އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި، ބުދަ ދުވަހު ވެސް ޣައްޒާ އިން 20 މީހަކު ޝަހީދު ކޮށްލައިފި އެވެ.

ޣައްޒާގެ ސިވިލް ޑިފެންސް އިން ހާމަކޮށްފައިވާ ގޮތުގައި، ބުދަ ދުވަހުގެ ފަތިހު އިސްރާއީލް އިން ދިން ވައިގެ ދެ ހަމަލާއެއްގައި ޣައްޒާ އިން 20 މީހަކު ޝަހީދުވެފައިވާ ކަމަށެވެ. ޝަހީދުވީ މީހުންގެ ތެރޭގައި ހަ ކުޑަ ކުދިްނ ހިމެނޭ ކަމަށް ވެސް ސިވިލް ޑިފެންސް އިން ވަނީ ހާމަކޮށްފަ އެވެ. 

ސިވިލް ޑިފެންސްގެ ތަރުޖަމާނު މަހުމޫދު ބައްސާލް، އޭއެފްޕީ އަށް ވިދާޅުވީ އިސްރާއީލް އިން ފުރަތަމަ ހަމަލާ އަމާޒު ކުރީ ޚާން ޔުނިސްގެ ދެކުނުގައި ހުރި ހިޖުރަ ކުރި މީހުން ދިރިއުޅެމުން އައި ޓެންޓަކަށް ކަމަށެވެ. އަދި މި ހަމަލާ ދީފައި ވަނީ އަންގާރަ ދުވަހުގެ ރޭ ދަންވަރު ކަމަށް ވެސް ބުނެފައި އެވެ. 

ފުރަތަމަ ހަމަލާ ދިންތާ ކުޑައިރު ކޮޅެއްގެ ތެރޭގައި އުތުރުގައި ހުރި ކޭމްޕަކަށް ދެ ވަނަ ހަމަލާ ދީފައިވާ ކަމަށް ވެސް ވިދާޅުވެފައިވެ އެވެ. މި ހަމަލާތައް ދީފައި ވަނީ، އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އިތުރަށް ފުޅާ ކޮށްފައި ވަނިކޮށް ކަމަށް ވެސް ބައްސާލް ވަނީ ވިދާޅުވެފަ އެވެ. 

އިސްރާއީލް އިން އަންނަނީ މިހާރު ވެސް ޣައްޒާ އަށް ދެމުން އަންނަ ހަމަލާތައް އެއް ދުވަހުން އަނެއް ދުވަހަށް ފުޅާ ކުރަމުންނެވެ. އެގޮތުން ޣައްޒާ އަަށް ބޭނުންވާ އިންސާނީ އެހީ ފޯރުކޮށްދިނުގެ މަސައްކަތް ކުރަމުން އަންނަ މަރުކަޒުތަކަށް އަމާޒުކޮށް ވެސް އިސްރާއީލް އިން އަންނަނީ ހަމަލާތައް ދެމުންނެވެ.