އިންޓަ މިލާން ދޫކޮށްލުމަށް ފަހު ޖޮވެޓިކް މޮނާކޯ އަށް ސޮއިކޮށްފި

އިންޓަ މިލާން ދޫކޮށްލުމަށް ފަހު، ސްޓީވެން ޖޮވެޓިކް ފްރާންސްގެ އޭއެސް މޮނާކޯ އަށް ސޮއި ކޮށްފިއެވެ.

ޖޮވެޓިކް މޮނާކޯ ކުޅުންތެރިޔެއްގެ ގޮތުގައި ރަސްމީކޮށް ދައްކާލާފައިވާއިރު، އޭނާ އެ ކްލަބަށް ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގެ ދަށުން 10 މިލިއަން ޕައުންޑަށެވެ.

މޮނާކޯ އަށް ސޮއި ކުރުމަށް ފަހު ޖޮވެޓިކް ބުނީ މޮނާކޯ އަކީ ވަރަށް ހުނަރުވެރި ކުޅުންތެރިން ތިބި ކްލަބެއް ކަމަށާއި، އެ ކްލަބަށް އޭނާއަށް ބަދަލުވެވުމުން ވަރަށް އުފަލުން ހުރި ކަމަށެވެ.

ރިޕޯޓްތައް ބުނާގޮތުން ޖޮވެޓިކް މޮނާކޯ އަށް ސޮއި ކުރީ އެ ކްލަބުގެ ފްރާންސް ފޯވާޑް ކީލިއަން އެމްބަޕޭގެ ރިޕްލޭސްމަންޓަށެވެ. އެގޮތުން އެމްބަޕޭ މޮނާކޯ ދޫކޮށްލުމަށް ފަހު ޕީއެސްޖީއަށް ބަދަލުވާން މެޑިކަލް ވެސް ފުރިހަމަ ކޮށްފައިވާ ކަމަށް ރިޕޯޓްތައް ބުނެއެވެ.

ޖޮވެޓިކް މޮނާކޯއަށް ސޮއިކުރުމަށް ފަހު ނެގި ފޮޓޯ ޝޫޓް އިން ބައެއް ފޮޓޯތައް ލީކްވެފައިވާއިރު، އެ ފޮޓޯތަކުން ފެންނަނީ އޭނާ އެމްބަޕޭ މޮނާކޯގައި ބޭނުން ކުރަމުން އައި 10 ނަމްބަރު ޖޯޒީގައެވެ.

މީގެކުރިން ފިއޮރެންޓީނާ އަދި މެންޗެސްޓާ ސިޓީ އަށް ކުޅެފައިވާ ޖޮވެޓިކް އިންޓަ އަށް ބަދަލުވީ 2015 ވަނަ އަހަރެވެ. އެގޮތުން އޭނާ ވަނީ އެ ކްލަބަށް ކުޅުނު 33 މެޗުގައި ހަތް ލަނޑު ކާމިޔާބު ކޮށްފައެވެ. އޭނާ ވަނީ އިންޓާގަ ހުރެ ސެވިއްޔާއަށް ވެސް ލޯނެއްގެ ދަށުން ކުޅެފައެވެ. އޭނާ ވަނީ އެ ކްލަބަށް ކުޅުނު 22 މެޗުގައި ހަތް ލަނޑު ކާމިޔާބު ކޮށްފައެވެ.

މޮންޓެނެގްރޯ ގައުމީ ޓިމަށް ކުޅެމުން އަންނަ ޖޮވެޓިކް ވަނީ މިހާތަނަށް އެޓީމަށް ކުޅުނު 46 މެޗުގައި 23 ލަނޑު ވެސް ކާމިޔާބު ކޮށްފައެވެ. އޭނާ ވަނީ ސިޓީއާއެކު ފުޓްބޯލް ލީގް ކަޕް އަދި ޕްރިމިއާ ލީގްވެސް ކާމިޔާބު ކޮށްފައެވެ.