ފަލަސްތީނުގެ ވެސްޓް ބޭންކް އިސްރާއީލުގެ ބިމުގެ ގޮތުގައި ހެދުމަށް އިސްރާއީލުގެ ވެރިން ގޮވާލުމުން އޯއައިސީން އެކަން ކުށްވެރި ކޮށްފި
އޯއައިސީ އިން ބައިނަލް އަގްވާމީ މުޖްތަމައަށް ގޮވާލާފައި ވަނީ ހިސޯރު ކޮށްގެން ތިބޭ ތިބުމާއި ފަލަސްޠީނުން ހިފާފައިވާ ސަރަޙައްދުތަކުގައި ކުރެވޭ ޣައިރު ޤާނޫނީ އާބާދު ކުރުން ނިމުމަކަށް ގެނައުމަށް ބޭނުންވާ ފިޔަވަޅުތައް އެޅުމަށް
އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ކައުންސިލް އޮފް ފޮރިން މިނިސްޓަރސް (ސީއެފްއެމް) ގެ 42 ވަނަ ޖަލްސާ ހުޅުވުމުގެ ރަސްމިއްޔާތު - މެއި 27. 2015
އިސްރާއީލުގެ ވެރިން ފަލަސްތީނުގެ ބިންތައް ހިފާ އިސްރާއީލުގެ ބިމުގެ ގޮތުގައި ހެދުމަށް ގޮވާލާފައިވާތީ އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން އެކަން ހަރުކަށި އިބާރާތުން ކުށްވެރި ކޮށްފިއެވެ.
އޯއައިސީ އިން ވަނީ އިސްރާއީލުގެ އިސްތިއުމާރީ ސަރުކާރުގެ އިސްވެރިންގެ ފަރާތުން އައިސްފައިވާ ނަސްލީ ތަޢައްޞުބުން ފުރިގެންވާ ބަޔާންތައް ހަރުކަށި އިބާރާތުން ކުށްވެރިކޮށްފައެވެ. މި ބަޔާންތަކުގައި ހިފާފައިވާ ވެސްޓް ބޭންކް އެނެކްސްކޮށް، އެ ސަރަޙައްދުގައި އިސްރާއީލުގެ "ސިޔާދަތު" ގާއިމުކުރުމަށް ގޮވާލާފައިވެއެވެ.
އޯއައިސީ އިން މިކަން ދެކެނީ ބައިނަލްއަޤްވާމީ ޤާނޫނާއި އދ ގެ ޤަރާރުތަކާ ކަނޑައެޅިގެން ޚިލާފު ކަމެއްގެ ގޮތުގައެވެ. އަދި މިއީ ދެ ދައުލަތުގެ ޙައްލަކަށް ވާސިލުވުމަށް ކުރެވޭ ބައިނަލްއަޤްވާމީ މަސައްކަތްތައް ފެއިލް ކޮށްލުމަށް ކުރެވޭ މަސައްކަތެއްގެ ގޮތުގައެވެ.
އޯއައިސީން ބުރާސްފަތި ދުވަހު ނެރުނު ބަޔާނުގައި މިފަދަ ވާހަކަތަކުގެ ނުރައްކާތެރިކަން ފާހަގަ ކުރަމުން، އިސްރާއީލުގެ އިސްތިއުމާރީ ވެރިންނާއި ހައްދުފަހަނަ އަޅާފައިވާ ގާނޫނާ ޚިލާފު ޔަހޫދީ ވަޒަންވެރިން ފަލަސްޠީނު ރައްޔިތުންނާއި އެބައިމީހުންގެ ބިމާއި މުޤައްދަސް ތަންތަނާ ދެކޮޅަށް ހިންގަމުންދާ އަނިޔާވެރި ޢަމަލުތަކާ މެދު އިންޒާރު ދީފައެވެ.
އޯއައިސީ އިން ބައިނަލްއަޤްވާމީ މުޖުތަމަޢުއަށް ތަކުރާރު ކޮށް ގޮވާލައިފައި ވަނީ ފަލަސްޠީނު ދައުލަތް ބަލައިގަތުމަށާއި، އދ ގެ ފުރިހަމަ މެމްބަރޝިޕް ފަލަސްޠީނަށް ދިނުމަށާއި، އަދި އދ ގެ ކަމާބެހޭ ޤަރާރުތަކާއި ބައިނަލްއަޤްވާމީ ޢަދުލުގެ ކޯޓުގެ ލަފަޔާއި ރައުޔާ ޚިލާފަށް ހިސޯރު ކޮށްގެން ތިބޭ ތިބުމާއި ފަލަސްޠީނުން ހިފާފައިވާ ސަރަޙައްދުތަކުގައި ކުރެވޭ ޣައިރު ޤާނޫނީ އާބާދު ކުރުން ނިމުމަކަށް ގެނައުމަށް ބޭނުންވާ ފިޔަވަޅުތައް އެޅުމަށެވެ.
