ޑި ޕައުލް މިއާމީ އަށް ބަދަލުވެއްޖެ

އެތުލެޓިކޯ މެޑްރިޑަށް ކުޅެމުން އަންނަ އާޖެންޓީނާގެ ރޮޑްރީގޯ ޑި ޕައުލް, އެމެރިކާ ލީގުގެ އިންޓަރ މިއާމީ އަށް ބަދަލުވެއްޖެ އެވެ.

އުޑިނޭސީ ދޫކޮށްލުމަށް ފަހު، ޑި ޕައުލް އެތުލެޓިކޯ އަށް ބަދަލުވީ 2021 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ ފަސް އަހަރު ދުވަހުގެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރު އެވެ.

އޭނާގެ އެއްބަސްވުމުގައި ބާކީ އެއް އަހަރު އޮތްއިރު، މިއާމީ އިން ވަނީ ލޯނު އެއްބަސްވުމެއްގެ ދަށުން ޑި ޕައުލް އެ ކުލަބަށް ގެނެސްފަ އެވެ. އެއީ 2025 ވަނަ އަހަރުގެ އެމެރިކާ ލީގުގެ ނިޔަލަށެވެ.

ނަމަވެސް، ލޯނު އެއްބަސްވުމުގެ މުއްދަތު ހަމަވުމުން މިއާމީ އިން ބޭނުންވާ ނަމަ ޑި ޕައުލް އަށް ދާއިމީ އެއްބަސްވުމެއް ދިނުމުގެ ފުރުސަތު އޮންނާނެ އެވެ. އެގޮތުން މީޑިއާ ތަކުގައި ބުނެފައިވާ ގޮތުން، 2029 ވަނަ އަހަރުގެ ނިޔަލަށް ޑި ޕައުލްގެ އެއްބަސްވުން ދާއިމީ ކުރުމުގެ ފުރުސަތު މިއާމީ އަށް އޮންނާނެ އެވެ.

ޑި ޕައުލް މިއާމީ އަށް ބަދަލުވުމާ އެކު، އެ ކުލަބުގެ މެނޭޖިން އޯނަރު ޖޯޖް މާސް ވިދާޅުވީ، ޑި ޕައުލް އަކީ މޮޅު ކުޅުންތެރިޔެއް ކަމަށާއި، ޑި ޕައުލް ވަނީ އޭނާގެ ފެންވަރު ދުނިޔެ އަށް ސާބިތު ކޮށްދީފައި ކަމަށެވެ.

މިއާމީ އިން ޑި ޕައުލް އެ ކުލަބަށް ގެނެސްފައިވާއިރު، އޭނާ އަކީ މިއާމީ އިން ބޭނުންވާ ފެންވަރުގެ ކުޅުންތެރިޔެއް ކަމަށް އޭނާ ވިދާޅުވި އެވެ. އަދި ޑި ޕައުލްގެ އެހީތެރިކަމާއި، ހިއްސާއާއެކު މިއާމީ އިން އިތުރު ކަންތައްތަކެއް ޙާސިލު ކުރާނެ ކަމުގެ ޔަގީންކަން އޮތް ކަމަށް ވެސް އޭނާ ވިދާޅުވި އެވެ.

މިއާމީ އިން ޑި ޕައުލް ގެނެސްފައިވާއިރު، މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އަކީ ޑި ޕައުލްއާ ގާތް ގުޅުމެއް އޮންނަ ކުޅުންތެރިޔެކެވެ. އާޖެންޓީނާ ޤައުމީ ޓީމުގައި މި ފަހަކަށް އައިސް މި ދެ ކުޅުންތެރިންގެ ގުޅުން ފާހަގަ ކޮށްލެވެ އެވެ.

ޑި ޕައުލް ވަނީ އޭނާ އެތުލެޓިކޯ އަށް ކުޅެދިން 187 މެޗުގައި 14 ލަނޑު ޖަހައިފަ އެވެ. މީގެ އިތުރުން އޭނާ ވަނީ އާޖެންޓީނާ ޤައުމީ ޓީމަށް ކުޅެދިން 78 މެޗުގައި ދެ ލަނޑު ޖަހައިފަ އެވެ. އާޖެންޓީނާ އާއެކު އޭނާ ވަނީ ފީފާ ކުލަބު ވޯލްްޑް ކަޕްގެ އިތުރުން، ކޮޕާ އެމެރިކާ އަދި ބައްރުތަކުގެ މެދުގައި ކުޅޭ ފައިނަލިސިމާ ކާމިޔާބު ކޮށްފަ އެވެ.