ހޯމަ ދުވަހުގެ މަޖިލީހުގެ ޖަލްސާ އަށް ފޮރިން މިނިސްޓަރ ޑރ. އަބްދުﷲ ހަލީލަށް ވަޑައިގެންނެވެން ނެތް ކަމަށް އަންގަވާފައިވާތީ، ހަލީލާއި ސުވާލުކުރުން އެހެން ދުވަހަށް ފަސްކުރަން މަޖިލީހުގެ ރިޔާސަތުން ނިންމައިފިއެވެ.

މަޖިލީހުގެ ރިޔާސަތު ބެލެހެއްޓެވި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ ޑރ.ހަލީލް އެހެން މަސައްކަތެއް ކުރަން ޖެހިވަޑައިގަތުމުން ހޯމަ ދުވަހު މަޖިލީހަށް ހާޒިރުވެވަޑައިގަންނަވަން އުޒުރުވެރިވެވަޑައިގަންނަވާ ކަމަށެވެ.

ހޯމަ ދުވަހުގެ ޖަލްސާ އަށް ވަޒީރު ހަލީލް ހާޒިރުކުރުމަށް މަޖިލީހުގެ އެޖެންޑާގައި ވަނީ ހިމަނާފައެވެ.

ހަލީލާއި ސުވާލުކުރެއްވުމަށް މަޖިލީހަށް ހުށަހަޅުއްވާފައި ވަނީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމެވެ.

މީކާއިލް ސުވާލު ހުށަހަޅުއްވާފައި ވަނީ ސައުދީގެ ޝާހީ އާއިލާގެ ބޭފުޅެއް ކަމަށް ބުނެ ދާދި ފަހުން ރާއްޖޭގައި ރައީސް ޑރ. މުހައްމަދު މުއިއްޒުއާ ބައްދަލުކުރައްވާފައިވާ، ޕްރިންސް ފަހަދް ސައުދު އަލްޝަލަންގެ މައްސަލަ އާއި ގުޅިގެންނެވެ.

މީކާއިލް ވަނީ "ފަހުދަކީ ޝާހީ އާއިލާގެ ބޭފުޅެއްތޯ؟ އާއި އެ ބައްދަލުވުމުގައި ސައުދީ އެމްބަސީން ބައިވެރިވެފައި ނުވަނީ ކީއްވެތޯ؟ އާއި ފަހުދަކީ ޝާހީ އާއިލާއަށް ނިސްބަތްވާ ބޭފުޅެއްގެ ގޮތުގައި ބަޔާންކޮށްފައިވަނީ ހަގީގަތާ ހިލާފަށްނަމަ ސައުދީ އާއި ރާއްޖެއާ ދެމެދު އޮތް ހާރިޖީ ގުޅުމަށް ނޭދެވޭ އަސަރެއް ކޮށްފާނެތޯ؟" ސުވާލުކުރައްވާފައެވެ.

މަޖިލީހުގެ ރިޔާސަތުން ބުނެފައިވާ ގޮތުގައި ވަޒީރު މަޖިލީހަށް ހާޒިރު ކުރުމުގެ ކަންކަންވީ އެންމެ އަވަހަށް ކުރިއަށް ގެންދާނެއެވެ.