ތެލުގެ ދަތިކަމާ ހެދި ޣައްޒާގެ އެންމެ ބޮޑު ހޮސްޕިޓަލް ނުރައްކާތެރި ޙާލަތެއްގައި

ޣައްޒާގައި ހުންނަ އެންމެ ބޮޑު ހޮސްޕިޓަލް ކަމަށްވާ، އަލް ޝިފާ ހޮސްޕިޓަލްގެ މުހިންމު ޚިދުމަތްތަކެއް ހުއްޓުމަކަށް އައުމުގެ ނުރައްކަލާ ކުރިމަތިލާން ޖެހިއްޖެ އެވެ.

އަލް ޝިފާ ހޮސްޕިޓަލަށް ނުރައްކާތެރި ޙާލަތަކާ ކުރިމަތިލާން ޖެހިފައި ވަނީ ތެލުގެ ދަތިކަމާ ހުރެ އެވެ. އެކަމުގެ ސަބަބުން އެ ހޮސްޕިޓަލްގެ އެންމެ މުހިންމު ޚިދުމަތްތައް ހުއްޓުމަކަށް އަތުވެދާނެ ކަމުގެ ނުރައްކާތެރިކަން ވެސް ވަނީ ކުރިމަތިވެފަ އެވެ. 

އިސްރާއީލް އިން ޣައްޒާގައި އަޅާފައިވާ ދަތި ކުރުމުގެ ފިޔަވަޅުތަކުގެ ސަބަބުން އެ ހޮސްޕިޓަލަށް ބޭނުންވާ ތެޔޮ ފޯރުކޮށްދިނުމުގައި ވަނީ ދަތިތަކާ ކުރިމަތިލާން ޖެހިފަ އެވެ. އަދި މިހާރު އެ ހޮސްޕިޓަލްގައި ބޭނުން ކުރަމުން އަންނަނީ ހަމައެކަނި ބެކަޕް ޖަނަރޭޓަރެއް ކަމަށް ވެސް ވަނީ ރިޕޯޓު ކޮށްފަ އެވެ. އަދި އެ ޖަނަރެޓާރުން ވެސް ތެޔޮ ހުސްވާން ކައިރިވެފައިވާ ކަމަށް ވަނީ ބުނެފަ އެވެ. 

މީގެ އިތުރުން މި ކަމުގެ ސަބަބުން ކިޑްނީ ޑައިލިސިސް މެޝިންތައް ހުއްޓި، އިންޓެންވިސް ކެއާ ޔުނިޓުތަކުގެ މަސައްކަތް ވަރަށް ބޮޑަށް ދަށްވެފައިވާ ކަމަށް ވަނީ ހާމަކޮށްފަ އެވެ. މި ޙާލަތުގައި އެ ސަރަހައްދުގައި އުޅޭ ބަލި މީހުންގެ ފުރާނަ އަށް ނުރައްކާވެފައިވާ ކަމަށް ޞިއްޙީ އިދާރާ ތަކުން ވަނީ މައުލޫމާތު ހާމަކޮށްފަ އެވެ.

އެކަމުގެ ސަބަބުން އެ ހޮސްޕިޓަލްގެ މުވައްޒަފުން އަންނަނީ ކުއްލި ޙާލަތުގައި ފަރުވާދޭނެ ގޮތްތަކެއް ހޯދުމަށް މަސައްކަތް ކުރަމުންނެވެ. އަދި އެ ހޮސްޕިޓަލަށް އަވަސް އެހީތެރިކަން ނުލިބިއްޖެ ނަމަ، އިތުރު ބައެއްގެ ފުރާނަ އަށް ނުރައްކާވެދާނެ ކަމަށް ވެސް ޞިއްޙީ މާހިރުން އަންނަނީ އިންޒާރު ދެމުންނެވެ. އަދި ބައިނަލްއަޤުވާާމީ މުޖުތަމައުން އަންނަނީ އެކަމަށް އަވަސް ޙައްލެއް ހޯދުމަށް ވެސް ގޮވާލަމުންނެވެ. 

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި އަންނަނީ، ޣައްޒާ އަށް އެތަކެއް ދަތި ކުރުންތަކެއް ކުރިމަތި ކުރުވަމުންނެވެ. އެގޮތުން ޣައްޒާގެ ރައްޔިތުންނަށް ބޭނުންވާ އިންސާނީ އެހީތެރިކަމަށް އިސްރާއީލް އިން އެތައް ދުވަހެއް ވަންދެން ހުރަސް އަޅާފައިވާއިރު، މިހާރު އިންސާނީ އެހީ ފޯރުކޮށްދެމުން އަންނައިރު ވެސް ހަމަލާތައް ދަނީ ދެމުންނެވެ. 

މިވަގުތު ޣައްޒާ އަށް އިސްރާއީލް އިން ދެމުން އަންނަ ހަަމަލާތައް ވެސް އިތުރު ކޮށްފައިވާއިރު، ކޮންމެ ދުވަހަކު ވެސް އަންނަނީ އެތައް ބަޔަކު ޝަހީދު ކުރަމުންނެވެ. ޣައްޒާގައި މިވަގުތު އޮތް ޙާލަތާ މެދު ބައިނަލްއަޤުވާމީ އިދާރާތަކާއި، ޖަމިއްޔާ ޖަމާއަތްތަކުން ވެސް އަންނަނީ ކަންބޮޑުވުން ފާޅު ކުރަމުންނެވެ.