ބީއެމްއެލް ސްޓޫޑެންޓް ކާޑުން %10 އާ ހަމަޔަށް ހާއްސަ ޑިސްކައުންޓެއް!
ކުދިންނަށް މާލީ މިނިވަންކަން ދަސްކޮށްދިނުމުގެ ގޮތުން ބީއެމްއެލް ސްޓޫޑެންޓް ކާޑަށް %10 ގެ ޑިސްކައުންޓެއް ލިބޭނެ. މިއީ ކުދިންގެ ކުދިކުދި ޚަރަދުތައް މިކާޑު މެދުވެރިކޮށް ކުރުމުން ބަޖެޓް ފަދަ މުހިންމު ކޮންސެޕްޓްތައް ދަސްވާނެ ކަމުގެ ފުރުޞަތެކެވެ.
ބީއެމްއެލްގެ މައި އިމާރާތް
ދަރިވަރުންގެ މެދުގައި މަގުބޫލް ބީއެމްއެލް ސްޓޫޑެންޓް ޑެބިޓް ކާޑު ބޭނުންކޮށްގެން ޕީއޯއެސް މެޝިންތަކުން ފައިސާ ދައްކާ ފަރާތްތަކަށް ހާއްސަ ޑިސްކައުންޓެއް ލިބޭނެ ގޮތެއް ބޭންކް އޮފް މޯލްޑިވްސް (ބީއެމްއެލް) އިން ތައާރަފް ކޮށްފިއެވެ.
މި ހާއްސަ ޑިސްކައުންޓާއެކު ދަރިވަރުންނަށް ޚަރަދުކުރުމުގައި އިތުރު ފަސޭހައެއް ލިބިގެންދާނެ ކަމަށް ބީއެމްއެލުން ބުނެއެވެ.
އެކި ފިހާރަތަކާއި، ރެސްޓޯރަންޓް އަދި ބުކްޝޮޕްތަކުން ސްޓޫޑެންޓް ކާޑު ބޭނުންކޮށްގެން ފައިސާ ދެއްކުމުން %10 އާ ހަމައަށް ޑިސްކައުންޓް ލިބޭނެ ކަމަށް ބުނެ، ބޭންކް އޮފް މޯލްޑިވްސް އިން އިއުލާން ކޮށްފައި ވަނީ ޑިސްކައުންޓް ލިބޭ ތަންތަނުގެ މައުލޫމާތު އެބެންކުގެ ވެބްސައިޓުން ފެންނަން ހުންނާނެ ކަމަށެވެ.
ބޭންކް އޮފް މޯލްޑިވްސް އިން އިތުރަށް ބުނީ، ސްޓޫޑެންޓް ކާޑު ފަރުމާކޮށްފައި ވަނީ ފައިސާ ޚަރަދުކުރުމުގައި ޒިންމާދާރު ގޮތްތަކަކަށް ކުޑަކުދިން އަހުލުވެރިކުރުވައި، މާލީ މިނިވަންކަން ދަސްކޮށްދިނުމުގެ މުހިންމު މަޤުޞަދުގައި ކަމަށެވެ.
މިގޮތުން ވަކި އަދަދެއް މަހެއްގެ މައްޗަށް ބަޖެޓްކޮށްގެން ކުދިންގެ ކުދި ކުދި ޚަރަދުތައް މި ކާޑު މެދުވެރިކޮށް ކުރުމުން އެ ކުދިންނަށް ބަޖެޓިން ފަދަ މުހިންމު ކޮންސެޕްޓްތައް ދަސްވާނެ ކަމަށް ބީއެމްއެލުން ވަނީ ބުނެފައެވެ.
އަދި ވަކި ޒިންމާދާރުކަމާއިއެކު ޚަރަދުކުޑަކުރަން ވެސް ކުދިންނަށް ދަސްވާނެ ކަމަށް ބޭންކް އޮފް މޯލްޑިވްސް ވަނީ ފާހަގަކޮށްފައެވެ.
