އަމީތާބު ރާއްޖެ އައުމާ ދެކޮޅަށް ކެމްޕޭން ފަށައިފި

ބޮލީވުޑްގެ މަޝްހޫރު ތަރި އަމީތާބު ބައްޗަން ރާއްޖެ އައުމާ ދެކޮޅަށް ސޯޝަލް މީޑިއާގައި ވަރުގަދަ ކެމްޕޭނެއް ފަށައިފި އެވެ.

އަމީތާބު ރާއްޖެ އަންނަނީ ސެޕްޓެމްބަރު މަހު ބާއްވާ ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) ގެ ސައުތު އީސްޓް އޭޝިއާގެ ރީޖަނަލް ކޮމެޓީގެ ބައްދަލުވުމެއްގައި ބައިވެރިވުމަށެވެ.

އަމީތާބު ރާއްޖެ އަށް ކުރާ ދަތުރު ބޮއިކޮޓް ކުރުމަށް ގޮވާލާއި ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް ކުރެއްވި ޓުވީޓެއްގައި ވިދާޅުވެފައި ވަނީ ރާއްޖޭގެ ސިޔާސީ ލީޑަރުން ޖަލަށް ލާފައިވާ ކަމަށެވެ. އަދި ގާނޫނުއަސާސީން ދީފައިވާ ހައްގުތަކާއި މިނިވަންކަން ނިގުޅައިގެންފައިވާ ކަމަށް ވެސް ބުނެފައިވެ އެވެ.

މަހްލޫފު ކުރެއްވި އެހެން ޓްވީޓެއްގައި ވިދާޅުވެފައި ވަނީ ދުނިޔޭގެ ސިއްހަތު ޖަމިއްޔާއިން ރާއްޖޭގައި ކޮންފަރެންސެއް ބާއްވާއިރު، ޖަލަށް ލާފައި ހުންނެވި ކުރީގެ ނައިބު ރައީސް އަހްމަދު އަދީބަށާއި ޖުމްހޫރީ ޕާޓީގެ ލީޑަރު ގާސިމް އިބްރާހިމް އަށް ރާއްޖޭން ބޭރުން ބޭސްފަރުކުރުމުގެ ފުރުސަތު ސަރުކާރުން ހިފަހައްޓާފައިވާ ކަމަށެވެ.

ސޯޝަލް މީޑިއާ އެކްޓިވިސްޓް ތޮއްޔިބު ޝަހީމް ކުރި ޓްވީޓެއްގައި ބުނެފައިވަނީ މިހާރު މިއޮތް ސަރުކާރުން ގައުމުގެ މުއްސަނދިކަން ލޫޓުވައި، އެއްވެ އުޅުމާއި ހިޔާލުފާޅުކުރުމުގެ މިނިވަންކަމަށް ހުރަސް އަޅަމުންދާ ކަމަށެވެ. އެހެންވެ، އަމީތާބުގެ ދަތުރު ކެންސަލް ކުރުމަށް އޭނާ ވެސް ގޮވާލާފައިވެ އެވެ.

އަމީތާބު ޓެގްކުރައްވާ، އެމްޑީޕީގެ މީދޫ ދާއިރާގެ ރައީސް މުހައްމަދު ނިހާދު ކުރެއްވި ޓްވީޓެއްގައި ވިދާޅުވެފައި ވަނީ ރާއްޖޭގެ ސިޔާސީ މަސްރަހު ދެނެގަތުމަށް ގޮވާލައިފަ އެވެ. އަމީތާބު ރާއްޖެ އަންނައިރު، އިދިކޮޅު ހުރިހާ ޕާޓީއެއްގެ ލީޑަރުން ވަނީ ޖަލަށް ލާފައި ކަމަށް ނިހާދު ވިދާޅުވެފައިވެ އެވެ.

ސޯޝަލް މީޑިއާގައި ގިނަ ބަޔަކު ދަނީ އަމީތާބުގެ ދަތުރު ކެންސަލް ކުރުމަށް އެދި ގޮވާލަމުންނެވެ.

އަމީތާބުގެ ދަތުރު ކެންސަލްކުރުމަށް ގިނަ ބަޔަކު ގޮވާލަމުންދާއިރު ސަރުކާރަށް ތާއިދުކުރާ ފަރާތްތަކުން ދަނީ އަމީތާބު ރާއްޖެ އައުމަށް ގޮވާލައި ޓްވީޓް ކުރަމުންނެވެ.