ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުން، އެ ޖަމާއަތުގެ ބެލުމުގެ ދަށުގައި ތިބި އިސްރާއީލްގެ މަރުވެފައިވާ ރަހީނުންގެ ތެރެއިން އިތުރު މީހެއްގެ ހަށިގަނޑު ހަވާލު ކޮށްފި އެވެ.

ހުކުރު ދުވަހުގެ ރޭ ހަމާސް އިން ވަނީ އިތުރު ރަހީނެއްގެ ހަށިގަނޑު އިސްރާއީލްއާ ހަވާލު ކޮށްފަ އެވެ. އަދި ދެ އަހަރުވީ ހަނގުރާމައިގެ ތެރޭގައި ޣައްޒާ ސަރަހައްދުގައި ވީ ނުވީއެއް ނޭނގި ގެއްލިފައިވާ އެހެން ރަހީނުންގެ ހަށިގަނޑުތައް ހަވާލު ކުރާނެ ކަމަށް އެ ޖަމާއަތުން ވަނީ ހާމަ ކޮށްފަ އެވެ.

އިސްރާއީލްގެ އަސްކަރިއްޔާގެ ބަޔާނެއްގައި ބުނެފައި ވަނީ، ރެޑް ކްރޮސް މެދުވެރިކޮށް މަރުވެފައިވާ އިތުރު ރަހީނެއްގެ ހަށިގަނޑު ހަމާސް އިން ވަނީ އިސްރާއީލްގެ ސަލާމަތީ ބާރުތަކާ ހަވާލު ކޮށްފައި ކަމަށެވެ. އެހެންކަމުން، އެ ހަށިގަނޑު ދެނެގަތުމަށްޓަކައި އިސްރާއީލްގެ މެޑިކަލް އެނަލިސިސް ސެންޓަރަކަށް ގެންދެވޭނެ ކަމަަށް ވެސް ބުނެފައިވެ އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ އިސްނެގުމުގެ މަތިން ޣައްޒާ ހަނގުރާމަ ހުއްޓާލުމަށް އެއްބަސްވެފައިވާއިރު، ހަމާސް އިން ވަނީ އެ ޖަމާއަތުގެ ބެލުމުގެ ދަށުގައި ތިބި ރަހީނުންގެ ތެރެއިން ދިރި ތިބި 20 މީހުން މިނިވަން ކޮށްފަ އެވެ. އަދި މަރުވެފައިވާ 28 މީހުންގެ ތެރެއިން ނުވަ މީހެއްގެ ހަށިގަނޑު ވަނީ އިސްރާއީލްއާ ހަވާލު ކޮށްފަ އެވެ. އޭގެ ތެރޭގައި ހުކުރު ދުވަހުގެ ރޭ ހަވާލު ކުރި ހަށިގަނޑު ވެސް ހިމެނެ އެވެ.

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވަނީ، ހަނގުރާމައިގެ ސަބަބުން ހައްޔަރު ކޮށްފައިވާ އެ ޤައުމުގެ ހުރިހާ ރަހީނުން ވެސް މިނިވަންކޮށް، އަނބުރާ ޤައުމަށް ގެންނާނެ ކަމުގެ ވައުދު ތަކުރާރު ކުރައްވައިފަ އެވެ. އިސްރާއީލްގެ ޑިފެންސް މިނިސްޓަރު ވިދާޅުވެފައި ވަނީ، ހަމާސް އިން ރަހީނުން މިނިވަން ނުކޮށްފި ނަމަ، ނުވަތަ ހުރިހާ ހަށިގަނޑެއް ހަވާލު ނުކޮށްފި ނަމަ އަލުން ހަނގުރާމަ ފަށާނެ ކަމަށެވެ.

އެކަމާ ގުޅޭ ގޮތުން ވާހަކަ ދައްކަވަމުން ހަމާސް ޖަމާއަތުގެ އިސް އޮފިޝަލެއް ކަމަށްވާ، ޣާޒީ ޙަމަދު ވިދާޅުވެފައި ވަނީ އެ ފަދަ އިންޒާރު ތަކަކީ އެއްވެސް ޙާލަތެއްގައި ބަލައި ގަނެވޭނެ އަދި ޤަބޫލު ކުރެވޭނެ ކަންކަމެއް ނޫން ކަމަށެވެ. މަރުވެފައިވާ ރަހީނުންގެ ހަށިގަނޑު ތަކުގެ މައްސަލަ އަކީ އުނދަގޫ މައްސަލައެއް ކަމަށާއި، އެ މައްސަލަ އަށް ވަގުތު ބޭނުންވާ ކަމަށް ވެސް އޭނާ ވަނީ ވިދާޅުވެފަ އެވެ.

ޣައްޒާގެ ސިވިލް ޑިފެންސް އެޖެންސީ އިން ބުނެފައިވާ ގޮތުގައި ހަނގުރާމަ ހުއްޓުނު ފަހުން ފެށިގެން މިހާތަނަށް ވަނީ 280 އަށް ވުރެ ގިނަ ހަށިގަނޑުތައް އެކި ސަރަހައްދުން ހޯދައިފަ އެވެ.