ދެ އުމުރުފުރާއަކަށް ބަހާލައިގެން ދެ ޑިޒައިނަކަށް ފަރުމާކޮށްފައިވާ މި ކާޑު ލިބޭނީ އުމުރުން 7 އަހަރާއި 12 އަހަރާ ދެމެދުގެ ދަރިވަރުންނަށް ޚާއްސަ ޑިޒައިނަކާއި، 13 އަހަރާއި 18 އަހަރާ ދެމެދުގެ ދަރިވަރުންނަށް ޚާއްސަ ޑިޒައިނެއްގައެވެ.
މީގެ އިތުރުން ބީއެމްއެލް ފާހަގަކުރީ ދަރިވަރުން މިކާޑުން ކުރާ މުއާމަލާތްތަކަށް އަހަރަކު އެއްފަހަރު ރިބޭޓެއް ދިނުމަށް ވެސް ވަނީ ހަމަ ޖެހިފައި ކަމަށް، އަދި އަހަރެއްގެ ތެރޭ ކުރާ ޖުމްލަ ޚަރަދުގެ 0.5 އިންސައްތަ ކޮންމެ ކުއްޖެއްގެ ސޭވިންގ އެކައުންޓަށް ބޭންކުން ޖަމާކޮށްދޭނެ ކަމަށެވެ. މިއީ ދަރިވަރުންނަށް މާލީ އިތުރު ފައިދާއެއް ލިބިގެންދާނެ ކަމެއް ކަމަށް އެ ބެންކުން ފާހަގަ ކޮށްފައިވެއެވެ.
މި ކާޑަކީ ބެލެނިވެރިންނަށް މި ކާޑުގެ އެކައުންޓަށް ފައިސާ ފޮނުވައި، ޚަރަދުކުރުމުގައި އިރުޝާދު ދީ، ދަރިވަރުން ކާޑު ބޭނުންކުރާ ގޮތް ބެލެހެއްޓޭނެ ގޮތަށް ފަރުމާ ކޮށްފައިވާ ކާޑެއް ކަމަށްވާތީ، ބެލެނިވެރިންގެ ފުރިހަމަ އިރުޝާދާއެކު ކުދިންނަށް ފަހި ވެގެން މިދަނީ މީގެ ކުރިން އެ ކުދިންނަށް ނުލިބޭ ރަނުގެ ފުރުސަތެއް ކަމަށް އެ ބެންކުން މައުލޫމާތު ދެއެވެ.
އަދި ކާޑު ފްރީޒްކުރުމާއި އަންފްރީޒްކުރުން އަދި ބްލޮކްކޮށް ޕިން ބަދަލުކުރުން ފަދަ ޚިދުމަތްތައް އެޕް މެދުވެރިކޮށް ބެލެނިވެރިންނަށް ލިބޭނެ ކަމަށް ވެސް ބީއެމްއެލުން ވަނީ ފާހަގަ ކޮށްފައެވެ.
އެއްވެސް ފީއެއް ނުނަގާ ގޮތަށް ވިސާ ޑެބިޓް ކާޑެއްގެ ގޮތުގައި ދޫކުރާ މި ކާޑުން ރާއްޖެއާއި ރާއްޖެއިން ބޭރުގައި މުއާމަލާތްކުރެވޭނެ ކަމަށް ފާހަގަ ކޮށް، ބީއެމްއެލުން އިތުރަށް ބުނެފައިވަނީ ރާއްޖެއިން ބޭރަށް ކުރާ މުއާމަލާތްތަކަށް 100 އެމެރިކާ ޑޮލަރު ކަނޑައެޅިފައިވާއިރު، ރާއްޖެއިން ބޭރުގައި ދިރިއުޅޭ ދަރިވަރުންނަށް ރަޖިސްޓްރީކޮށް ލިޔެކިޔުންތައް ހުށަހެޅުމުން މަހަކު 1,200 އެމެރިކާ ޑޮލަރުގެ ބޭރު ފައިސާގެ މުޢާމަލާތްތަކުގެ ލިމިޓް ކަނޑައެޅޭނެ ކަމަށެވެ.
ބީއެމްއެލުން އިއުލާން ކުރި ގޮތުގައި، ބެލެނިވެރިންގެ ބީއެމްއެމްއެލް މޮބައިލް ބޭންކިންގ އެޕް މެދުވެރިކޮށް މި ކާޑަށް އެދި ހުށަހެޅޭނެއެވެ.
