަމާސް ޖަމާއަތުގެ ފަރާތުން ހަނގުރާމަ ހުއްޓާލުމުގައި ހުރަސްއެޅުންތަކެއް ކުރިމަތި ވަމުން އަންނަ ކަމަށް ވިދާޅުވެފަ އެވެ.

އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޓެމީ ބްރޫސް ދެއްވި މައުލޫމާތުގައި ބުނެފައިވާ ގޮތުން، އެ ބައްދަލުވުމުގައި ރޫބިއޯ ވަނީ، ހަމާސް އިން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކުރުމަށް ކުރެވޭނެ މަސައްކަތްތަކާ ގުޅޭ ގޮތުން ވެސް މަޝްވަރާ ކުރައްވައިފި އެވެ. 

މި ދަނޑިވަޅަކީ ހަމާސްގެ ބެލުމުގެ ދަށުގައި ތިބި އިސްރާއީލްގެ ދެ ރަހީނުންގެ ވީޑިއޯ އެ ޖަމާއަތުން އާންމު ކޮށްފައިވާ ދަނޑިވަޅެކެވެ. އެކަމާ ގުޅިގެން ފްރާންސްގެ ފޮރިން މިނިސްޓަރު ބަރޮޓް ވެސް ވަނީ ހަމާސް ޖަމާއަތަށް ނުރުހުން ފާޅު ކޮށްފަ އެވެ. އަދި އިސްރާއީލްގެ ރަހީނުން މިނިވަން ކުރުމަކީ މުހިންމު ކަމެއް ކަމަށް ވިދާޅުވެފައިވެ އެވެ.

މީގެ އިތުރުން އެ ބައްދަލުވުމުގައި ވަނީ އީރާންގެ ނިއުކްލިއާ ޙަރަކާތްތަކާ ގުޅޭ ގޮތުން ވެސް މަޝްވަރާ ކުރުންތައް ކުރިއަށް ގެންގޮސްފަ އެވެ. އެގޮތުން އީރާން އިން ނިއުކްލިއާ ހަތިޔާރު ހޯދުން ނުވަތަ އުފެއްދުން ހުއްޓުވުމަށް ޤައުމު ތަކުން ދޭ އަހަންމިއްޔަތުކަމަކީ މުހިންމު ކަމެއް ކަމަށް ވަނީ ފާހަގަ ކޮށްފަ އެވެ.

މީގެ އިތުރުން އެކަމަކީ ބައިނަލްއަޤުވާމީ މުޖުތަމައުގެ ސަލާމަތާއި ރައްކާތެރި ކަމަށް ވަރަށް މުހިންމު ކަމެއް ކަމަށް، ރޫބިއޯ އާއި ލަމީ އަދި ބަރޮޓް ވެސް ވަނީ އެއްބަސްވެފައި ކަމަށް ރިޕޯޓުތަކުގައި ވަނީ ބުނެފަ އެވެ.

އެ މަޝްވަރާތަކަކީ މެދު އިރުމަތީގެ ސަރަހައްދުގައި ހަމަޖެހުން ޤާއިމު ކުރުމަށާއި، އިންސާނީ އެހީތެރިކަން ފޯރު ކޮށްދިނުމަށް ބައިނަލްއަޤުވާމީ މުޖުތަމައުން ކުރަމުންދާ މަސައްކަތްތަކުގެ ތެރެއިން ބޭއްވުނު މަޝްވަރާ ތަކެއް ކަމަށް ވެސް ބުނެފައިވެ އެވެ.

އިނގިރޭސިވިލާތުގެ ޚާރިޖީ ވަޒީރު އަދި ފްރާންސްގެ ޚާރިޖީ ވަޒީރާ ރޫބިއޯ ބައްދަލު ކުރައްވާފައިވާއިރު، އެ ދެ ޤައުމުން ވަނީ ފަލަސްޠީނުގެ މިނިވަން ދައުލަތް ބަލައި ގަންނަން ވެސް ނިންމައިފަ އެވެ. ފްރާންސް އިން ފަލަސްޠީނުގެ މިނިވަން ދައުލަތް ބަލައި ގަންނަން ނިންމުމާ އެކު، ރޫބިއޯ ވަނީ އެކަމަށް ފާޑު ވެސް ވިދާޅުވެފަ އެވެ.