ޒާރާއާއި ސިޔާމްގެ ކައިވެނި ރޫޅިއްޖެ
ކައިވެނި ރޫޅުނު ސަބަބެއް ހާމަކޮށްފައިނުވޭ
މީދޫ ދާއިރާގެ މެންބަރު އަހުމަދު ސިޔާމް އަދި އޭނާގެ ކުރީގެ ހަނގު އަނބިކަނބަލުން އައިމިނަތު ޒާރާ
މިދޫ ދާއިރާގެ މެންބަރު އަދި މަޝްހޫރު ވިޔަފާރިވެރިޔާ އަހުމަދު ސިޔާމް އާއި ބ. ކަމަދޫއިން އީދުގައި ވިދާލި އައިމިނަތު ޒާރާގެ އަގުބޮޑު ކައިވެނި ރޫޅިއްޖެއެވެ.
ސިޔާމާއި ޒާރާ ކައިވެނި ބައްލަވައިގަތީ މިދިޔަ އަހަރުގެ އޮކްޓޯބަރު މަހުގެ 10 ވަނަ ދުވަހުއެވެ. މުޅި ރާއްޖެ އާޝޯހް ކޮށްލި ކައިވެންޏަށް އެތައް ބައެއްގެ ނަޒަރު ހުއްޓުނު އިރު މި ވާހަކަތައް ވެގެން ދިޔައީ ރާއްޖޭގައި ކުރި ކައިވެންޏަކަށް އެންމެ ގިނަ މީހުން ސަމާލުކަން ހުއްޓުނު އެއް ކައިވެންޏަށެވެ.
ސިޔާމާއި ޒާރާ ކައިވެނި ކުރެއްވީ ސިޔާމްގެ އޮޅުވެލިފުށި ރިސޯޓުގަ އެވެ. ކައިވެނީގެ ރަނެއްގެ ގޮތުގައި ކިޔާފައި ވަނީ 2024 ރުފިޔާ އެވެ.
ނަމަވެސް ކައިވެނި ރޫޅި އެކަން ހާމަކުރެއްވީ ސިޔާމުގެ ގާތް އަދި އެކުގައި މަސައްކަތް ކުރައްވާ މުހައްމަދު އައްބާސްއެވެ.
އައްބާސް އެކްގައި ކުރެއްވި ޕޯސްޓެއްގައި ވިދާޅުވީއަހުމަދު ސިޔާމު އާއި ޒާރާގެ ކައިވެނި އަކީ އެކަކު އަނެކުން ދެކެ ލޯބި ވެގެން ކުރެވިގެން ދިޔަ ކައިވެންޏެއް ކަމަށެވެ. އަދި ހަމަ އެހެންމެ ސިޔާމް އާއި ޒާރާގެ ކައިވެނި ރޫޅާލާފައި ވަނީވެސް އެކަކު އަނެކަކުގެ މެދުގައި ރިވެތިގޮތުގައި މަޝްވަރާކުރުމަށް ފަހު ސުލްހަވެރިކަމާއެކު ސުލްހަވެރި މާހައުލެއްގައި ކަމަށެވެ.
އައްބާސް ވިދާޅުވީ ސިޔާމް އަކީ އެއްވެސް ބޭފުޅަކާ މެދު ބޭއިންސާފުން ކަން ކުރައްވާނެ ބޭފުޅެއްނޫން ކަމަށާއި، އެއްވެސް ބޭފުޅަކާ މެދު ނިކަމެތިކޮށް ކަންކުރައްވާނެ ބޭފުޅެއްވެސް ނޫން ކަމަށެވެ. ކޮންމެ ބޭފުޅަކާ މެދުވެސް ކަންކަން ކުރައްވާނީ ލޯބިން އަދި އޯގާތެރިކަމާއެކު ކަމަށާއި، ކައިވެނި ކުރައްވާ ކޮންމެ ދެމަފިރިއަކު މުޅިއުމުރު އެކަކުގައި ނޫޅެވުމަކީ މައްސަލައެއްނޫން ކަމަށެވެ.
ކައިވެނި ރޫޅުނު ސަބަބެއް ސިޔާމްވެސް ޒާރާވެސް އަދި އައްބާސްވެސް ހާމަކުރައްވާފައި ނުވެއެވެ. މި ކައިވެންޏަކީ މިހާތަނަށް ރާއްޖޭގައި ބޭއްވުނު އެންމެ އަގުބޮޑު ކައިވެންޏެވެ.
